<p><span style="color: #000000;"><strong>(ក្រុងអាយរេស)៖</strong> កាសែតក្នុងស្រុក La Nacional របស់អាហ្សង់ទីន បានចេញផ្សាយព្រឹកថ្ងៃចន្ទ ទី០៤ ខែកក្កដាថា កីឡាករខ្សែប្រយុទ្ធជួរមុខ Lionel Messi បានសម្រេចវិលចូលក្រុមជម្រើសជាតិអាហ្សង់ទីនវិញហើយ បន្ទាប់ពីប្រកាស ចូលនិវត្តន៍ពីជម្រើសជាតិបាន ១សប្តាហ៍។</span></p>
<p><span style="color: #000000;">សារព័ត៌មានដ៏ល្បីរបស់អាហ្សង់ទីន ដដែលបានបញ្ជាក់ថា កីឡាករវ័យ២៩ឆ្នាំ ដែលកំពុងប្រកបអាជីពក្នុងយក្ស អេស្ប៉ាញ FC Barcelona វិលមកវិញជាលើកទី២នេះ គឺដើម្បីជួយក្រុមរងជើងឯក World Cup 2014 លេងក្នុង World Cup 2018 នៅប្រទេសរុស្ស៊ី និងត្រៀមធ្វើការប្រកួតជម្រុះពាន ៤ឆ្នាំម្តងនេះក្នុងខែកញ្ញាខាងមុខបន្តទៀត។</span></p>
<p><span style="color: #000000;">សូមរំលឹកផងដែរថា បុរសកូន ២នាក់ Lionel Messi បានប្រកាសចូលនិវត្តន៍ភ្លាមៗ បន្ទាប់ពីមិនអាចជួយក្រុមពពកស អាហ្សង់ទីន ឈ្នះពានជើងឯកប្រចាំទ្វីបអាមេរិក Copa America Centenarion 2016 បន្ទាប់ពីចាញ់ ក្រុមមកពីតំបន់អាមេរិកឡាទីនដូចគ្នា ឈីលី ដោយបាល់ប៉េណាល់ទីកាត់សេចក្តី ៤-២ កាលពីថ្ងៃទី២៧ ខែមិថុនា ឆ្នាំ២០១៦ ដែលមានអាមេរិកធ្វើម្ចាស់ផ្ទះ។</span></p>
<p><span style="color: #000000;">តែយ៉ាងណាក៏ដោយ កាសែត La Nacional មិនបានបញ្ជាក់ថា Messi នឹងមកចូលរួមក្រុមហ្វឹកហាត់ជុំគ្នាពេលណានោះទេ ដើម្បីធ្វើជាប្រធានក្រុមដឹកនាំអាហ្សង់ទីន លេងជម្រុះ World Cup 2018 ជាបន្តទៀតប្រចាំតំបន់អាមេរិកខាង ត្បូង តែច្បាស់ថា Messi បានសម្រេចចិត្តមិនចូលនិវត្តន៍ពីក្រុមជម្រើសជាតិឡើយ បន្ទាប់ពីទទូចសុំពីប្រធានាធិបតីអាហ្សង់ទីន Mauricio Macri និងអតីតគ្រូបង្វឹករបស់ខ្លួន Diego Maradona និងបងប្អូនជនរួមជាតិអាហ្សង់ទីនថែមទៀតនោះ ព្រោះថារូបគេ ជាកីឡាករស្នូលក្នុងក្រុម និងជាបច្ច័យអាក្រក់ផងដែរ សម្រាប់កីឡាករឯទៀត ក្នុងការសម្រេចចិត្តដើរចេញពីក្រុមជម្រើសជាតិទាំងឆាប់រហ័សបែបនេះ៕</span></p>
<p><a class="thickbox" title="" href="/FileManager/Commons/2016/7/4/10a-04-07-2016--13-57-15.jpg"><img src="/FileManager/Articles/mce/2016/7/4/10a-04-07-2016--13-57-15.jpg" alt="" /></a></p>
<p> </p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>
</div>
<div class="detail_bottom_function">
<div class="facebook_like"></div>
</div>