<p><span style="color: #000000;"><strong>(អវកាស)៖</strong> ទីភ្នាក់ងារអវកាស អាមេរិក NASA បានធ្វើការបើសន្និសីទសារព័ត៌មាន ដ៏កម្រមួយក្នុងសប្តាហ៍នេះ ដើម្បីបង្ហាញពីលទ្ធផលនានា ដែលចេញដោយកែវយឺតអវកាស Kepler ដែលបាន បំពេញបេសកកម្ម ក្នុងទីអវកាសអស់រយៈពេល០៧ឆ្នាំមកហើយ ក្នុងនោះគេអាចសន្មត់ថា ភពថ្មីៗ ចំនួន ៣០ឯណោះ ដែលអាចឲ្យជីវិតរស់នៅបាន។ នេះបើតាមការចេញផ្សាយ របស់សារព័ត៌មានអវកាស នាព្រឹកថ្ងៃពុធ ទី១១ ខែឧសភា ឆ្នាំ២០១៦។</span></p>
<p><span style="color: #000000;">នៅក្នុងសន្និសីទ នាយប់ថ្ងៃអង្គារ នៅឯទីស្នាក់ការ NASA នាទីក្រុងវ៉ាស៊ីនតោន សហរដ្ឋអាមេរិក អង្គការនេះបានប្រកាសថា ខ្លួនបានរកឃើញភពសរុប ១,២៨៤ នៅប្រព័ន្ធព្រះអាទិត្យផ្សេងពីយើង ដោយប្រើប្រាស់កែវយឺត Kepler តែមួយមុខប៉ុណ្ណោះ ចាប់តាំងពីការបាញ់បង្ហោះវា កាលពីឆ្នាំ ២០០៩ រហូតមកដល់ឆ្នាំ ២០១៦ នេះ។</span></p>
<p><span style="color: #000000;">កន្លងមក Kepler បានធ្វើការពិនិត្យលម្អិតទៅលើ តារានានាចំនួនជាង ១៥០,០០០ នៅក្នុងកាឡាក់ស៊ី មាលគីវេយ៍ ដើម្បីស្វែងរកភពដែល ធ្វើដំណើរឆ្លងកាត់ពន្លឺ នៃតារាទាំងនោះ ហើយជាក់ស្តែងផ្កាយភាគច្រើន ពុំត្រូវបានគេរកឃើញភពវិលជុំវិញនោះឡើយ។ តាមពិតភព ដែលគេអះអាងថា មាននោះ គឺមានចំនួន ៥,០០០ភពឯណោះ ប៉ុន្តែក្នុងចំណោមនោះភព ៣,២០០ ប៉ុណ្ណោះ ដែលត្រូវបានគេសិក្សា និង ២,៣០០ទៀត កំពុងតែត្រូវ Kepler ធ្វើការកំណត់នៅឡើយ។</span></p>
<p><span style="color: #000000;">ចំពោះបណ្តាភពទាំង ១,២៨៤ ដែលបានទទួលការសិក្សាច្បាស់លាស់នោះ គឺក្នុងចំណោមនោះមាន ភពចំនួន ៥៥០ អាចជាភពក្រាលដោយថ្ម ដូចភពផែនដីយើង ដោយគេយោងលើទំហំរបស់ពួកវា តែម្តង។ ដោយឡែកភពចំនួន ០៩ក្នុងចំណោមនោះ គឺកំពុងស្ថិតនៅក្នុងគន្លងល្អជាងគេ ដែលមានន័យថា ពួកវាស្ថិតក្នុងគន្លងស្រដៀង និងគន្លងរបស់ភពផែនដី និងព្រះអាទិត្យ ដែលនាំឲ្យក្រុមអ្នកវិទ្យាសាស្ត្រ ធ្វើការសន្និដ្ឋានថា អាចមានជីវិតរស់នៅទីនោះ ឬគ៏ពួកវាអាចជាកន្លែង ដែលឲ្យជីវិតរស់នៅបាន។</span></p>
<p><span style="color: #000000;">ដោយឡែកបើសរុបជារួមទៅ ភពដែលធំជាងផែនដី និង មានគន្លងស្រដៀងផែនដី ពីព្រះអាទិត្យទៀតនោះ មានចំនួនរហូតដល់ទៅ ២១ភពទៀតឯណោះ ហេតុដូច្នេះជីវិតទំនងជា ងាយនឹងអាចកើតឡើង នៅទីនោះជាងបណ្តាភពរាប់ពាន់ទៀត ដែលមានគន្លងមិនដូចផែនដី និងព្រះអាទិត្យ។</span></p>
<p><span style="color: #000000;">យ៉ាងណាក៏ដោយ រឿងដែលងាយយល់ពេលនេះ គឺបណ្តាភពនានា ដែលនៅជិតព្រះអាទិត្យរបស់វា ពេក នោះបរិយាកាសនឹងក្តៅខ្លាំង មិនអាចឲ្យជីវិតរស់នៅបានទេ ហើយសម្រាប់ភពដែលស្ថិតនៅ ឆ្ងាយពីព្រះអាទិត្យពេក អាកាសធាតុនឹងត្រជាក់ខ្លាំង ដែលនាំឲ្យជីវិតពិបាកនឹងកកើតឡើងផងដែរ។ ការហ៊ានសន្និដ្ឋានថា កន្លែងណាមួយ ដែលអាចស្វាគមន៍ជីវិតនោះ គឺយោងទៅលើគន្លង និងព្រះអាទិត្យ ដែលស្រដៀងនឹងភពផែនដី និងព្រះអាទិត្យរបស់យើងនេះ ជាឧទាហរណ៍ចម្បង៕</span></p>
<p><br /><span style="color: #000000;"><a class="thickbox" title="" href="/FileManager/Commons/2016/5/12/14b-12-05-2016--10-41-44.jpg"><span style="color: #000000;"><img src="/FileManager/Articles/mce/2016/5/12/14b-12-05-2016--10-41-44.jpg" alt="" /></span></a></span></p>
<p style="text-align: right;"><span style="color: #000000;">ប្រភព ៖ wtkr</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>