<p><span style="color: #000000;"><strong>(ភ្នំពេញ)៖</strong> រថភ្លើងដឹកអ្នកដំណើរ ពីភ្នំពេញ ទៅព្រះសីហនុ ឬពីព្រះសីហនុមកភ្នំពេញ នឹងត្រូវដំណើរការឡើងវិញ នៅថ្ងៃទី៩ ខែមេសា ឆ្នាំ២០១៦ខាងមុខនេះ ពោលគឺនៅមុនថ្ងៃមកដល់ នៃពិធីបុណ្យចូលឆ្នាំប្រពៃណីខ្មែរ ដែលបងប្អូនប្រជាពលរដ្ឋ សម្រុកចេញពីភ្នំពេញ ទៅតាមបណ្តាលខេត្ត ហើយការដំណើរការខ្សែរថភ្លើងនេះ រំពឹងថានឹងជួយសម្រួលដល់ចរាចរណ៍បានមួយកំរិត។</span></p>
<p><span style="color: #000000;">តំណាងក្រុងហ៊ុន Toll Royal Railways ដែលជាក្រុមហ៊ុន ទទួលសិទ្ធិវិនិយោគលើការដឹកជញ្ជូន តាមផ្លូវរថភ្លើង បានប្រាប់អង្គភាព Fresh News តាមទូរសព្ទនៅរសៀលថ្ងៃទី២១ ខែមីនានេះថា ក្រុមហ៊ុននឹងធ្វើការរត់សាកល្បង នៃការដឹកជញ្ជូនអ្នកដំណើរ តាមផ្លូវរថភ្លើង ពីរាជធានីភ្នំពេញ ទៅខេត្តព្រះសីហុន កាត់ខេត្តតាកែវ និងកំពត។ ក្នុងដំណើរផ្លូវរត់នេះ រថភ្លើងដឹកអ្នកដំណើរ នឹងអាចចតដាក់អ្នកដំណើរ នៅស្ថានីយរថភ្លើង ខេត្តតាកែវ និងកំពត មុននឹងទៅដល់ស្ថានីយ៍រថភ្លើង នៅខេត្តព្រះសីហនុ។</span></p>
<p><span style="color: #000000;">តំណាងក្រុមហ៊ុនដដែលរូបនោះ បានបញ្ជាក់ទៀតថា ការរត់សាកល្បងនេះ នឹងមានរយៈពេល១សប្តាហ៍ពេញ ចាប់ពីថ្ងៃទី៩ ដល់១៧ ខែមេសា ឆ្នាំ២០១៦ នៅក្នុងអំឡុងពេលបុណ្យចូលឆ្នាំខ្មែរ ប្រពៃណីជាតិ ដើម្បីជួយសម្រួលដល់ចរាចរណ៍ ដែលមមាញឹកខ្លាំង ក្នុងអំឡុងពេលប្រជាពលរដ្ឋ សម្រាប់ចេញនិងចូលពីរាជធានីភ្នំពេញ ទៅតាមខេត្ត និងពីតាមខេត្តមកភ្នំពេញវិញ។</span></p>
<p><span style="color: #000000;">តំណាងក្រុមហ៊ុនបញ្ជាក់ទៀតថា បន្ទាប់ពីបញ្ចប់ការរត់សាកល្បង ក្រុមហ៊ុននឹងធ្វើការពិចារណាបន្តទៀត នូវការរត់របស់រថយន្ត ក្នុងពេលវេលាសមស្របណាមួយ តែប្រសិនបើនៅពេលដាក់ ដំណើរការសាកល្បងរួច ហើយមានប្រជាពលរដ្ឋគាំទ្រច្រើន ក្រុមហ៊ុន នឹងធ្វើការរត់ជាប្រចាំផងដែរ។</span></p>
<p><span style="color: #000000;">ដោយឡែកចំពោះតំលៃ នៃការធ្វើដំណើរតាមរថភ្លើងវិញ ត្រូវបានតំណាងក្រុមហ៊ុនរូបនោះបញ្ជាក់ថា ពីភ្នំពេញទៅព្រះសីហនុ សំបុត្រថ្លៃ៧ដុល្លារក្នុងម្នាក់ ដោយប្រើរយៈពេល៨ម៉ោងលើចម្ងាយផ្លូវ ២៦០គីឡូម៉ែត្រ។ ហើយពីភ្នំពេញ ទៅតាកែវ សំបុត្រថ្លៃ៥ដុល្លារក្នុងម្នាក់ ខណៈពីភ្នំពេញទៅកំពត ថ្លៃ៦ដុល្លារក្នុងម្នាក់។ សំបុត្រអាចរកទិញនៅតាមស្ថានីយរថភ្លើងនៅភ្នំពេញ ក៏ដូចជាតាមខេត្តផងដែរ។</span></p>
<p><span style="color: #000000;">សូមជម្រាបថា រថភ្លើងដឹកអ្នកដំណើររបស់កម្ពុជា ត្រូវបានផ្អាកដំណើរការ ជាច្រើនឆ្នាំមកហើយ បន្ទាប់ពីជួបបញ្ហាប្រឈមមួយចំនួន៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/3/21/16-21-03-2016--17-09-34.jpg"><img src="/FileManager/Articles/mce/2016/3/21/16-21-03-2016--17-09-34.jpg" alt="" /></a></span></p>
<p><br /><a class="thickbox" title="" href="/FileManager/Commons/2016/3/21/16a-21-03-2016--17-09-41.jpg"><img src="/FileManager/Articles/mce/2016/3/21/16a-21-03-2016--17-09-41.jpg" alt="" /></a></p>
<p><br /><a class="thickbox" title="" href="/FileManager/Commons/2016/3/21/16b-21-03-2016--17-09-48.jpg"><img src="/FileManager/Articles/mce/2016/3/21/16b-21-03-2016--17-09-48.jpg" alt="" /></a><a class="thickbox" title="" href="/FileManager/Commons/2016/3/21/16a-21-03-2016--17-09-41.jpg"></a><span style="color: #000000;"><a class="thickbox" title="" href="/FileManager/Commons/2016/3/21/16-21-03-2016--17-09-34.jpg"></a><br /></span></p>
<p> </p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
<div><span><br /></span></div>