<p><span style="color: #000000;"><strong>(កាណាដា)៖</strong> ល្បែងហ្គេមតាមស្មាតហ្វូន Pokemon Go បានធ្វើឲ្យមនុស្សមួយចំនួន ជាពិសេសយុវវ័យ នៅទូទាំងពិភពលោក វក់លេងយ៉ាងខ្លាំង រហូតភ្លេចគិតពីសុវត្ថិភាពផ្ទាល់ខ្លួន ដូច្នេះហើយ បានជាថ្មីៗនេះ បណ្តាប្រទេសមួយចំនួន បានក្រើនរំឭក និងចេញបម្រាមមិនឲ្យមានការលេងហ្គេមនេះ នៅតាមកន្លែងនានា ដែលអាចនាំឲ្យរងគ្រោះថ្នាក់ ជាយថាហេតុ។ </span></p>
<p><span style="color: #000000;">ប៉ូលិសនៅរដ្ឋ Ontarion ប្រទេសកាណាដា ក៏បានជម្រុញឲ្យមនុស្សលេង Pokemon Go ប្រកបដោយការ ទទួលខុសត្រូវផងដែរ ដូចជាមានហេតុការណ៍មួយ ទើបនឹងកើតឡើងថ្មីៗនេះ គឺក្រុមប៉ូលិសបានជិះឧទ្ធម្ភាគចក្រ តាមរថយន្តមួយគ្រឿង ដែលបើកបរដោយបុរសម្នាក់ ដែលគេសង្ស័យថា ជាចោរតែទីបំផុតការឃាត់រថយន្តបុរសនោះ ឲ្យឈប់ពិនិត្យទើបដឹងថា គេកំពុងជក់លេង Pokemon Go សោះ។</span></p>
<p><span style="color: #000000;">នៅថ្ងៃកើតហេតុ បុរសដែលត្រូវប៉ូលិសសង្ស័យនោះ បានបើករថយន្តត្រាច់ចរចុះឡើងៗ មើលទៅមិនប្រក្រតី ឆ្លងកាត់ទីក្រុង Vaughan ទើបក្រុមសមត្ថកិច្ចសង្ស័យ រហូតដល់ជិះឧទ្ធម្ភាគចក្រដេញតាម ព្រោះខ្លាចមានបទល្មើសអ្វីមួយកើតឡើង ហើយក៏ប្រាប់ប៉ូលិសផ្សេងទៀត ឲ្យជួយឃាត់រថយន្ត ទីបំផុត បែរជាអ្នកបើកបរកំពុងវក់ នឹងលេងហ្គេមទៅវិញ។ </span><br /><span style="color: #000000;">មិនមានការផាកពិន័យ ទៅលើអ្នកបើកបរនោះទេ គ្រាន់តែប៉ូលិសផ្តល់ការណែនាំគាត់ខ្លះៗប៉ុណ្ណោះ ដើម្បីចៀសវាងគ្រោះថ្នាក់ កើតដោយចៃដន្យ ព្រោះតែការជក់លេងហ្គេម មួយនេះ៕</span></p>
<p><span style="color: #000000;"><iframe src="https://www.youtube.com/embed/FlAsCBP0GkU" frameborder="0" width="500" height="410"></iframe></span></p>
<p><span style="color: #000000;"><img src="http://i.imgur.com/XkML5qK.png?policephoto" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>