<div class="article-content">
<p><strong>ភ្នំពេញ៖</strong> មន្រ្តីកងរាជអាវុធហត្ថម្នាក់ បម្រើការនៅទីស្នាក់ការ ព្រែកចាក ខេត្តកំពត ត្រូវបានគ្រាប់កាំភ្លើងផ្ទុះធ្លាយក្បាលស្លាប់ភ្លាមៗនៅក្នុងផ្ទះសំណាក់មហាសាល ស្ថិតក្នុងសង្កាត់ព្រែកលៀប ខណ្ឌជ្រោយចង្វា កាលពីម៉ោង១រំលងអាធ្រាត្រឈានចូលថ្ងៃទី២៣ ខែមិថុនា ឆ្នាំ២០១៣។</p>
<p>ការផ្ទុះកាំភ្លើងសម្លាប់មន្រ្តីកងរាជអាវុធហត្ថនេះ មិនទាន់មានការបញ្ជាក់ឲ្យបានជាក់លាក់ពីសមត្ថកិច្ចនៅឡើយទេ។ តែតាមប្រភពព័ត៌មានជំហានដំបូងពីសង្សាររបស់ជនរងគ្រោះ បានឲ្យដឹងថា នៅមុនពេលកើតហេតុជនរងគ្រោះ បាននាំសង្សាររបស់ខ្លួនចូលទៅដេកនៅក្នុងផ្ទះសំណាក់ខាងលើ បន្ទាប់មកក៏ដកកាំភ្លើងអាឡូរបស់ខ្លួនមកភ្ជង់ក្បាលហើយកេះបាញ់ជាច្រើនដង ដោយសំអាងថា ក្នុងកាំភ្លើង ខ្លួនបានយកគ្រាប់ចេញអស់ទៅហើយ។</p>
<p>បើតាមការបញ្ជាក់ពីស្រ្តីជាសង្សារបន្តថា ជាអកុសលនៅក្នុងកាំភ្លើងនៅមានគ្រាប់មួយគ្រាប់ទៀត ក៏បណ្តាលឲ្យផ្ទុះ ឡើងទម្លាយក្បាលជនរងគ្រោះ បណ្តាលឲ្យស្លាប់ភ្លាមៗតែម្តង។</p>
<p>មន្រ្តីកងរាជអាវុធហត្ថ ដែលយកជីវិតប្រលែងលេងនឹងកាំភ្លើង ព្រោះចង់បង្ហាញភាពសង្ហារបស់ខ្លួនឲ្យសង្សារមើលនេះ មានឈ្មោះ ហែម ហៀប អាយុ ជាង ៣០ឆ្នាំ បម្រើការនៅទីស្នាក់ការកងរាជអាវុធហត្ថព្រែកចាក ក្នុងខេត្តកំពត៕</p>
</div>
<p style="text-align: right;"><a href="http://www.dap-news.com/2011-06-14-02-39-55/89072-2014-06-23-02-43-15.html" target="_blank">ផ្តល់សិទ្ធដោយ ៖ ដើមអម្ពិល</a></p>