<p><span style="color: #000000;"><strong>(ភ្នំពេញ)៖</strong> លោក អង្គ វង្ស វឌ្ឍានា រដ្ឋមន្រ្តីក្រសួងយុត្តិធម៌ បានចេញលិខិតមួយកោះហៅ ព្រះរាជអាជ្ញាទូទាំងប្រទេស បើកកិច្ចប្រជុំនៅថ្ងៃទី១៨ ខែធ្នូ ឆ្នាំ២០១៥ខាងមុខនេះ ដើម្បីពិភាក្សាអំពីការលើកលែងទោស និងពិនិត្យសំណុំរឿង លួច ឆក់ និងប្លន់ នៅក្នុងប្រទេសកម្ពុជា។</span></p>
<p><span style="color: #000000;">ចំណាត់ការនេះ បានធ្វើឡើងបន្ទាប់ពី សម្តេចតេជោ ហ៊ុន សែន ប្រមុខរាជរដ្ឋាភិបាល បានព្រមានក្រសួងយុត្តិធម៌ និងក្រសួងមហាផ្ទៃ អំពីរឿងអតីតទណ្ឌិត ក្នុងបទល្មើសប្លន់ ដែលមិនព្រមកែខ្លួន ហើយចេញធ្វើសកម្មភាពដដែល បន្ទាប់ពីផ្តន្ទាទោស នៅក្នុងពន្ធនាគារ។</span></p>
<p><span style="color: #000000;">តាមរយៈលិខិតរបស់រដ្ឋមន្រ្តីក្រសួងយុត្តិធម៌ ដែល ភ្នាក់ងាព័ត៌មាន ទទួលបាននៅថ្ងៃទី១៥ ខែធ្នូ ឆ្នាំ២០១៥នេះ បានឱ្យដឹងថា ការប្រជុំបន្ទាន់ នៅទីស្តីការក្រសួងយុត្តិធម៌នេះ ក្រសួងបានតម្រូវឱ្យព្រះរាជអាជ្ញាទាំងអស់ ធ្វើការប្រមូលទិន្នន័យ និងរាយការណ៍ជូនអង្គប្រជុំអំពីចំនួន សំណុំរឿងពាក់ព័ន្ធនឹងអំពើលួច ឆក់ និងប្លន់ ដែលកំពុងស្ថិតនៅក្នុងចំណាត់ការ អយ្យការ និងតុលាការ, ដែលបានចាត់ការរួច និងដែលទណ្ឌិត ត្រូវបានដោះលែងចេញពីពន្ធនាគារ។</span></p>
<p><span style="color: #000000;">សូមជំរាបថា នៅក្នុងពិធីផ្សព្វផ្សាយ ការបញ្ជ្រាបទស្សនទាន សីលធម៌ សាសនា ដើម្បីសុដុមនីយកម្មនៅកម្ពុជា នៅមជ្ឈមណ្ឌលពិព័រណ៍ និងសន្និបាតកោះពេជ្រ នាព្រឹកថ្ងៃទី១៤ ខែធ្នូ ឆ្នាំ២០១៥ សម្តេចតេជោ ហ៊ុន សែន បានអំពាវនាវឱ្យ ក្រសួងយុត្តិធម៌ និងក្រសួងមហាផ្ទៃ ពិនិត្យឡើងវិញ ចំពោះការស្នើលើកលែងទោសដល់ទណ្ឌិត ដែលពាក់ព័ន្ធនឹងអំពើប្លន់ និងគ្រឿងញៀន។ សម្តេចថា បើទណ្ឌិតដែលពាក់ព័ន្ធនឹងបទល្មើសទាំងពីរនេះ សម្តេចនឹងមិនស៊ីញ៉េ ជួយលើកលែងទោសនោះទេ៕</span></p>
<p><span style="color: #000000;"><a class="thickbox" title="" href="/FileManager/Commons/2015/12/15/1234230915328006537009672549694326913332506n-15-12-2015--16-32-52.jpg"><span style="color: #000000;"><img src="/FileManager/Articles/mce/2015/12/15/1234230915328006537009672549694326913332506n-15-12-2015--16-32-52.jpg" alt="" /></span></a></span></p>
<p style="text-align: right;"><span>ផ្ដល់សិទ្ធដោយ៖ ហ្រ្វេសញ៉ូវអាស៊ី</span></p>