<p><span style="color: #000000;"><strong>(សេអ៊ូល)៖</strong> ប្រទេសកូរ៉េខាងជើងសង្ឃឹមថា លោក ដូណាល់ ត្រាំ ដែលជាបេក្ខភាពប្រធានាធិបតីមកពីគណបក្សសាធារណរដ្ឋ នឹងទទួលបានជ័យជម្នះនៅក្នុងការបោះឆ្នោតជ្រើសរើសប្រធានាធិបតីអាមេរិក លើគូប្រជែងរបស់លោក គឺលោកស្រី ហ៊ីលឡារី គ្លីនតុន ដែលមកពី គណបក្សប្រជាធិបតេយ្យ។ នេះបើតាមការចេញផ្សាយដោយទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅព្រឹកថ្ងៃពុធ ទី១៩ ខែតុលា ឆ្នាំ២០១៦។</span></p>
<p><span style="color: #000000;">លោក Keisuke Fukuda និពន្ធនាយករបស់ទស្សនាវដ្តីជប៉ុន Toyo Keizai ដែលផ្តោតសំខាន់លើកិច្ចការនៅឧបទ្វីបកូរ៉េ បាននិយាយនៅក្នុងកិច្ចសម្ភាសន៍ជាមួយនឹងសារព័ត៌មាន Voice of America (VOA) ថា<strong> «មន្រ្តីនៅក្នុងជួររដ្ឋាភិបាលនិងនៅតាមបណ្តាស្ថាប័នសាធារណៈ នៃប្រទេសកូរ៉េខាងជើងបានបង្ហាញឲ្យដឹងថា ពួកគេមានការចាប់អារម្មណ៍ខ្ពស់ទៅលើការបោះឆ្នោត ជ្រើសរើសប្រធានាធិបតីអាមេរិក និង ទំនងជាកំពុងរង់ចាំលទ្ធផលយ៉ាងអន្ទះអន្ទែងថែមទៀតផង»</strong>។</span></p>
<p><span style="color: #000000;">ទន្ទឹមគ្នានេះដែរ លោក Fukuda ដែលបានធ្វើដំណើរទៅកាន់ទីក្រុងព្យុងយ៉ាង និង វុនសាន នៃប្រទេសកូរ៉េខាងជើង កាលពីខែមុនហើយបានដឹងថា មនុស្សភាគច្រើនដែលលោកបានជួប សង្ឃឹមថាលោក ដូណាល់ ត្រាំ នឹងទទួលបានជ័យជម្នះនៅក្នុងការបោះឆ្នោត ព្រោះថាប្រសិនបើ លោក ត្រាំ ឈ្នះការផ្លាស់ប្តូរនឹងកើតមានឡើងជាក់ជាមិនខានឡើយ។</span></p>
<p><span style="color: #000000;">លើសពីនេះទៀតពួកគេបានបញ្ជាក់ថា ប្រទេសកូរ៉េខាងជើងមានភាពងាយស្រួល ក្នុងការនិយាយគ្នាជាមួយនឹងគណបក្សសារធារណរដ្ឋ ជាជាងគណបក្សប្រជាធិបតេយ្យ ហើយពួកគេក៏មានការខកបំណងជាខ្លាំងណាស់ដែរចំពោះ លោកស្រី គ្លីនតុន ដែលមិនសូវជារវីរវល់ជាមួយនឹងប្រទេសកូរ៉េខាងជើង។</span></p>
<p><span style="color: #000000;">គួរបញ្ជាក់ដែរថាគេហទំព័រ DPRK Today របស់កូរ៉េខាងជើងក៏ធ្លាប់បានសរសើរ លោក ដូណាល់ ត្រាំ ថាជា «អ្នកនយោបាយដ៏ឆ្លាតវ័យ» និងជា «បេក្ខជនប្រធានាធិបតី ដែលមានការគិតគូរវែងឆ្ងាយ» ម្នាក់ផងដែរ។ ក្រៅពីការសរសើរ លោក ត្រាំ នោះ កូរ៉េខាងជើងបែរមកធ្វើការមើលស្រាល លោកស្រី ហ៊ីលឡារី គ្លីនតុន ដោយហៅលោកស្រីថា «ល្ងីល្ងើ» ថែមទៀតផង៕</span></p>
<p><span style="color: #000000;"><img src="http://i.telegraph.co.uk/multimedia/archive/03545/donald-trump-kim-j_3545919b.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>