<p><span style="color: #000000;"><strong>(ភ្នំពេញ)៖</strong> អ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រាប់ក្រុមអ្នកសារព័ត៌មានថា លោក អ៊ូ វីរៈ ប្រធានវេទិកាអនាគត បានប្រើសិទ្ធិក្នុងការបញ្ចេញមតិរបស់ខ្លួន នៅក្រៅក្របខណ្ឌ ដែលច្បាប់បានកំណត់ ហើយប៉ះពាល់ដល់អ្នកដទៃ។</span></p>
<p><span style="color: #000000;">លោក សុខ ឥសាន បានបញ្ជាក់បែបនេះ បន្ទាប់ពីលោកបានចូលផ្តល់ចម្លើយ និងភស្តុតាងជូន តុលាការក្រុងភ្នំពេញ នាព្រឹកថ្ងៃទី០៦ ខែឧសភា ឆ្នាំ២០១៦នេះ ជុំវិញការដាក់ពាក្យប្តឹង លោក អ៊ូ វីរៈ ពីបទបរិហារកេរ្តិ៍គណបក្សប្រជាជនកម្ពុជា តាមរយៈប្រព័ន្ធផ្សព្វផ្សាយ។</span></p>
<p><span style="color: #000000;">ឆ្លើយនឹងសំណួរអ្នកសារព័ត៌មាន លោក សុខ ឥសាន្ត បានលើកយកទិដ្ឋភាពច្បាប់មកបង្ហាញថា <strong>«ប្រជាពលរដ្ឋ មានសិទ្ធិក្នុងការបញ្ចេញមតិ ក្នុងការសរសេរ ក្នុងការនិពន្ធផ្សេងៗ ហើយសិទ្ធិនេះ មិនត្រូវឱ្យប៉ះពាល់ដល់សិទ្ធិអ្នកដទៃទេ អញ្ចឹងគាត់ (លោក អ៊ូ វីរៈ) បានបញ្ចេញសិទ្ធិនេះ ក្រៅក្របខណ្ឌ ដេលច្បាប់បានកំណត់ គឺច្បាប់មិនបានបញ្ជាក់ថា ប្រជាពលរដ្ឋគ្រប់រូប មានសិទ្ធិបរិហារកេរ្តិ៍គេនោះទេ»</strong>។</span></p>
<p><span style="color: #000000;">លោកបានបន្ថែមថា <strong>«អ្វីដែលច្បាប់មិនបានកំណត់ គាត់មិនត្រូវធ្វើនោះទេ ប៉ុន្តែបើគាត់ធ្វើនោះមានន័យថា គាត់រំលោភច្បាប់ និងសិទ្ធិអ្នកដទៃ»</strong>។</span></p>
<p><span style="color: #000000;">កាលពីថ្ងៃទី២៥ ខែមេសា ឆ្នាំ២០១៦ គណបក្សប្រជាជនកម្ពុជា តំណាងដោយលោក សុខ ឥសាន បានដាក់ពាក្យប្តឹង លោក អ៊ូ វីរៈ ប្រធានវេទិកាអនាគត ទៅសាលាដំបូងរាជធានីភ្នំពេញពីបទបរិហារកេរ្តិ៍ជាសាធារណៈ ដោយទាមទារសំណងប៉ះពាល់ដល់គណបក្ស ចំនួន៤០០លានរៀល។</span></p>
<p><span style="color: #000000;">ដើមហេតុដែលឈានដល់ការដាក់ពាក្យប្តឹងអ្នកវិភាគរូបនេះ ត្រូវបានមន្រ្តីគណបក្សប្រជាជនបញ្ជាក់ថា ដោយសារតែ លោក អ៊ូ វីរៈ បាននិយាយ វាយប្រហារមកលើគណបក្សប្រជាជនកម្ពុជា តាមរយៈវិទ្យុអាស៊ីសេរី ចំពោះករណីស្នេហារវាង លោក កឹម សុខា និង កញ្ញា ខុម ចាន់តារាទីហៅស្រីមុំ ដែលថាគណបក្សប្រជាជនបានព្យាយាមសង្កត់បក្សប្រឆាំង តាមមធ្យោបាយនេះ។</span></p>
<p><span style="color: #000000;">លោក សុខ ឥសាន បាននិយាយថា គណបក្សប្រជាជនកម្ពុជា មិនបានទៅពាក់ព័ន្ធនឹងរឿងបុគ្គល ដូចដែលលោក អ៊ូ វីរៈ លើកឡើងនោះទេ។</span></p>
<p><span style="color: #000000;">ទោះជាយ៉ាងនេះក្តី តាមបណ្តាញសារព័ត៌មានមួយចំនួន លោក អ៊ូ វីរៈ ប្រធានវេទិកាអនាគតកម្ពុជា ដែលរងនូវពាក្យបណ្តឹងនេះ បានអះអាងថា លោកនឹងចូលបំភ្លឺតាមការកោះហៅរបស់តុលាការ នៅថ្ងៃទី១២ ខែឧសភា ឆ្នាំ២០១៦ ខាងមុខនេះ៕</span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>