<p><span style="color: #000000;"><strong>(ភ្នំពេញ)៖</strong> ពិតជាអាងអំណាច អាងទ្រព្យសម្បត្តិ និងធ្វើទាំងបំពានច្បាប់មែនជនទំនើងម្នាក់ បើករថយន្តសេរីខ្ពស់ ម៉ាក Audi ពណ៌ស ពាក់ស្លាកលេខ ភ្នំពេញ 2AH-3988 បានបើកបុកម៉ូតូគេហើយ មិនព្រមទុកឲ្យសមត្ថកិច្ចដែលជាមន្រ្តីនគរបាលយុត្តិធម៌ដោះស្រាយជូន បែរជាអូសម៉ូតូជនរងគ្រោះយកទៅបង្ខាំងទុកក្នុងផ្ទះ ហើយបញ្ជាឲ្យសន្តិសុខបិទទ្វាររបងទៀតផង។</span></p>
<p><span style="color: #000000;">អំពើដ៏ល្មើសច្បាប់ និងអាងខ្លួនមានអំណាច ធ្វើបាបអ្នកទន់ខ្សោយនេះបានកើតឡើង នៅយប់ថ្ងៃទី៤ ខែធ្នូ ឆ្នាំ២០១៦នេះ ស្ថិតនៅតាមផ្លូវ២០០៤ ទល់មុខបុរី អូរគីដេរ សង្កាត់ទឹកថ្លា ខណ្ឌសែនសុខ។</span></p>
<p><span style="color: #000000;">ជាមួយគ្នានេះ ជនរងគ្រោះសូមអំពាវនាវដល់នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញជួយអន្តរាគមន៍ផង ពីព្រោះសូម្បីតែមន្រ្តីនគរបាល មូលដ្ឋាន និងមន្រ្តីនគរបាលចរាចរណ៍ទៅដល់ទីនោះ ក៏ម្ចាស់រថយន្ត មិនព្រមទុកឲ្យសមត្ថកិច្ចដោះស្រាយបែរ អូសម៉ូតូរបស់ជនរងគ្រោះចូលទៅក្នុងផ្ទះ ធ្វើព្រងើយ ហើយគំរាមទារប្រាក់ពីជនរងគ្រោះចំនួន១ពាន់ដុល្លារ ទើបឲ្យម៉ូតូវិញ។</span></p>
<p><span style="color: #000000;">ភ្នាក់ងារ Fresh News បានរាយការណ៍ថា មុនពេលកើតហេតុជនរងគ្រោះបើកម៉ូតូម៉ាក C125 មួយគ្រឿង តាមផ្លូវ២០០៤ ពីពោធិ៍ចិនតុង មកភ្លើងស្តុប ណូគា ស្រាប់តែដល់មុខបុរី អូរគីដេរ រថយន្តសេរីទំនើបនេះ បានបត់ចូលផ្ទះក្នុងបុរី ស្រាប់ទៅបុកជនរងគ្រោះបណ្តាលឲ្យដួល ហើយរថយន្តបែកអំពូលខាងមុខ ស្ថិតនៅខាងក្រោម។</span></p>
<p><span style="color: #000000;">ពេលនោះម្ចាស់រថយន្ត បានចេញពីផ្ទះមកសម្លុតជនរងគ្រោះឲ្យសងថ្លៃស្តុប ចំនួន១ពាន់ដុល្លារ ប៉ុន្តែបើយោងតាមមន្រ្តីនគរបាលមើល ពីទិដ្ឋភាពគ្រោះថ្នាក់នេះបាននិយាយថា រថយន្តជាអ្នកខុស ព្រោះម៉ូតូស្ថិតនៅលើផ្លូវធំ។</span></p>
<p><span style="color: #000000;">តែអ្វីដែលហួសចិត្តនោះ ពេលកម្លាំងសមត្ថកិច្ចទៅជួយដោះស្រាយបែរជាម្ចាស់រថយន្ត មិនព្រមប្រគល់ម៉ូតូមកឲ្យសមត្ថកិច្ច បែរជាអូសយកទៅទុកក្នុងផ្ទះធ្វើព្រងើយ ហើយបញ្ជាឲ្យសន្តិសុខបិទទ្វាររបងទៀតផង។ សូម្បីរថយន្តរបស់នគរបាលចរាចរបានទៅដឹកម៉ូតូ និងនាំរថយន្ត ទៅដោះស្រាយនៅអធិការដ្ឋាន នគរបាលខណ្ឌសែនសុខ តែម្ចាស់រថយន្ត បានបញ្ជាឲ្យនគរបាលបើករថយន្តទៅវិញដោយមិនព្រមអោយម៉ូតូនោះទេ។</span></p>
<p><span style="color: #000000;">ជនរងគ្រោះសូមអំពាវនាវឲ្យនាយឧត្តមសេនីយ៍ស្នងការ និងថ្នាក់ដឹកនាំពាក់ព័ន្ធជួយអន្តរាគមន៍ផង ក្រោយពីជនមានអំណាចធ្វើបាបអ្នកទន់ខ្សោយបែបនេះ។</span></p>
<p><span style="color: #000000;"><strong>ករណីគ្រោះថ្នាក់ចរាចរណ៍ខាងលើនេះ ត្រូវបានក្រុមអ្នកច្បាប់បានអះអាងថា គ្រោះថ្នាក់ចរាចរណ៍ហើយ យកម៉ូតូរបស់គេចូលទៅផ្ទះ ឬទីតាំងរបស់ខ្លួនឃាំងទុក ដោយមិនឲ្យកម្លាំងសមត្ថកិច្ច និងជនរងគ្រោះចូលយក អាចចាត់ទុកថា ជាអំពើប្លន់ទ្រព្យសម្បត្តិ ជាករណីបទល្មើសព្រហ្មទណ្ឌ៕</strong></span></p>
<p><span style="color: #000000;"><iframe src="https://www.facebook.com/plugins/video.php?href=https%3A%2F%2Fwww.facebook.com%2Ffreshnewsasia%2Fvideos%2F649732365198558%2F&show_text=0&width=560" frameborder="0" width="500" height="415"></iframe></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-04-10-04-41-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-04-10-53-39-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-04-10-04-41-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-04-10-04-42-2.jpg" alt="" width="730" /></span></p>
<p> </p>
<p><span style="color: #000000;"><img src="http://image.freshnewsasia.com/2016/019/05/fn-2016-12-04-10-04-42-3.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-04-10-04-42-4.jpg" alt="" width="730" /></span></p>
<p><span style="color: #000000;"><strong>ជនរងគ្រោះ ដែលជាម្ចាស់ម៉ូតូ ឈរក្បែររថយន្តនគរបាលចរាចរណ៍</strong></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-05-07-56-56-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-05-07-56-56-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-05-07-56-56-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-05-07-56-56-3.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>