<p><span style="color: #000000;">ភ្នំពេញ៖ អង្គការសមាគមអភិរក្សសត្វព្រៃ WCS និងរដ្ឋបាលជលផល គ្រោងនឹងលែងសត្វកូនកន្ធាយក្បាលកង្កែប ឬល្មិច ចំនួន២០០ក្បាល ចូលទៅក្នុងទន្លេមេគង្គ ក្នុងភូមិសាស្រ្តឃុំកំពង់ចាម ស្រុកសំបូរ ខេត្តក្រចេះ នៅចុងសប្តាហ៍នេះ ខណៈដែលសត្វនេះត្រូវបានចាត់ទុកជាប្រភេទសត្វជិតផុតពូជ ដោយសារកត្តាគំរាមកំហែងពីមនុស្ស និងធម្មជាតិ។</span></p>
<p><span style="color: #000000;">ប្រធានផ្នែកទំនាក់ទំនងនៃអង្គការសមាគមអភិរក្សសត្វព្រៃ លោក ល័ក្ខ រតនា (Leak Ratna) បានឲ្យដឹងកាលពីថ្ងៃម្សិលមិញថា បច្ចុប្បន្ន សត្វកន្ធាយកង្កែប ត្រូវបានចាត់ចូលក្នុងបញ្ជីក្រហមរបស់អង្គការ IUCN ជាប្រភេទសត្វជិតផុតពូជ ដោយសារតែប្រជាពលរដ្ឋនៅតាមតំបន់មួយចំនួន បានចាប់យកសត្វប្រភេទនេះ យកទៅធ្វើជាអាហារ និងជួញដូរឆ្លងប្រទេសជាដើម។</span></p>
<p><span style="color: #000000;">លោកថា៖ «អីចឹងហើយបានជាខាងអង្គការ WCS សហការជាមួយរដ្ឋបាលជលផលកម្ពុជាយើង ធ្វើការអភិរក្សសត្វកន្ធាយក្បាលកង្កែបនេះឡើងវិញ តាមរយៈការការពារសំបុកពងរបស់វា និងយកទៅលែងក្នុងទម្លេមេគង្គជាដើម ដើម្បីកុំឲ្យវាផុតពូជ»។</span></p>
<p><span style="color: #000000;">បើតាម លោក រតនា កូនកន្ធាយក្បាលកង្កែបទាំង ២០០ក្បាល ដែលគ្រោងលែងនៅថ្ងៃសៅរ៍នេះ ជាកូនកន្ធាយដែលបានមកពីការរុករកឃើញ និងកិច្ចខិតខំប្រឹងប្រែងក្នុងការថែរក្សាការពារសំបុកពងរបស់វា ពីសំណាក់មន្ត្រី WCS និងរដ្ឋបាលជលកម្ពុជា។ លោកថា៖ «យើងមានបង្កើតជាក្រុមការងារដើម្បីដើរស្វែងរកសំបុកពងសត្វកន្ធាយនេះនៅតាមឆ្នេរខ្សាច់នៃដងទន្លេមេគង្គ អីចឹងពេលដែលឃើញហើយ យើងដាក់កម្លាំងការពារទាំងយប់ទាំងថ្ងៃ ដើម្បីឲ្យកូនកន្ធាយនឹងវាកើត ហើយពេលដែលវាកើតហើយ យើងមើលថែទាំវាក្នុងទ្រុងរហូតដល់បានច្រើនហើយ បានយើងលែងវាចូលទៅក្នុងទន្លេវិញ។</span></p>
<p><span style="color: #000000;">ការលែងសត្វកូនកន្ធាយក្បាលកង្កែបនេះ ធ្វើឡើងស្របពេលដែលពិភពលោក នឹងប្រារព្ធទិវាអណ្តើកពិភពលោក នៅថ្ងៃទី២៣ខែឧសភានេះ។ </span></p>
<p><span style="color: #000000;"><a class="thickbox" title="" href="/FileManager/Commons/2019/5/21/1-21-05-2019--13-42-00.PNG"><img src="/FileManager/Articles/mce/2019/5/21/1-21-05-2019--13-42-00.PNG" alt="" /></a><br /></span></p>
<p><span style="color: #000000;">លោក រតនា បានបន្ថែមថា៖ «កម្មវិធីនេះ ក៏ជាការផ្ញើសារដល់សាធារណជនចូលរួមអភិរក្សទាំងអស់គ្នា ព្រោះសត្វកន្ធាយក្បាលកង្កែបនេះជាសម្បត្តិរបស់ជាតិ ជាពិសេសក៏សូមឲ្យប្រជាពលរដ្ឋនៅតាមតំបន់មូលដ្ឋានដែលសត្វកន្ធាយរស់នៅ ឲ្យគាត់យល់ដឹងថា កន្ធាយក្បាលកង្កែបនេះ កំពុងតែប្រឈមនឹងការគំរាមកំហែងខ្លាំងមែនទែន ដោយសារមានក្រុមមនុស្សឆ្លៀតឱកាសធ្វើអាជីវកម្មលើសត្វកន្ធាយ ដោយយកទៅលក់ជួញដូរនៅតាមអាហារដ្ឋាន និងជួញដូរទៅក្រៅប្រទេសជាដើម។</span></p>
<p><span style="color: #000000;">ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល លោកអេង ជាសាន ពុំអាចសុំការអត្ថាធិប្បាយជុំវិញករណីនេះបានទេ កាលពីថ្ងៃម្សិលមិញ។</span></p>
<p><span style="color: #000000;">បើតាម WCS សត្វកន្ធាយក្បាលកង្កែប ឬល្មិច ត្រូវបានក្រុមអភិរក្សស្រាវជ្រាវរកឃើញសារជាថ្មីក្នុងអំឡុងឆ្នាំ២០០៧ នៅតាមបណ្តោយទន្លេមេគង្គចម្ងាយប្រមាណ ៤៨គីឡូម៉ែត្រ ដែលលាតសន្ធឹងពីខេត្តក្រចេះដល់ខេត្តស្ទឹងត្រែង។កាលពីខែមេសា ក្រុមអ្នកអភិរក្សសត្វព្រៃរបស់អង្គការ WCS និងមន្ត្រីរដ្ឋបាលជលផល ក៏បានលែងកូនកន្ធាយក្បាលកង្កែបនេះជាង ៥០០ក្បាល ចូលទៅក្នុងទន្លេមេគង្គនៃខេត្តក្រចេះនេះផងដែរ ដែលគិតចាប់តាំងពីឆ្នាំ២០០៧ មកដល់ដើមឆ្នាំនេះ សត្វប្រភេទនេះត្រូវបានលែងជាង ១០០០ក្បាលទៅក្នុងទឹកទន្លេដែលជាជម្រកធម្មជាតិរបស់វា ៕</span></p>
<p><span style="color: #000000;"><a class="c_tab" href="https://www.khmertimeskh.com/" target="_blank"><img src="/FileManager/Articles/mce/2019/5/21/khmertime-21-05-2019--13-42-12.png" alt="" /></a><br /></span></p>
<p style="text-align: right;"><span style="color: #000000;">ប្រភព ៖ khmertimes </span></p>