<p><span style="color: #000000;"><strong>(ភ្នំពេញ)៖</strong> យុវតីពិការដៃទាំង២ឈ្មោះ អ៊ិត ស្រីណប់ បានឆ្លើយតបទៅអ្នកលេងបណ្ដាញសង្គម Facebook ថា នាងជាបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) តាំងពីឆ្នាំ ២០១៥មកម៉្លេះ ដែលកាលនោះ នាងប្រឡងជាប់ទន្ទេស E មិនមែនដូចអ្វីដែលអ្នកលេង Facebook បង្ហោះចែកចាយនាពេលនេះថា នាងជាបេក្ខជនប្រឡងបាក់ឌុបឆ្នាំ ២០១៦នេះ ដោយទទួលបាននិទ្ទេស A នោះឡើយ។</span></p>
<p><span style="color: #000000;">យុវតី អ៊ិត ស្រីណប់ បានប្រាប់អង្គភាព Fresh News នៅរសៀលថ្ងៃទី១៣ ខែកញ្ញា ឆ្នាំ២០១៦នេះថា បន្ទាប់ក្រសួងអប់រំ យុវជន និងកីឡា បានប្រកាសលទ្ធប្រឡងបាក់ឌុប ជាផ្លូវការសម្រាប់ឆ្ នាំ២០១៦នេះ ស្រាប់តែមានអ្នកលេង Facebook មួយចំនួនធំ បានយករូបរបស់នាងទៅចែកចាយ ដោយបានសរសេរថា នាងប្រឡងបាននិទ្ទេស A ដូចនេះហើយទើប នាងបានបកស្រាយយ៉ាងច្បាស់ ដើម្បីកុំឲ្យមានការយល់ច្រឡំ និងមានជនខិលខូចមួយចំនួនយករូបរបស់នាងទៅធ្វើអាជីវកម្ម ទំនងចង់យកប្រយោជន៍ផ្ទាល់ខ្លួន (អាចប្រើរូបនាងទៅសុំការជួយឧបត្ថម្ភពីអ្នកផ្សេង)។</span></p>
<p><span style="color: #000000;">នាងបញ្ជាក់យ៉ាងដូច្នេះថា<strong> «គេដាក់ខ្ញុំថា បាននិទ្ទេស A ហើយព័ត៌មាននេះវាមិនពិត ខ្ញុំមិនចង់ឲ្យគេនិយាយថា ខ្ញុំជាមនុស្សពិការហើយ ទៅនិយាយព័ត៌មានមិនពិតដើម្បីបោកប្រាស់គេ ដោយពីមុនដំបូងមាន Page មួយបានផុសថា នាងខ្ញុំប្រឡងទទួលបាននិទ្ទេស A ហើយឆ្នាំហ្នឹងទៀត នេះវាខុសពីការពិតទាំងអស់ ខ្ញុំខ្លាចតែគេយករូបខ្ញុំទៅដើម្បីចង់បានប្រយោជន៍អ្វីមួយ ក្នុងការបោកប្រាស់មហាជន»</strong>។</span></p>
<p><span style="color: #000000;">ជាចុងក្រោយ យុវតី អ៊ិត ស្រីណប់ សូមសំណូមពរដល់អ្នកលេង Facebook ទាំងអស់ថា សូម Share ព័ត៌មានអ្វីដែលជាការពិត ដើម្បីកុំឲ្យមហាជនភ័ន្ដប្រឡំ ហើយចោទនាងថា ជាអ្នកបោកប្រាស់គេអី។</span></p>
<p><span style="color: #000000;">សូមបញ្ជាក់ថា យុវតី អ៊ិត ស្រីណប់ ជាកូនកំព្រាឪពុក មានស្រុកកំណើតនៅភូមិពាមជំនិត ឃុំវិហារហ្លួង ស្រុកពញ្ញាឮ ខេត្តកណ្តាល បច្ចុប្បន្ន ជានិស្សិតរៀននៅសកលវិទ្យាល័យភូមិន្ទភ្នំពេញ ផ្នែក IT ហើយការបន្ដសិក្សានេះ ស្ថិតនៅក្រោមការឧបត្ថម្ភទាំងស្រុង ដោយលោករដ្ឋមន្ដ្រីក្រសួងធនធានទឹក និងឧតុនិយម លឹម គានហោ និងជាប្រធានគណៈពង្រឹងស្រុកពញាឮ៕</span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-09-13-15-11-57-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>