<p><span style="color: #000000;"><strong>(ភ្នំពេញ)៖</strong> រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន នៅថ្ងៃទី០៣ ខែសីហានេះ ក្នុងសន្និសីទសារព័ត៌ស្តីពីការប្រឡង សញ្ញាបត្រមធ្យមសិក្សាទុតិយភូមិ បានថ្លែងបំភ្លឺជុំវិញការអនុញ្ញាត ឲ្យមានការសាងសង់សាលារៀនភាសាវៀតណាមមួយកន្លែង ក្នុងខេត្តបាត់ដំបង ដោយលោករដ្ឋមន្ត្រីលើកឡើងថា នៅកម្ពុជាមានជនជាតិច្រើន មិនមែនមានតែជនជាតិវៀតណាមនោះទេ ហើយសាលារៀនភាសាបរទេសក៏មានច្រើនដែរ។</span></p>
<p><span style="color: #000000;">លោករដ្ឋមន្ត្រីបានឱ្យដឹងថា កម្ពុជាមិនមែនមានតែជនជាតិវៀតណាមនោះទេ គឺមានតាំងពីជនជាតិភាគតិច ជនជាតិចិន ជនជាតិចាម។ ចំពោះសាលារៀន ក៏មិនមែនមានតែសាលារៀនវៀតណាមនោះឡើយ គឺមានទាំងសាលារៀនចិន ដូចជាសាលាខុងជឺ, មានសាលាជនជាតិខ្មែរ-ឥស្លាម ដែលមានបង្រៀនអក្សរ និងភាសាពួកគេ ចំណែកសាលាសម្រាប់ជនជាតិភាគតិច ក៏មានបង្រៀនជាភាសាជនជាតិភាគតិចដែរ។</span></p>
<p><span style="color: #000000;">លោកថា<strong> «បច្ចុប្បន្នកម្ពុជា ទើបតែមានសាលាវៀតណាមតែមួយទេ មិនដូចសាលាជនជាតិភាគតិចមានចំនួន២០០សាលា ហើយសាលាចិន ក៏មិនតិចជាង១០០ដែរ ដូច្នេះខ្ញុំចង់បំភ្លឺរឿងហ្នឹង»</strong>។</span></p>
<p><span style="color: #000000;">ជាមួយគ្នានេះ លោក ហង់ ជួនណារ៉ុន បានបញ្ជាក់ថា បើជនជាតិវៀតណាមជាពលរដ្ឋខុសច្បាប់ ក៏មិនអាចចុះឈ្មោះចូលរៀនបានទេ ពីព្រោះការចុះឈ្មោះចូលរៀននេះ សិស្សត្រូវមានសៀវភៅគ្រួសារ ហើយដើម្បីទទួលបានសៀវភៅគ្រួសារ ពួកគេចាំបាច់ត្រូវមានអត្តសញ្ញាណប័ណ្ណសញ្ជាតិខ្មែរ ទើបអាចធ្វើបាន៕</span></p>
<p> </p>
<p><iframe style="border: none; overflow: hidden;" src="https://www.facebook.com/plugins/video.php?href=https%3A%2F%2Fwww.facebook.com%2Fmoeys.gov.kh%2Fvideos%2F1438200606206549%2F&show_text=0&width=400" frameborder="0" width="500" height="400"></iframe></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>