<p><span style="color: #000000;"><strong>(ភ្នំពេញ)៖</strong> ជនទំនើងមួយក្រុម មានទាំងនគរបាលស្លៀកឯកសណ្ឋាន ២នាក់ទៀត បានស្ពាយកាំភ្លើង AK ហើយស្រែកថា<strong> «អញមកពីអគ្គ...»</strong> ជិះម៉ូតូណៃហតពាក់ស្លាកលេខ នគរបាល1-1637 មកគំរាមបាញ់រះទៅភ្ញៀវ ដែលជាគូជម្លោះនៅក្នុងហាងផឹកស៊ី ពេលរាត្រីយីហោ THE CORNER មានទីតាំងស្ថិតនៅតាមបណ្តោយផ្លូវលេខ១៣៦ កែងផ្លូវលេខ៥ សង្កាត់ផ្សារកណ្តាលទី១ ខណ្ឌដូនពេញ នៅវេលាម៉ោង១៖២០នាទី យប់រំលងអាធ្រាត្រា ឈានចូលថ្ងៃទី១៦ ខែកក្កដា ឆ្នាំ២០១៦។</span></p>
<p><span style="color: #000000;">ហេតុការណ៍ខាងលើនេះ បានធ្វើឲ្យទាំងម្ចាស់ហាង និងភ្ញៀវ ព្រមទាំងប្រជាពលរដ្ឋនៅក្បែរហាងមួយនេះ ភ័យឡើងព្រលឹងចុងសក់ ទៅហើយ។</span></p>
<p><span style="color: #000000;">សាក្សីដែលបានឃើញហេតុការណ៍ផ្ទាល់ភ្នែក បានឲ្យដឹងថា<strong> «នៅយប់មិញនេះ ស្ថិតនៅហាង THE CORNER ដែលជាតំបន់ភ្ញៀវ ទេសចរណ៍ ឆ្លងកាត់ស្ទើរទល់ភ្លឺនោះ ស្រាប់តែមានជនទំនើងពីរនាក់ជិះម៉ូតូ ម៉ាកសេ១២៥ ស្លាកលេខ ភ្នំពេញ1AF-7604 បានមកផឹកក្នុងហាងខាងលើ។ បន្ទាប់ពីផឹកស្រវឹងពួកគេក៏បញ្ចេញ សកម្មភាពច្រងេងច្រងាង ធាក់តុកៅអី ស្រែកឡូឡា ចង់បង្កហិង្សាជាមួយភ្ញៀវ ដែលផឹកស៊ីក្បែរគ្នា ពេលនោះម្ចាស់ហាងក៏ទៅឃាត់និយាយ លួងលោមដើម្បីកុំឲ្យមានជម្លោះ ធ្ងន់ធ្ងរក៏ជនទាំងនោះក៏ជិះម៉ូតូចេញទៅ»</strong>។ </span></p>
<p><span style="color: #000000;">សាក្សីបានបន្តទៀតថា មួយសន្ទុះក្រោយមកគេបាននាំបក្ខពួកជាប៉ូលិស មានទាំងឯកសណ្ឋាន និងជិះម៉ូតូណៃហត ស្លាកលេខ នគរបាល 1-1637 មកស្រែកឡូឡាពេញមុខហាង រកវាយម្ចាស់ហាង និងដកកាំភ្លើងម៉ាក AK ពីបក្ខពួកបម្រុងបាញ់រះមកលើភ្ញៀវ ទេសចរណ៍នៅបរិវេណខាងក្រៅហាង ថែមទាំងស្រែកថា <strong>«អញមកពីអគ្គ... ហ្ហែងឆាប់ហៅភ្ញៀវមកលត់ជង្គង់ សុំទោសអញភ្លាម បើមិនចឹងទេអញបាញ់ងាប់ទាំងអស់ ហាងហ្ហែងនឹងបិតឆាប់ៗ...»</strong>។</span></p>
<p><span style="color: #000000;">ពេលនោះ ម្ចាស់ហាងខំសម្រួលអង្វរយ៉ាងណា ក៏ជនពាក់អាវក្រឡាការ៉ូនោះមិនស្តាប់ដែរ ហើយថែមទាំងរកវាយទៀតផង ដោយមាន មនុស្សចោមរោមមើលច្រើន ជនទំនើងទាំងនោះបាននាំគ្នាជិះម៉ូតូចេញទៅបាត់ ដោយបន្សល់ពាក្យគម្រាមថា <strong>«ចាំតិចទៀតអញមក, ប្រយ័ត្នខ្លួនពួកហ្ហែង..»</strong>។</span></p>
<p><span style="color: #000000;">យ៉ាងណាក៏ដោយ គេមិនដឹងថា តើជនទំនើងនិងនគរបាលដែលជិះម៉ូតូ ណៃហតនោះ បម្រើនៅអង្គភាពណានោះឡើយប៉ុន្តែសម្រាប់ ថ្នាក់នាំនៅតាមអង្គភាពនីមួយៗ នឹងដឹងប្រាកដ នៅពេលឃើញស្លាកលេខម៉ូតូទាំងនេះ៕</span></p>
<p><span style="color: #000000;"><img src="http://image.freshnewsasia.com/2016/099/fn-2016-07-16-09-47-00-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/099/fn-2016-07-16-09-47-00-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/099/fn-2016-07-16-09-47-00-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/099/fn-2016-07-16-09-47-00-3.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>