<p><span style="color: #000000;"><strong>(ភ្នំពេញ)៖</strong> រដ្ឋមន្រ្តីក្រសួងសុខាភិបាល លោក ម៉ម ប៊ុនហេង បានព្រមានចាត់វិធានការ និងស្រាវជ្រាវយ៉ាងយកចិត្តទុកដាក់ ចំពោះគ្រូពេទ្យជនជាតិចិនម្នាក់ និយាយភាសាខ្មែរប៉ៃឡាំៗ ដែលធ្លាប់វះកាត់ស្រ្តីខ្មែរម្នាក់ ស្លាប់នៅក្រុងពោធិ៍សាត់ ស្រាប់តែនៅពេលនេះ លួចទៅបើកគ្លីនិកថ្មីមួយទៀត នៅទីរួមខេត្តកំពង់ធំ។</span></p>
<p><span style="color: #000000;">ថ្លែងប្រាប់អង្គភាព Fresh News នៅរសៀលថ្ងៃទី១៧ ខែកុម្ភៈ ឆ្នាំ២០១៧នេះថា លោកនឹងឲ្យមានការស៊ើបអង្កេត ស្រាវជ្រាវ និងចាត់វិធានការយ៉ាងយកចិត្តទុកដាក់ ចំពោះករណីនេះ មិនបណ្តោយឲ្យកើតមានឡើងខុសច្បាប់ទៀតនោះទេ។</span></p>
<p><span style="color: #000000;">ការព្រមានបែបនេះ របស់លោករដ្ឋមន្រ្តីក្រសួងសុខាភិបាល បានកើតឡើង នៅពេលមានព័ត៌មានថា លោកគ្រូពេទ្យជនជាតិឈ្មោះ វ៉ាន់ ចាន់ជូ ភេទប្រុស អាយុ៥២ឆ្នាំ បានលួចទៅបើកគ្លីនិកមួយទៀត នៅក្រុងស្ទឹងសែន ខេត្តកំពង់ធំ ដោយមានយីហោ <strong>«មន្ទីរសម្រាកព្យាបាល ក្រុងស្ទឹងសែន»</strong> ប៉ុន្តែមិនទាន់មានច្បាប់ពេញលេញនៅឡើយទេ។</span></p>
<p><span style="color: #000000;">សូមបញ្ជាក់ថា គ្រូពេទ្យស្ទើរភ្លើងជាជនជាតិចិនម្នាក់ ដែលធ្លាប់បើកគ្លីនិក គ្មានច្បាប់អនុញ្ញាត នៅក្នុងក្រុងពោធិ៍សាត់ ហើយបានវះកាត់ ស្ត្រីម្នាក់ស្លាប់ កាលពីឆ្នាំ២០១៥ ឥឡូវនេះ បានវេចបង្វេចបាយ គេចខ្លួនមកបន្តបើកគ្លីនិកគ្មានច្បាប់ អនុញ្ញាតមួយទៀតដាក់ឈ្មោះថា «មន្ទីរសម្រាកព្យាបាល ក្រុងស្ទឹងសែន» ក្នុងខេត្តកំពង់ធំវិញម្តង។</span></p>
<p><span style="color: #000000;">សមត្ថកិច្ចខេត្តពោធិ៍សាត់ ឲ្យបានដឹងថា គ្រូពេទ្យគ្មានបទពិសោធន៍ច្បាស់លាស់នេះមានឈ្មោះ វ៉ាន់ ចាន់ជូ ភេទប្រុស អាយុ៥២ឆ្នាំ មានស្រុកកំណើតនៅខេត្តហេណាន ប្រទេសចិន ចេះនិយាយភាសារខ្មែរបន្តិចបន្តួច បានមកបើកគ្លីនិកព្យាបាលអ្នកជំងឺ នៅក្នុងក្រុងពោធិ៍សាត់ នៅចំណុចផ្ទះល្វែងទល់មុខសណ្ឋាគារ KM ប្រមាណពី៤ ទៅ៥ឆ្នាំកន្លងទៅ តែគ្មានច្បាប់អនុញ្ញាតអ្វីនោះទេ។</span></p>
<p><span style="color: #000000;">សមត្ថកិច្ចបានបន្តថា កាលពីថ្ងៃទី១៩ ខែមករា ឆ្នាំ២០១៥ គ្រូពេទ្យចិននោះ បានវះកាត់ដៃស្បូនស្ត្រីរងគ្រោះឈ្មោះ ស៊ឹង ចាន់ធឿន អាយុ៣២ឆ្នាំ មានកូនស្រី៤នាក់ រស់នៅភូមិសាន្តស ឃុំអន្សារចំបក់ ស្រុកក្រគរ បណ្តាលឲ្យស្លាប់រួចរត់គេចខ្លួនបាត់ទៅ។ ស្រាប់នៅពេលនេះ ទើបតែឮដំណឹងថា បានគេចខ្លួនមកបន្តបើគ្លីនិកគ្មានច្បាប់អនុញ្ញាតមួយទៀតឈ្មោះ «មន្ទីសម្រាកព្យាបាល ក្រុងស្ទឹងសែន» ក្នុងខេត្តកំពង់ធំទៅវិញ។</span></p>
<p><span style="color: #000000;">លោក ទី ធីរ៉ាវុធ អនុប្រធានមន្ទីរសុខាភិបាលខេត្តកំពង់ធំ បានឲ្យដឹងថា គ្រូពេទ្រចិន វ៉ាន់ ចាន់ជូ មិនទាន់មានឯកសារបញ្ជាក់គ្រប់គ្រាន់ សម្រាប់បើកគ្លីនិកនៅឡើយទេ។ លោក ទី ធីរ៉ាវុធ បានបញ្ជាក់ថា <strong>«ច្បាប់របស់ពេទ្យចិនមួយនេះ កំពុងរត់ច្បាប់ទៅដល់ក្រសួង សុខាភិបាលហើយ»</strong>។</span></p>
<p><span style="color: #000000;">សម្រាប់លោកគ្រូពេទ្យជនជាតិចិនរូបនេះ បានប្រាប់អ្នកយកព័ត៌មាន នៅល្ងាចថ្ងៃទី១៦ ខែកុម្ភៈថា លោកពិតជាអ្នកវះដៃស្បូន ស្ត្រីម្នាក់ស្លាប់ នៅខេត្តពោធិ៍សាត់ ពិតប្រាកដមែន កាលពីអំឡុងឆ្នាំ២០១៥។ កាលណោះលោកបានគេចខ្លួន តែរឿងនេះមាន សំណងដោះស្រាយដល់ជនរងគ្រោះចប់អស់ហើយ។ រីឯច្បាប់បើកគ្លីនិកនៅកំពង់ធំវិញលោក វ៉ាន់ ចាន់ជូ ថា បានចំណាយលុយ ច្រើនឲ្យទៅលោក ទី ធីរ៉ាវុធ អនុប្រធានមន្ទីរសុខាភិបាលខេត្ត រត់ការច្បាប់ ហើយមិនដឹងថាមិនទាន់បាននៅឡើយទេ៕</span></p>
<p><span style="color: #000000;"><img src="http://image.freshnewsasia.com/2017/028/fn-2017-02-17-11-09-34-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>