<p><span style="color: #000000;"><strong>ភ្នំពេញ៖</strong> ក្រសួងអប់រំយុវជន និងកីឡា បានប្រកាស តាមរយៈគេហទំព័រ Facebook ផ្លូវការរបស់ខ្លួនថា លទ្ធផល នៃការប្រឡងសញ្ញាបត្រ មធ្យមសិក្សាទុតិយភូមិ ឬបាក់ឌុប នោះ នឹងត្រូវប្រកាសនៅម៉ោង ៣រសៀលថ្ងៃទី១២ ខែ កញ្ញានេះហើយ សម្រាប់នៅមណ្ឌលរាជធានីភ្នំពេញ និង ខេត្តកណ្តាល។ ដោយឡែកបណ្តាខេត្តផ្សេងៗទៀត នឹងត្រូវប្រកាសលទ្ធផលនៅម៉ោង ៧ព្រឹកថ្ងៃទី១៣ ខែកញ្ញា។</span></p>
<p><span style="color: #000000;">សូមបញ្ជាក់ថា តាមការគ្រោងទុកលទ្ធផលប្រឡងនេះ នឹងត្រូវប្រកាសជាផ្លូវការនៅថ្ងៃទី១៥-១៦ ខែកញ្ញា តែត្រូវ បានប្តូរកាលបរិច្ឆេទមកផ្សាយនៅថ្ងៃទី១២-១៣ ខែកញ្ញា វិញ។ ការប្តូរកាលបរិច្ឆេទនេះ ត្រូវបានក្រសួងបញ្ជាក់ថា ដោយសារការត្រួតពិនិត្យ និង ផ្ទៀងផ្ទាត់ពិន្ទុ របស់បេក្ខជន បានប្រព្រឹត្តទៅប្រកបដោយភាពរលូនល្អ និង ពុំមាន បាតុភាពមិនប្រក្រតីណាមួយកើតឡើង ជាហេតុធ្វើឲ្យដំណើរការការងារទាំងស្រុងបញ្ចប់មុនការគ្រោងទុក។</span></p>
<p><span style="color: #000000;">ក្រសួងអប់រំ ក៏បានឲ្យដឹងផងដែរថា ការបោះពុម្ពផ្សាយលទ្ធផលប្រឡង ដែលចាប់ផ្តើមធ្វើឡើងនៅម៉ោង ៧ និង ៣០នាទីព្រឹកមិញនេះ ត្រូវបានចូលពិនិត្យ និងតាមដានយ៉ាងយកចិត្តទុកដាក់ ពីលោកទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ និងលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។</span></p>
<p><span style="color: #000000;">សូមបញ្ជាក់ថា ការប្រឡងបាក់ឌុបនៅឆ្នាំមានបេក្ខជនជិត ៩ម៉ឺននាក់។ បើតាមការបញ្ជាក់របស់អ្នកនាំពាក្យក្រសួង អប់រំ លោក រស់ សាលីន ធ្លាប់បានបញ្ជាក់ថា ការប្រឡងបាក់ឌុបក្រោមកំណែទម្រង់ដ៏ស៊ីជម្រៅរបស់លោក ហង់ ជូនណារ៉ុន នៅឆ្នាំនេះ មានលទ្ធផលល្អប្រសើរជាងឆ្នាំកន្លងទៅ ពោលមានអ្នកជាប់ច្រើន៕</span></p>
<p><span style="color: #000000;"><a class="thickbox" title="" href="/FileManager/Commons/2015/9/12/9-12-2015-11-56-31-am-12-09-2015--12-03-09.png"><span style="color: #000000;"><img src="/FileManager/Articles/mce/2015/9/12/9-12-2015-11-56-31-am-12-09-2015--12-03-09.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>