<div class="article-content">
<p><strong>ភ្នំពេញ៖</strong> កម្លាំងសមត្ថកិច្ចរាជធានីភ្នំពេញ ចេញប្រតិបត្តិការ រក្សាសណ្តាប់ធ្នាប់រាជធានីភ្នំពេញ ដោយ ឃាត់ខ្លួន ក្រុមសកម្មជនដីធ្លីបឹងកក់ ៥នាក់ រួមមានអ្នកស្រី យោម បុប្ផា, ទេព វណ្ណី, សុង ស្រីលាភ, បូ ឆវី និង អ្នកស្រី ប៊ុន ឈុនលាភ គ្រាដែលពួកគេប៉ុនប៉ងដង្ហែក្បួនតវ៉ាតាមដងផ្លូវសាធារណៈ។</p>
<p>ការឃាត់ខ្លួនបានធ្វើឡើងនាព្រឹកថ្ងៃចន្ទ ទី០៦ ខែមករា ឆ្នាំ២០១៤នេះ នៅក្បែរមន្ទីរពេទ្យកាល់ម៉ែត្រ ក្នុងសង្កាត់ ស្រះចក ខណ្ឌដូនពេញ គ្រាដែលក្រុមសកម្មជនដីធ្លី កំពុងប្រមូលផ្តុំគ្នាបំណងដង្ហែក្បួនតវ៉ា។</p>
<p>ក្រោយឃាត់ខ្លួន សកម្មជនដីធ្លីទាំង ៥នាក់ ត្រូវបានបញ្ជូនទៅឃុំខ្លួននៅស្នងការដ្ឋាននគរបាល រាជ ធានីភ្នំពេញ ដោយបក្ខពួកផ្សេងទៀត បានរត់គេខ្លួនបាត់អស់។</p>
<p>សូមបញ្ជាក់ថា នៅក្នុងប្រជុំបន្ទាន់មួយកាលពីល្ងាចថ្ងៃទី០៤ ខែមករា ឆ្នាំ២០១៤ អភិបាលរាជធានី ភ្នំពេញ លោក ប៉ា សុជាតិវង្ស បានបញ្ជាឱ្យបន្តបំបែកការប្រមូលផ្តុំបែបអាណាធិបតេយ្យ នៅតាម បណ្តាខណ្ឌ និងគ្រប់ចំណុច ទាំងអស់នៅក្នុងរាជធានីភ្នំពេញ។</p>
<p>លោកអភិបាល បានបញ្ជាក់ថា ការសម្រេចចិត្តបោសសំអាតរៀបចំរបៀបរៀបរយ លើក្រុមអ្នកតវ៉ា មិនមែនបិទមិនឱ្យពួកគាត់ធ្វើការតវ៉ារហូតនោះទេ គឺគ្រាន់តែផ្អាកជាបណ្តោះអាសន្នទប់ស្កាត់មួយ<br />រយះពេល ដើម្បីឱ្យស្ថាន ការណ៍នៅរាជធានីភ្នំពេញវិលទៅរកភាពប្រក្រតីឡើងវិញតែប៉ុណ្ណោះ៕</p>
<p style="text-align: center;"><img src="http://image.dap-news.com:81/dap-news/dap-images/2014/January/id-009/S-065.jpg" alt="" width="550" /></p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-39-55/78737-2014-01-06-02-13-25.html"><span style="color: #0000ff;">ដើមអំពិល</span></a></p>
</div>