<p><span style="color: #000000;"><strong>(សៀមរាប)៖</strong> សេចក្តីរាយការណ៍ពីសមត្ថកិច្ច និងមន្ទីរទេសចរណ៍ខេត្តសៀមរាប បានផ្ញើមកកាន់អង្គភាព Fresh News នៅយប់ថ្ងៃទី១២ ខែសីហា ឆ្នាំ២០១៦ឲ្យដឹងថា មានករណីបាត់ភ្ញៀវទេសចរណ៍បរទេសជនជាតិបារាំងមួយគ្រួសារ០៤នាក់ និងមគ្គុទ្ទេសទេសចរណ៍ម្នាក់ ដែលនៅលេងនៅរមណីដ្ឋានក្បាលស្ពាន នៅខេត្តសៀមរាប ហើយបានបាត់ដំណឹង តាំងពីរសៀលថ្ងៃសុក្រ រហូតដល់ពេលនេះ(យប់ថ្ងៃសុក្រ) នៅមិនទាន់រកឃើញនៅឡើយ។</span></p>
<p><span style="color: #000000;">ព័ត៌មានពីសមត្ថកិច្ចបានឲ្យដឹងទៀតថា ជនជាតិបារាំងមួយគ្រួសារនោះមាន៤នាក់ (ឳពុក,ម្តាយ និងកូនស្រី២នាក់ អាយុខ្ទង១៦-២០ឆ្នាំ) ស្នាក់នៅសណ្ឋាគារ Please Villa ស្ថិតនៅកែងផ្លូវសុខសាន្ត ក្រុងសៀមរាប។ ភ្ញៀវទេសចរណ៍នោះជាភ្ញៀវធួរ តាមរយៈក្រុមហ៊ុន ឥណ្ឌូឆាយណា។ ចំណែកអ្នកបើកឡានដឹកភ្ញៀវ និងមគ្គុទេស(អ្នកបកប្រែភាសាបារាំង) ទៅកាន់រមណីដ្ឋានក្បាលស្ពានោះ មានឈ្មោះ ម៉ៅ សុភាព កាន់លេខទូរស័ព្ទ ០៩៨ ២៩៨ ៥៦៨។</span></p>
<p><span style="color: #000000;"><strong>ព័ត៌មានពីសមត្ថកិច្ចសៀមរាប ដែលអង្គភាព Fresh News ទទួលបាននៅយប់ជ្រៅថ្ងៃសុក្រ បានរៀបរាប់ហេតុការណ៍ថា៖</strong></span></p>
<p><span style="color: #000000;">នៅម៉ោង០៧៖៣០នាទីព្រឹក អ្នកបើករថយន្តឈ្មោះ ម៉ៅ សុភាព បានដឹកភ្ញៀវ និងមគ្គុទ្ទេសទៅទស្សនារមណីដ្ឋានក្បាលស្ពាន ទៅដល់ម៉ោង០៩៖០០នាទី ភ្ញៀវ និងមគ្គុទ្ទេសបានកម្មង់បាយម្ហូបទុក នៅជើងភ្នំ រួចហើយបានប្រាប់ថា យ៉ាងយូរម៉ោង១៣៖០០នាទីរសៀល និងចុះមកញាំបាយវិញ លុះដល់ម៉ោង១២៖០០នាទីមគ្គុទេស បានទូរស័ព្ទប្រាប់ថា វង្វេងផ្លូវហើយតៃកុងឡានបានឲ្យជួបនគរបាលដែលប្រចាំការនៅខាងក្រោម និយាយបានបន្តិចក៏ដាច់ការទាក់ទង រហូតដល់ពេលនេះក៏នៅតែមិនឃើញ។ នៅពេលនេះទាំងនគរបាល និងឆ្មាំ កំពុងតែដើររក តែមិនទាន់មានដំណឹងនៅឡើយ៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/8/13/40-2-13-08-2016--08-15-03.png"><img src="/FileManager/Articles/mce/2016/8/13/40-2-13-08-2016--08-15-03.png" alt="" /></a><br /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>