<p><span style="color: #000000;"><strong>បរទេស៖</strong> ជារៀងរាល់ឆ្នាំ អំឡុងពិធីបុណ្យ ហាឡូវីន « Halloween» កៀកជិតចូលមកដល់ នៅតាមបណ្ដាប្រទេស លោកខាងលិច គេសង្កេតឃើញ តាមផ្ទះសម្បែង ឬហាងទំនិញនានា បានដាក់តាំងរូបគោម ធ្វើពីផ្លែល្ពៅ និងទីងមោង ជាដើម ដើម្បីត្រៀមប្រារព្ធពិធី បុណ្យនេះ ឲ្យសប្បាយរីករាយ។</span></p>
<p><span style="color: #000000;">បើតាមជំនឿពីបុរាណរៀងមក រាល់ថ្ងៃទី៣១ ខែតុលា ជាថ្ងៃដែលជនជាតិ ខេល (Celt) ដែលជាជនជាតិភាគតិចមួយ នៅកោះ Ireland ចាត់ទុកថា ជាថ្ងៃចុងបញ្ចប់នៃរដូវក្តៅ ហើយថ្ងៃបន្ទាប់មក គឺជាថ្ងៃទី១ វិច្ឆិកា គឺជាថ្ងៃចូលឆ្នាំថ្មី។ ចុងខែតុលា ជនជាតិខេល មានជំនឿថា ជាថ្ងៃដែលពិភពរបស់មនុស្សស្លាប់ និងមនុស្សរស់តភ្ជាប់គ្នា ហើយវិញ្ញាណ របស់អ្នក ដែលបាត់បង់ជីវិត ក្នុងឆ្នាំកន្លងមក នឹងដើររករាងកាយ របស់មនុស្សរស់ ដើម្បីចូលសណ្ឋិត ក្នុងគោល បំណង មានជីវិតរស់ម្តងទៀត។</span></p>
<p><span style="color: #000000;">ការនាំភាពក្តៅក្រហាយ មកដល់មនុស្សរស់ ធ្វើឲ្យពួកគេរិះរកគ្រប់មធ្យោបាយ កុំឲ្យខ្មោចចូលមកសណ្ឋិត នៅក្នុងខ្លួន។ ជនជាតិខេល ក៏នាំគ្នាបិទភ្លើងគ្រប់ប្រភេទ នៅក្នុងផ្ទះ ដើម្បីឲ្យអាកាសធាតុ ប្រែជារងាត្រជាក់ ដែលមិនមែនជាទីប៉ង ប្រាថ្នា នៃពពួកខ្មោចឡើយ។ ក្រៅពីនេះពួកគេ នៅនាំគ្នាតែងខ្លួនចម្លែកៗ ដើម្បីបន្លំខ្លួនធ្វើជាខ្មោច និងបន្លឺសំឡេង លាន់អឹងកង ដើម្បីឲ្យខ្មោចពិតប្រាកដភ័យខ្លាច ហើយរត់គេចខ្លួនទៅវិញ។</span></p>
<p><span style="color: #000000;">ដូច្នេះ បានជារៀងរាល់ឆ្នាំ នៅមុនថ្ងៃទី៣១ តុលា ដែលជាថ្ងៃប្រារព្ធពិធីនេះមកដល់ មានការរៀបចំព្រឹត្តិការណ៍ ប្លែកៗ ជាច្រើន ដូចជានៅតាមកន្លែងកម្សាន្ត មានការតុបតែងជារូបព្រាយបិសាច ឬមេធ្មប់ផ្សេងៗ ការដាក់តាំងរូបគោម ធ្វើពីផ្លែល្ពៅ នៅមុខផ្ទះ និងការលែងល្បែង Trick or Treat ពីសំណាក់ក្មេងៗជាដើម។</span></p>
<p><span style="color: #000000;">ទន្ទឹមនឹងនេះ មនុស្សមួយចំនួន បាននាំគ្នាពាក់របាំងមុខ ជារូបបិសាច ឬតុបតែងខ្លួនជាខ្មោចឆៅទៀតផង ដើម្បី បញ្ចៀសឧបទ្រពចង្រៃ ចេញពីក្នុងខ្លួន និងចេញពីក្រុមគ្រួសាររបស់ពួកគេ៕</span></p>
<p><span style="color: #000000;"><span style="color: #0000ff;"><a href="/News/Detail/35882/entertainment-news" target="_blank"><span style="color: #0000ff;">- អាន ៖ តារាៗនាំគ្នាជ្រើមជ្រួលតុបតែងខ្លួនមុខប្លែកៗ ចូលរួមបុណ្យ Halloween</span></a></span><br /></span></p>
<p><span style="color: #000000;"><a class="thickbox" title="" href="/FileManager/Commons/2015/10/31/18-31-10-2015--16-14-28.jpg"><img src="/FileManager/Articles/mce/2015/10/31/18-31-10-2015--16-14-28.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>