<p><span style="color: #000000;"><strong>(ភ្នំពេញ)៖</strong> ម៉ោង១០ព្រឹកថ្ងៃទី៣១ ខែមករា ឆ្នាំ២០១៧ស្អែកនេះ ក្រសួងការបរទេសកម្ពុជា នឹងចុះហត្ថលេខាទទួលបានប្រាក់កម្ចី ពីប្រទេសកូរ៉េខាងត្បូងជាង ៤០០លានដុល្លារអាមេរិក ដើម្បីយកមកអភិវឌ្ឍន៍ហេដ្ឋរចនាសម្ព័ន្ធ ប្រព័ន្ធធារាសាស្រ្ត សុខភាព ផ្លូវជនបទ និងប្រព័ន្ធលូបង្ហូរទឹក និងសម្រាប់លើកកម្ពស់គុណភាពផ្លូវជាតិលេខ៤៨ (ពីស្រុកស្រែអំបិល ខេត្តព្រះសីហនុ ឆ្ពោះទៅកាន់ខេត្តកោះកុង)។</span></p>
<p><span style="color: #000000;">ពិធីចុះហត្ថលេខានេះ នឹងធ្វើឡើងរវាងលោកទេសរដ្ឋមន្ត្រី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ និងលោ គីម វ៉ន ជីន ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជា។</span></p>
<p><span style="color: #000000;">យោងតាមសេចក្តីប្រកាសព័ត៌មានរបស់ក្រសួងការបរទេស ដែល Fresh News ទទួលបាននៅថ្ងៃទី៣០ ខែមករា ឆ្នាំ២០១៧នេះ បានឲ្យដឹងថា ទឹកប្រាក់ដែលកម្ពុជាខ្ចីកូរ៉េខាងត្បូងសម្រាប់គម្រោងអាទិភាពនានាលើផ្នែកហេដ្ឋារចនាសម្ព័ន្ធ ប្រព័ន្ធធារាសាស្រ្ត សុខភាព ផ្លូវជនបទ និងប្រព័ន្ធលូបង្ហូរទឹកពីឆ្នាំ២០១៦-២០១៨ មានទឹកប្រាក់ ៣៥០.០០០.០០០ដុល្លារអាមេរិក។ សម្រាប់គម្រោងលើកកម្ពស់គុណភាពផ្លូវជាតិលេខ៤៨ មានទឹកប្រាក់ចំនួន ៦៧.៤៣៤.០០០ ដុល្លារអាមេរិក។</span></p>
<p><span style="color: #000000;">ក្រសួងការបរទេសកម្ពុជា បានចាត់ទុកការផ្តល់កម្ចីរបស់កូរ៉េខាងត្បូង ជាគាំទ្រដល់កិច្ចខិតខំរបស់រាជរដ្ឋាភិបាលកម្ពុជា ក្នុងការធ្វើឲ្យប្រសើរឡើងនូវការអភិវឌ្ឍសេដ្ឋកិច្ច-សង្គម ព្រមទាំងរួមចំណែកដល់ការរក្សាកំណើនសេដ្ឋកិច្ច ប្រកបដោយស្ថិរភាព៕</span></p>
<p><span style="color: #000000;"><br /><a class="thickbox" title="" href="/FileManager/Commons/2017/1/31/13-31-01-2017--10-08-24.jpg"><img src="/FileManager/Articles/mce/2017/1/31/13-31-01-2017--10-08-24.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>