<p><span style="color: #000000;"><strong>(ភ្នំពេញ)៖</strong> តំបន់អង្គរ តំបន់ឆ្នេរសមុទ្រ និងរាជធានីភ្នំពេញ ដែលជាគោលដៅទេសចរដ៏សំខាន់នៅកម្ពុជា កំពុងទទួលបានចំណាប់អារម្មណ៍ យ៉ាងខ្លាំងពីក្រុមអ្នកវិនិយោទុនឥណ្ឌា។ នេះបើតាម លោក ទិត ចន្ថា អ្នកនាំពាក្យរបស់ក្រសួងទេសចរណ៍កម្ពុជា។</span></p>
<p><span style="color: #000000;">ក្រុមអ្នកវិនិយោគទុនឥណ្ឌាមួយក្រុម ដឹកនាំដោយ លោក Shirish Deshpande ហើយគាំទ្រដោយ ស្ថានទូតឥណ្ឌា នៅថ្ងៃទី២៤ ខែមីនា ឆ្នាំ២០១៦នេះ បានជួបពិភាក្សាជាមួយរដ្ឋមន្រ្តីក្រសួងទេសចរណ៍ លោក ថោង ខុន ។ នៅក្នុងជំនួបនោះ ពួកគាត់បានចាប់អារម្មណ៍ខ្ពស់ទៅនឹងសក្តានុពលទេសចរណ៍ នៅក្នុងប្រទេសកម្ពុជា។</span></p>
<p><span style="color: #000000;">លោក ទិត ចន្ថា អ្នកនាំពាក្យរបស់ក្រសួងទេសចរណ៍ បាននិយាយថា នៅក្នុងជំនួបនេះ ក្រុមអ្នកវិនិយោគិនឥណ្ឌា បានអះអាងប្រាប់លោករដ្ឋមន្រ្តីថា ពួកគេចង់វិនិយោគលើវិស័យទេសចរណ៍ នៅក្នុងប្រទេសកម្ពុជា ជាពិសេសនៅតំបន់គោលដៅ សំខាន់ៗដូចជា តំបន់អង្គរ តំបន់ឆ្នេរសមុទ្រ និងរាជធានីភ្នំពេញ។</span></p>
<p><span style="color: #000000;">លោក ទិត ចន្ថា បាននិយាយថា ក្រុមអ្នកវិនិយោគទុនឥណ្ឌាទាំងនោះ ចង់បង្កើតជាលក្ខណៈរមនីយដ្ឋានកែច្នៃ ដោយមានកន្លែងកម្សាន្ត សណ្ឋាគារ កីឡាទេសចរ រួមទាំងសួនកម្សាន្តទំនើបលក្ខណៈធំៗជាដើម ហើយស្នើឱ្យក្រសួងទេសចរណ៍ ជួយផ្តល់យោបល់ និងសម្រួលដល់កិច្ចការផ្សេងៗ។</span></p>
<p><span style="color: #000000;">លោក ថោង ខុន រដ្ឋមន្រ្តីក្រសួងទេសចរណ៍ បានសម្តែងភាពរីករាយ និងស្វាគមន៍ចំពោះចំណាប់អារម្មណ៍ របស់ក្រុមអ្នកវិនិយោគិនឥណ្ឌា។ លោកចាត់ទុកថា ការទទួលបានចំណាប់អារម្មណ៍របស់ពីក្រុមវិនិយោគិនបរទេសថ្មី លើវិស័យទេសចរណ៍នេះ គឺជាផលវិជ្ជមានថ្មីទៀតរបស់សកម្ពុជា។</span></p>
<p><span style="color: #000000;">របាយការណ៍របស់ក្រសួងទេសចរណ៍ បានឱ្យដឹងថា ឆ្នាំ ២០១៥ កន្លងមកនេះ កម្ពុជាទទួលបានទេសចរអន្តរជាតិ ៤,៧៨លាននាក់ បន្តកើនឡើង ៦,១ % បើធៀបនឹងឆ្នាំ២០១៤ ក្នុងនោះក៏មានភ្ញៀវទេសចរឥណ្ឌាប្រមាណ ៣៦ពាន់នាក់ផងដែរ៕</span></p>
<p><span style="color: #000000;"><img src="https://scontent-kul1-1.xx.fbcdn.net/hphotos-xlt1/v/t1.0-9/12799048_1576240142690351_4976936193498654478_n.jpg?oh=f41c65faecee837c47ce6a5085ee0cae&oe=579617EB" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/hphotos-xla1/v/t1.0-9/12718383_1576240146023684_959970990752277058_n.jpg?oh=bdff23aa279ca0108909dd253843b157&oe=578E3FE0" alt="" width="730" /></span></p>
<p><span style="color: #000000;"><img src="https://scontent-kul1-1.xx.fbcdn.net/hphotos-xtl1/v/t1.0-9/12799183_1576240139357018_2200440201022529436_n.jpg?oh=e591d166f62a1e2a0ae42c1fcddb2e03&oe=575174EF" alt="" width="730" /></span></p>
<p> </p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>
<div class="detail_bottom_function">
<div class="facebook_like"></div>
</div>