<p><span style="color: #000000;"><strong>(ភ្នំពេញ)៖</strong> លោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានបង្ហាញប្រតិកម្មនៅលើបណ្តាញសង្គម Facebook ដោយខឹងសម្បារនឹងប្រធានមន្ទីរព័ត៌មានខេត្តព្រៃវែងម្នាក់ ដែលមិនបានរាយការណ៍ជូនលោក អំពីទំនាស់ដីធ្លីរវាងពលរដ្ឋខ្មែរ និងសហគមន៍វៀតណាម រហូតដល់អ្នកស្លាប់ដោយទំនាស់នេះ។</span></p>
<p><span style="color: #000000;">នៅលើបណ្តាញសង្គម Facebook លោករដ្ឋមន្រ្តី បានសរសេរថា <strong>«មិនដឹងប្រធានមន្ទីរព័ត៌មានខេត្តព្រៃវែងដេកនៅឯណា បានជាមិនឃើញរាយការណ៍ពីរឿងទំនាស់ប្រជាជនខ្មែរ និងសហគមន៍វៀតណាម រហូតដល់មានស្លាប់។ បើអ្នកណាដឹងថាគាត់គេងនៅឯណា ជួយដាស់គាត់អោយទៅធ្វើការងារផង»</strong>។</span></p>
<p><span style="color: #000000;">សូមបញ្ជាក់ថា កាលពីថ្ងៃទី៧ ខែសីហា ឆ្នាំ២០១៦កន្លងទៅ មានហេតុការណ៍ប៉ះទង្គិចគ្នាមួយ ដោយជនជាតិវៀតណាម នៅក្នុង សហគមន៍របស់ពួកគេទៅវាយប្រហារ លើពលរដ្ឋកម្ពុជា មួយគ្រួសារដែលរស់នៅភូមិក្បែរគ្នា នៅចំណុច ភូមិ-ឃុំ អ្នកលឿង ស្រុក ពាមរក៍ ខេត្ត ព្រៃវែង បណ្ដាលឲ្យបុរសជាប្ដី បានស្លាប់ និង ស្រ្តីជាប្រពន្ធដែលមានផ្ទៃពោះ៩ខែរងរបួសធ្ងន់ ។</span></p>
<p><span style="color: #000000;">ទំនាស់នេះត្រូវបានសមត្ថកិច្ចរាយការណ៍ថា កើតឡើងដោយសារតែដោយសារ តែជនជាតិវៀតណាមទាំងនោះខឹងនឹងបុរសរងគ្រោះ ដែលពួកគេសម្លុតទារបារីជក់តែមិនព្រមឲ្យ។ ទោះជាយ៉ាង បុរសជនជាតិវៀតណាម ៣នាក់ ក្នុងចំណោមជាង២០នាក់ ត្រូវបានកម្លាំងនគរបាលឃាត់ខ្លួនភ្លាមៗផងដែរ៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-08-10-10-00-33-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>