<p><span style="font-size: 12px; color: #000000;">ក្រុមហ៊ុនលក់គ្រឿងទេសអនឡាញចិន Dada-JD Daojia បាននិយាយកាលពីថ្ងៃព្រហស្បតិ៍ថា ខ្លួនបានលើកសំណើប្រាក់វិនិយោគបន្ថែមប្រមាណ ៥០០ លានដុល្លារពីក្រុមហ៊ុនលក់រាយ Walmart និង JD.com នៅក្នុងការប្រកាសផលចំណេញនៃការផ្ដល់ហិរញ្ញប្បទានវិនិយោគលើកចុងក្រោយរបស់ខ្លួន។</span></p>
<p><span style="color: #000000;">ក្រុមហ៊ុន Dada-JD ត្រូវបានស្ថាបនាចេញពីក្រុមហ៊ុនទុនរួម JD Daojia ដែលជាអាជីវកម្មលក់អនឡាញលើគេហទំព័រ JD.com និងក្រុមហ៊ុន Dada Nexus ដែលជាវេទិកាអាជីកម្មធ្វើការពីចម្ងាយ(Crowd-sourcing) ដ៏ធំមួយ នៅក្នុងប្រទេសចិន ដែលប្រតិបត្ដិការ នៅក្នុងទីក្រុងធំៗ ជាង ៤០០។</span></p>
<p><span style="color: #000000;"><a class="thickbox" title="" href="/FileManager/Commons/2018/8/9/1-09-08-2018--13-53-01.png"><img src="/FileManager/Articles/mce/2018/8/9/1-09-08-2018--13-53-01.png" alt="" /></a><br /></span></p>
<p><span style="color: #000000;">ក្រុមហ៊ុន JD Daojia ដឹកទំនិញពីផ្សារទំនើបក្នុងមូលដ្ឋាន និងទំនិញពីដៃគូផ្សេងទៀត តាមរយៈកម្មវិធីស្មាតហ្វូនកំណត់ទីតាំងមួយ ព្រមទាំងមានអ្នកប្រើប្រាស់សកម្មប្រហែល ២០ លាននាក់ជាប្រចាំខែ។</span></p>
<p><span style="color: #000000;">លោក Wern-Yuen Tan ប្រធាន និងជានាប្រតិបត្ដិនៃក្រុមហ៊ុន Walmart China បាននិយាយ នៅក្នុងសេចក្ដីថ្លែងការមួយថា៖ “តាមរយៈប្រតិបត្ដិការរួមជាមួយដៃគូអាជីវកម្មសក្ដានុពល និងវិនិយោគតាមមធ្យោបាយបច្ចេកវិទ្យាទំនើប យើងនឹងផ្ដល់ជូនបទពិសោធន៍ទិញទំនិញកាន់តែប្រសើរ និងងាយស្រួលជាងមុនដល់អតិថិជន”។</span></p>
<p><span style="color: #000000;">ក្រុមហ៊ុន Walmart បានសហការដៃគូអាជីវកម្មដំបូងជាមួយក្រុមហ៊ុន Dada-JD Daojia ក្នុងឆ្នាំ ២០១៦ នេះបើយោងតាមការឱ្យដឹងរបស់ក្រុមហ៊ុនចិនមួយនេះ។</span></p>
<p><span style="color: #000000;">កាលពីដើមឆ្នាំនេះ ក្រុមហ៊ុនលក់រាយអាមេរិក បានបើកផ្សារទំនើបភ្ជាប់បច្ចេកវិទ្យាទំនើបដំបូងមួយរបស់ខ្លួន នៅក្នុងប្រទេសចិន ជាប្រទេសដែលអតិថិជនភាគច្រើនប្រើស្មាតហ្វូនដើម្បីបង់ថ្លៃទំនិញ ដែលមានលក់ជាក់ស្ដែងនៅផ្សារទំនើប Walmart លើគេហទំព័ររបស់ក្រុមហ៊ុន JD Daojia។</span></p>
<p><span style="color: #000000;">គេហទំព័រ JD.com ដែលប្រកួតប្រជែងអាជីវកម្មដ៏ស្វិតស្វាញ ជាមួយក្រុមហ៊ុនលក់ទំនិញអនឡានដ៏ធំបំផុតគឺ Alibaba ក៏មានការគាំទ្រផ្នែកហិរញ្ញវត្ថុពីក្រុមហ៊ុនសកលលោក ដែលល្បីឈ្មោះបោះសម្លេងខាងបច្ចេកវិទ្យាដូចជា ក្រុមហ៊ុន Google និងក្រុមហ៊ុន Tencent ផងដែរ។</span></p>
<p><span style="color: #000000;">កាលពីខែមិថុនា ក្រុមហ៊ុន Google បាននិយាយថា ខ្លួននឹងវិនិយោគសាច់ប្រាក់ ៥៥០ លានដុល្លារចូលទៅក្នុងគេហទំព័រ JD.com ដែលជាផ្នែកមួយនៃការវិនិយោគបែបយុទ្ធសាស្រ្ដ។</span></p>
<p><span style="color: #000000;">គេហទំព័រ JD.com និយាយថា ខ្លួនគ្រោងនឹងសម្រាំងផលិតផល ដែលអាចលក់ដាច់ នៅកន្លែមួយចំនួនដូចជាសហរដ្ឋអាមេរិក និងអឺរ៉ុបតាមរយៈ Google Shopping ជាសេវាមួយ ដែលអនុញ្ញាតឱ្យអ្នកប្រើប្រាស់ អាចស្វែងរកផលិតផលនៅលើគេហទំព័រពាណិជ្ជកម្មអនឡាញនានា និងប្រៀបធៀបតម្លៃទំនិញរវាងអ្នកលក់ផ្សេងគ្នា។ ការសហការដៃគូគ្នានេះ នឹងបើកឆាណែលឱ្យគេហទំព័រ JD.com ដើម្បីលក់ផលិតផលជូនអ្នកប្រើប្រាស់ក្រៅប្រទេសចិន ជាពិសេសនៅចំពេល ដែលភាពតានតឹងផ្នែកពាណិជ្ជកម្មរវាងក្រុងប៉េកាំង និងក្រុងវ៉ាស៊ីនតោន កំពុងកើនឡើងខ្ពស់ ៕ </span></p>
<p><span style="color: #000000;"><a class="c_tab" href="/News/Detail/50164/welcome-to-advertisement-page-of-camnews-with-price-discount-50-percent" target="_blank"><img src="/FileManager/Articles/mce/2018/8/9/mekongnet-09-08-2018--13-53-12.PNG" alt="" /></a></span></p>
<p style="text-align: right;"><span style="color: #000000; font-size: 12px; text-align: right;">ប្រែសម្រួល៖ សារ៉ាត</span></p>
<p style="text-align: right;"><span style="color: #000000;">ប្រភព៖ ស៊ីអិនប៊ីស៊ី</span></p>