<p><span style="color: #000000;"><strong>ឧត្តរមានជ័យ៖</strong> បុរសម្នាក់ ត្រូវបានអ្នកឃើញហេតុការណ៍ អះអាងថា បើករថយន្តលឿន ដូចរថយន្តប្រណាំង « Formula 1» នោះ លុះដល់ផ្លូវរង្វង់មូល បួងចង្កូតរថយន្តខ្លាំង ធ្វើឲ្យរបូតទ្វារ ជះទាំងប្រពន្ធ និងកូនតូចៗ ធ្លាក់ពីលើ រថយន្តជាច្រើនម៉ែត្រ តែសំណាងល្អគ្រាន់តែរងរបួសធ្ងន់ មិនបណ្តាលឲ្យគ្រោះថ្នាក់ដល់អាយុជីវិតឡើយ។ ហេតុ ការណ៍គ្រោះថ្នាក់ចរាចរណ៍នេះ បានកើតឡើងកាលពីម៉ោង ៨យប់ថ្ងៃទី០៩ ខែកញ្ញា ឆ្នាំ២០១៥ ស្ថិតនៅរង្វង់មូល ស្រុកអន្លង់វែង ក្នុងភូមិអូរជញ្ជៀន។</span></p>
<p><span style="color: #000000;">ប្រជាពលរដ្ឋ ដែលបានឃើញហេតុការណ៍ បាននិយាយរៀបរាប់ឲ្យដឹងថា មុនពេលកើតហេតុ គេបានឃើញរថ យន្តជួបគ្រោះថ្នាក់នេះ បើកបរយ៉ាងលឿនក្នុងទិសដៅពីជើងទៅត្បូង។ លុះដល់ចំណុចកើតហេតុត្រង់រង្វង់មូល រថយន្ត បានបត់ឆ្វេងទៅទិសខាងកើត តែដោយសារអ្នកបើកបរបួងចង្កូតខ្លាំងពេកធ្វើឲ្យរបើកទ្វាររថយន្ត ជះប្រពន្ធ និងកូនតូចៗពីរនាក់ ធ្លាក់ពីលើរថយន្តជាច្រើនម៉ែត្រ។</span></p>
<p><span style="color: #000000;">គ្រោះថ្នាក់នេះ បណ្តាលឲ្យស្រ្តីជាម្តាយ និងកូនបងរងរបួសស្រាលរលាត់ស្បែកតិចតួច។ ដោយឡែកកូនតូចអាយុ ៤ខែ រងរបួសធ្ងន់បញ្ជូនទៅសង្រ្គោះនៅមន្ទីរពេទ្យបង្អែកស្រុកអន្លង់វែង ដោយសារស្ថានភាពធ្ងន់ធ្ងរគ្រូពេទ្យ ក៏បាន បញ្ជូនទៅធ្វើការសង្រោ្គះនៅមន្ទីរពេទ្យខេត្តសៀមរាបបន្តទៀត។</span></p>
<p><span style="color: #000000;">បើតាមសំដីរបស់ម្ចាស់សិប្បកម្មផលិតទឹកបរិសុទ្ធយីហោបឹងមាលា បានឲ្យដឹងថា បុរសជាអ្នកបើករថយន្តបណ្តាល ឲ្យប្រពន្ធ និងកូនៗធ្លាក់នេះ មានឈ្មោះ វណ្ណា អាយុជាង ៣០ឆ្នាំ ជាកម្មករបើករថយន្តដឹកទឹកសុទ្ធ ហើយទើបចូល ធ្វើការនៅសិប្បកម្មផលិតទឹកបរិសុទ្ធ «បឹងមាលា» បានមួយខែប៉ុណ្ណោះ។ លោក វណ្ណា ជាអ្នកខេត្តកំពង់ចាម៕</span></p>
<p><a class="thickbox" title="" href="/FileManager/Commons/2015/9/10/9-10-2015-12-05-48-pm-10-09-2015--12-13-02.png"><img src="/FileManager/Articles/mce/2015/9/10/9-10-2015-12-05-48-pm-10-09-2015--12-13-02.png" alt="" /></a></p>
<p style="text-align: right;"><span>ផ្ដល់សិទ្ធដោយ៖ ដើមអម្ពិល</span></p>