<div class="article-content">
<p><strong>កំពង់ចាម</strong><strong>៖</strong> ពិតជា «ជុងមិនភ្លេចកុកមែន» បុរសម្នាក់ បានប្រព្រឹត្តអំពើយង់ខ្នងប្លន់ សម្លាប់ ហើយបានរត់គេច ខ្លួនអស់រយៈរយៈពេល ១៥ឆ្នាំ ឥឡូវត្រូវសមត្ថកិច្ចនគរបាលស្រុកត្បូងឃ្មុំ ចាប់ខ្លួនបានហើយ កាលពីយប់ថ្ងៃទី ១៥ ខែមេសា នៅក្នុងផ្ទះជនជាប់ចោទ ស្ថិតក្នុងភូមិទួលវិហ៊ា ឃុំជីរោទី២ ស្រុកត្បូងឃ្មុំ ខេត្តកំពង់ចាម។</p>
<p>អធិការនគរបាលស្រុកត្បូងឃ្មុំ លោក សួស ស៊ាងលី បានប្រាប់ឲ្យដឹងថា ជនជាប់ចោទនេះ មានឈ្មោះ សុខ ឌីន អាយុ ៣៣ឆ្នាំ មានទីលំនៅភូមិទួលវិហ៊ា ឃុំជីរោទី២ ស្រុកត្បូងឃ្មុំ ខេត្តកំពង់ចាម ។ លោកអធិការ បានឲ្យដឹង ទៀតថា ជនជាប់ចោទត្រូវបានចាប់ខ្លួន ខណៈរូបគេមកលេងផ្ទះក្នុងពេលបុណ្យចូលឆ្នាំថ្មី។</p>
<p>លោកអធិការ សួស ស៊ាងលី ក៏បានឲ្យដឹងដែរថា ជនជាប់ចោទ ត្រូវបានបង្គាប់ឲ្យចាប់ខ្លួន តាមដីការបស់សាលា ដំបូងខេត្តកំពង់ចាម ពីបទប្លន់ និងធ្វើមនុស្សឃាត កាលពីថ្ងៃទី១០ ខែធ្នូ ឆ្នាំ១៩៩៩ នៅចំណុច ខាងលិចស្ពាន មាត់ឃ្មង់ ឃុំជីរោទី២ ស្រុកត្បូងឃ្មុំ ខេត្តកំពង់ចាម។</p>
<p>ទន្ទឹមនឹងការឃាត់ខ្លួនជនជាប់ចោទរូបនេះ ស្នងការនគរបាលខេត្តកំពង់ចាម លោកឧត្តមសេនីយ៍ បែន រ័ត្ន ក៏បាន បញ្ជាក់ពីជំហររបស់ខ្លួនក្នុងការពារសន្តិសុខសុវត្ថិភាពជូនប្រជាពលរដ្ឋក្នុងខេត្តកំពង់ចាម ជាពិសេសក្នុងឱកាស បុណ្យចូលឆ្នាំថ្មីតែម្តង។</p>
<p>ដើម្បីរក្សាសន្តិសុខសុវត្ថិភាពនេះ លោកឧត្តមសេនីយ៍ បែន រ័ត្ន បានដាក់ចេញនូវផែនការជាយុទ្ធសាស្រ្តសំខាន់ៗ ចំនួន៣ រួមមាន៖ ផែនការណ៍ទី១. ការពារសុវត្ថិភាពគ្រប់បែបយ៉ាង, ទី២. បង្ក្រាបរាល់បទល្មើសផ្សេងៗ ដែល អាចកើតឡើង ដូចជាចោរកម្ម និងគ្រឿងញៀន .ល្បែងស៊ីសង។ល។ រីឯ ផែនការណ៍ទី៣ នោះ គឺពង្រឹងការអនុ វត្តន៍ដីកានេះឯង ដោយលោកស្នងការ បានចាត់បញ្ជាឲ្យមន្ត្រីនគរបាល ដែលមានដីកាក្នុងដៃ គ្រប់មូលដ្ឋានទាំង អស់ត្រៀមចាំ ព្រោះពេលចូលឆ្នាំដូច្នេះ ជនល្មើសអាចភ្លេចខ្លួនវិលចូលមកមូលដ្ឋានវិញ៕</p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-086.jpg" alt="" width="550" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>