<p><span style="color: #000000;"><strong>ភ្នំពេញ៖</strong> ភ្នាក់ងាររបស់ មជ្ឈមណ្ឌលព័ត៌មាន ដើមអម្ពិល លោក ថៃ ចំរ៉ុង បានរងនូវការគំរាមបាញ់សម្លាប់ផ្តាច់ ជីវិតតែម្តង នៅក្នុងករណីគ្រោះថ្នាក់ ចរាចរណ៍ បង្កដោយនាយទាហានស័កិ្ត ៤កន្លះ ស្រវឹងជោគ បើករថយន្ត មកតាមកៀរបុករថយន្តពីចំហៀង នៅរសៀល ម៉ោង ៤ និង ១០នាទី ថ្ងៃ១១ ខែមករា ឆ្នាំ២០១៥នេះ ។</span></p>
<p><span style="color: #000000;">សាក្សីនៅកន្លែងកើតហេតុ បានឲ្យដឹងថា លោក ថៃ ចំរ៉ុង បានបើករថយន្ត ម៉ាក វីស្ទូ មកដល់ត្រង់ចំណុច រង្វង់មូល កាំភ្លើងគួចកាណុង ស្រាប់តែមានរថយន្តម៉ាក តូយ៉ាតា ហាយឡែនឌ័រ ពាក់ស្លាកលេខ ភ្នំពេញ 2W-2791 បានបើកមកវ៉ា ហើយក៏ជ្រុលចង្កូតកៀ រថយន្តរបស់លោក ថៃ ចំរ៉ុង តែម្តង។ ជនបង្កដែលបើករថយន្ត ក្នុង អាការៈស្រវឹងជោគជាំ និងបង្កគ្រោះថ្នាក់ចរាចរណ៍ ក៏បានចុះពីលើរថយន្ត ហើយបានទាញ ទូរស័ព្ទ តេហៅគ្នីគ្នា មកជួយអន្តរាគមន៍។</span></p>
<p><span style="color: #000000;">ប្រភពដដែលបន្តថា ក្រោយពីសុំសម្រុះសម្រួល រួចមកជនបង្កក៏បានបោះសម្តី ឲ្យជនរងគ្រោះ ថា “អញព្រមសង ហ្អែងហើយ ហ្អែងនៅចង់អន្តរាគមន៍ ដល់ថ្នាក់ណាក៏មិនឈ្នះអញដែរ”។ គ្រាន់តែនិយាយចប់ នាយទាហានសក្តិ ៤កន្លះរូបនេះ ក៏ស្ទុះទាញកាំភ្លើងវែងនៅក្នុងឡាន ដើម្បីមកគម្រាមភ្នាក់ងារយកព័ត៌មានដើមអម្ពិល តែម្តង ហើយ ក៏ធ្វើឲ្យមានការភ្ញាក់ផ្អើលពេញផ្លូវ។ បើកុំតែបានប៉ូលិសជួយអន្តរាគមន៍ទាន់ពេលវេលាម្ល៉េះ មិនដឹងមាន ហេតុការណ៍អាក្រក់អ្វី កើតឡើងនោះទេ។</span></p>
<p><span style="color: #000000;">ទង្វើរបស់នាយនាហានសក្តិ ៤កន្លះរូបនេះ ត្រូវបានអ្នកច្បាប់លើកឡើងថា យ៉ាងហោចណាស់ បានបង្កបទល្មើសចំនួន៣ ដែលច្បាប់មិនអាចអត់ឱនឲ្យបាន ទី១៖ បើកបររថយន្តក្នុងអាការៈស្រវឹង ទី២៖ បង្ករ។ គ្រោះថ្នាក់ចរាចរណ៍ដល់អ្នកដទៃ និងទី៣៖ ដកអាវុធ(វែង) មកគម្រាមជនរងគ្រោះ ។ ទង្វើបែបគ្មានកោត ក្រែងច្បាប់ សូម្បីតែមួយក្រចកបែបនេះ សមត្ថកិច្ចពាក់ព័ន្ធ ជាពិសេសស្ថាប័ន អយ្យការអមសាលាដំបូងរាជធានីភ្នំពេញ គួរមានវិធានការតាម ផ្លូវច្បាប់ទៅលើជនល្មើស ដែលបង្កគ្រោះថ្នាក់ដល់អ្នកដទៃហើយ បែជាដកអាវុធមកគម្រាមកំហែងទៀត៕</span></p>
<p><span style="color: #000000;"><a class="thickbox" title="" href="/FileManager/Commons/2015/1/12/1-12-2015-12-04-37-pm-12-01-2015--12-09-19.png"><img src="/FileManager/Articles/mce/2015/1/12/1-12-2015-12-04-37-pm-12-01-2015--12-09-19.png" alt="" /></a></span></p>
<p><a class="thickbox" title="" href="/FileManager/Commons/2015/1/12/1-12-2015-12-05-01-pm-12-01-2015--12-09-33.png"><img src="/FileManager/Articles/mce/2015/1/12/1-12-2015-12-05-01-pm-12-01-2015--12-09-33.png" alt="" /></a></p>
<p style="text-align: right;"><span>ផ្ដល់សិទ្ធដោយ៖ ដើមអម្ពិល</span><span style="color: #000000;"><br /></span></p>