<p><span style="color: #000000;"><strong>ភ្នំពេញ៖</strong> ក្រុមហ៊ុន Facebook បានចេញមកបញ្ជាក់ថា ទំព័រ Facebook របស់សម្តេចតេជោ ហ៊ុន សែន នាយក រដ្ឋមន្រ្តី នៃកម្ពុជា បានក្លាយទៅជាទំព័រ ដែលមានសកម្មភាពរស់រវើក និងមមាញឹក ក្នុងចំណោមទំព័រ Facebook មេដឹកនាំចំនួន១០ នៅលើពិភពលោក។</span></p>
<p><span style="color: #000000;">លោក Alvin Sheng Hui Tan មន្រ្តីទំនាក់ទំនងសាធារណៈរបស់ក្រុមហ៊ុន Facebook ប្រចាំតំបន់អាស៊ីអាគ្នេយ៍ បានបញ្ជាក់ថា Facebook Pages របស់សម្តេចតេជោ ហ៊ុន សែន បានក្លាយទៅជាទំព័រ Facebook មួយ ក្នុង ចំណោមទំព័រ Facebook មេដឹកនាំពិភពលោកចំនួន១០ ដែលមានសកម្មភាពរស់រវើក ដោយមានសកម្មភាព Like, comment និង Share ច្រើនជាងគេ។</span></p>
<p><span style="color: #000000;">ទំព័រ Facebook របស់សម្តេចតេជោ ហ៊ុន សែន ត្រូវបានបង្កើតឡើងនៅចុងខែមិថុនា ឆ្នាំ២០១០ ហើយបាន ប្រកាសទទួលស្គាល់ និង ប្រើប្រាស់ជាផ្លូវការនូវទំព័រ Facebook របស់សម្តេច ដែលមានឈ្មោះថា «Samdech Hun Sen, Cambodian Prime Minister» កាលពីថ្ងៃទី២០ ខែ កញ្ញា ឆ្នាំ២០១៥កន្លងទៅនេះ។</span></p>
<p><span style="color: #000000;">រហូតមកដល់ថ្ងៃទី២៨ ខែតុលា ឆ្នាំ២០១៥នេះ ទំព័រ Facebook របស់នាយករដ្ឋមន្រ្តីកម្ពុជា មានអ្នកចូលចុច Like ជិត ១,៣លាននាក់។</span></p>
<p><span style="color: #000000;">ការចេញមកប្រកាសប្រើជាផ្លូវការនូវទំព័រ Facebook របស់សម្តេចតេជោ ហ៊ុន សែន ត្រូវបានគេមើលឃើញថា ជាសារមួយបង្ហាញការបើកទូលាយ នៃសិទ្ធិសេរីភាពក្នុងការបញ្ចេញមតិរបស់ប្រជាពលរដ្ឋកម្ពុជា ហើយក៏ជាការ បង្ហាញឲ្យឃើញពីការបង្កើននូវការយកចិត្តទុកដាក់បន្ថែមមួយកម្រិតទៀតរបស់នាយករដ្ឋមន្រ្តីកម្ពុជា ជាមួយប្រជា ពលរដ្ឋរបស់ខ្លួន។</span></p>
<p><span style="color: #000000;">ត្បិតថា តាមរយៈទំព័រ Facebook នេះ នាយករដ្ឋមន្រ្តីកម្ពុជា ច្បាស់ជាទទួលបាននូវព័ត៌មាន កាន់តែគ្រប់ជ្រុង ជ្រោយថែមទៀត ពីប្រជាពលរដ្ឋ ហើយក៏ជួយឲ្យនាយករដ្ឋមន្រ្តីកម្ពុជា សម្តេចតេជោ ហ៊ុន សែន អាចឆ្លើយតប ទាន់ពេលវេលាផងដែរ សម្រាប់សុខ និង ទុក្ខរបស់ប្រជាពលរដ្ឋខ្មែរ។</span></p>
<p><span style="color: #000000;">ទំព័រ Facebook របស់នាយករដ្ឋមន្រ្តីកម្ពុជា នឹងជួយបង្កើននូវទំនាក់ទំនង ដ៏ជិតស្និទ្ធថែមទៀតរវាងប្រមុខដឹកនាំ ចង្កូតនាវាកម្ពុជា ជាមួយប្រជាពលរដ្ឋ ដោយអាចឆ្លើយឆ្លង និងអាចចែករំលែកនូវភាពសប្បាយ ទុក្ខកង្វល់ ក៏ដូចជា ផលលំបាកនានា តាមបណ្តាញសង្គមមួយនេះនៅគ្រប់ទីកន្លែង និងគ្រប់ពេលវេលាទាំងអស់៕</span></p>
<p><span style="color: #000000;"><a class="thickbox" title="" href="/FileManager/Commons/2015/10/29/11-29-10-2015--14-58-06.jpg"><img src="/FileManager/Articles/mce/2015/10/29/11-29-10-2015--14-58-06.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>