<p class="msg 1st">ភ្នំពេញ៖ យុវជន៣នាក់ បានរងរបួសធ្ងន់ស្រាល ខណៈពួកគេបាន ជិះម៉ូតូមួយគ្រឿងឌុបគ្នា តាម<br />បណ្តោយផ្លូវព្រះសីហនុ ខណៈមកដល់កែងផ្លូវ១៤៣ ស្រាប់តែលិច មុខជនមិនស្គាល់អត្តសញ្ញាណ<br />ម្នាក់ បានជិះម៉ូតូមកអែបក្បែរពួកគេទាំង៣នាក់ រួចដកកាំភ្លើងខ្លីវាយបណ្តាល ឲ្យរងរបួសធ្ងន់ស្រាល<br /> ទាំង៣នាក់តែម្តង ដោយមិន ដឹងថាមានរឿងអីជាមួយគ្នា តាំងពីពេលណា កន្លែងណាមកនោះទេ។ <br />ហេតុការណ៍នេះ បានកើតឡើងកាលពីវេលាម៉ោង១២ និង ២០នាទី យប់រំលងអាធ្រាត្រឈាន ចូល<br />ថ្ងៃទី២៩ មិថុនា ២០១៣ ស្ថិតក្នុងសង្កាត់បឹងកេងកងទី២ ខណ្ឌចំការមន ។</p>
<p>យុវជន រងគ្រោះទាំង៣នាក់ខាងលើនេះ ទី១ឈ្មោះ ង៉ែត វណ្ណធី អាយុ២២ឆ្នាំ មុខរបរជាជាងសំណង់<br />នៅបុរីប៉េងហួត និងជាអ្នកបើកម៉ូតូ បានរងរបួសធ្ងន់ ទី២ ឈ្មោះ នាក់ ទូច អាយុ២១ឆ្នាំ និងទី៣ឈ្មោះ<br /> នី អាយុ១៨ ឆ្នាំ មុខរបរជាជាងសំណង់នៅបុរីប៉េងហួតដូចគ្នា បានរងរបួសស្រាល។ បើតាមយុវជន<br />ឈ្មោះ នាក់ ទូច និង នី បាននិយាយរៀបរាប់ប្រាប់សមត្ថកិច្ចថា មុនពេលកើតហេតុ គឺពួកគេទាំង៣<br />នាក់ បានជិះម៉ូតូមួយគ្រឿងម៉ាក សេ១២៥ ពណ៌ខ្មៅ ពាក់ស្លាកលេខ ភ្នំពេញ 1E-2231 ធ្វើដំណើរតាម<br />បណ្តោយផ្លូវព្រះសីហនុ ខណៈមកដល់កែងផ្លូវ១៤៣ ស្រាប់តែលិចមុខបុរសម្នាក់ ដែលមិនស្គាល់អត្ត<br />សញ្ញាណបានជិះម៉ូតូមួយគ្រឿងម៉ាក ស៊ីរូស អត់ចាំស្លាកលេខ ជិះមកតាមពួកគេដល់ចំណុចកើត<br />ហេតុខាងលើ ក៏ដកកាំភ្លើងខ្លីមួយដើមម៉ាក K54 ធ្វើសកម្មភាពវាយមក លើពួកគេបណ្តាលឲ្យរងរបួស<br />ធ្ងន់ ស្រាលតែម្តង ដោយមិនដឹងមូលហេតុថា ធ្លាប់មានរឿងរ៉ាវអីជាមួយគ្នាដែលឬយ៉ាងណានោះទេ ហើយជនសង្ស័យនោះក៏បានជិះម៉ូតូរត់គេចខ្លួនបាត់ភ្លាមៗតែម្តង បន្ទាប់ពីវាយពួកគេឲ្យរងរបួស<br />ហើយ។</p>
<p>បន្ទាប់ពីកើតហេតុ ជនរងគ្រោះ ត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យ ចំណែកម៉ូតូ<br />ត្រូវសមត្ថកិច្ចនាំយក ទៅរក្សាទុកឲ្យនៅអធិការ ដ្ឋាននគរបាលខណ្ឌចំការមន៕</p>
<p style="text-align: center;"><img src="http://image.dap-news.com:81/dap-news/dap-images/2013/june/id-011/Hong-0754.jpg" alt="" width="500" /></p>
<p style="text-align: right;">ដោយ៖ ដើមអំពិល<br />ផ្តល់សិទ្ធិដោយ៖ ដើមអំពិល</p>