<div class="article-content">
<p><strong>ព្រះសីហនុ ៖</strong> ជ្រូក ១៥ក្បាល នៅក្នុងកសិដ្ឋានរបស់ លោកឧកញ៉ា ម៉ុង ឫទ្ធី ស្ថិតនៅក្នុងចំការដូងប្រេង នាឃុំជើងគោ ស្រុកព្រៃនប់ ត្រូវបានខ្លាខាំងាប់ កាលពីថ្ងៃទី២៨ ខែកក្កដា ឆ្នាំ២០១៤ ។ នេះបើយោង តាមទំព័រហ្វេសប៊ុក របស់លោកឧកញ៉ា ម៉ុង ឫទ្ធី ។</p>
<p>បើតាមអ្នកបម្រើការ នៅក្នុងក្រុមហ៊ុន ម៉ុង ឫទ្ធី គ្រុប បានឲ្យដឹងថា ខាងកសិដ្ឋានមិនទាន់សន្និដ្ឋានថា ជាសត្វអ្វី ដែលចូលមកខាំសត្វនេះ នៅឡើយនោះទេ។ ប្រភពដដែលបន្តថា ហេតុការណ៍នេះ ធ្លាប់កើត មានកាលពីប៉ុន្មានឆ្នាំមុនរួចម្តងមកហើយ ដែលកាលនោះ សត្វជ្រូកពីរក្បាលត្រូវបានសត្វខាំងាប់។</p>
<p>បើតាមប្រភព ពីអ្នកបម្រើការនៅក្នុងក្រុមហ៊ុនបញ្ជាក់ថា សត្វនោះប្រហែលជាចេញពីភ្នំតាកឹង ដែលស្ថិត នៅជិតកសិដ្ឋាន ។</p>
<p>តាមរយៈទំព័រហ្វេសប៊ុករបស់ឧកញ៉ា ម៉ុង ឫទ្ធី ដែលបានបង្ហោះរូបភាព ជ្រូកដេកងាប់ ក្នុងកសិដ្ឋាន រដូករណែលពីរសន្លឹក លោកឧកញ៉ា បានសរសរអក្សរត្អូញត្អែរថា «កាលពីឆ្នាំ១៩៩៦-៩៧ ចាប់ផ្តើម ដាំដូងប្រេង មានដំរីមកបោចបំផ្លាញដើមដូងប្រេង មកដល់ឆ្នាំ២០០០ ចិញ្ចឹមគោមានសត្វខ្លាមកខាំគោ នៅពេលនេះ មានសត្វខ្លាមកខាំជ្រូកអស់ ១៥ក្បាលក្នុងមួយយប់នៅភ្នុំតាកឹង ចំការដូងប្រេង»។</p>
<p>បើតាមប្រភព បានបញ្ជាក់ថា រាល់សត្វដែលត្រូវសត្វខាំងាប់នោះ ត្រូវបានគេយកទៅកប់ ឬដុតចោល មិនដែលអនុញ្ញាត ឲ្យកម្មករ ឬប្រជាពលរដ្ឋ នៅជិតនោះយកទៅបរិភោគឡើយ ៕</p>
<p style="text-align: center;"><img src="http://image.dap-news.com:81/dap-news/dap-images/2014/July/id-015/T-0660.jpg" alt="" width="500" /></p>
<p style="text-align: center;"><img src="http://image.dap-news.com:81/dap-news/dap-images/2014/July/id-015/T-0661.jpg" alt="" width="500" /></p>
</div>
<p style="text-align: right;"><a href="http://www.dap-news.com/2011-06-14-02-39-55/91741-2014-07-31-10-43-39.html" target="_blank">ផ្តល់សិទ្ធដោយ ៖ ដើមអម្ពិល</a></p>