<div class="item-page">
<p><span style="color: #000000;"><strong>(សៀមរាម)៖</strong> អធិការនគរបាលស្រុកពួក ខេត្តសៀមរាប លោក ទេព ពុំសែន បានប្រាប់ភ្នាក់ងារ Fresh News នៅព្រឹកថ្ងៃទី៨ ខែសីហា ឆ្នាំ២០១៦នេះ កាលពីយប់មិញ មានមនុស្សពី២០ទៅ២៥នាក់ មិនស្គាល់អត្តសញ្ញាណ បើករថយន្តចំនួន៦គ្រឿង ចូលទៅក្នុងវត្តសរស្តម្ភ ស្ថិតនៅភូមិសរស្តម្ក ឃុំសរស្តម្ក ស្រុកពួក គោលបំណងចង់ជជីកកកាយរកវត្ថុបូរាណ មានសំរឹទ្ធ ជាដើម ប៉ុន្តែសកម្មភាពទាំងនេះ មិនបានសម្រេចនោះឡើយ ដោយសារតែព្រះសង្ឃ និងគណ:កម្មការវត្តដឹងទាន់ ប្រកាសអាសន្ន ហើយវាយស្គរ បង្កឲ្យមានការភ្ញាក់ផ្អើល ទើបមនុស្សទាំងនេះ បានចេញទៅវិញភ្លាមៗផងដែរ។</span></p>
<p><span style="color: #000000;">លោកអធិការបានបន្តទៀតថា ពេលដែលពួកគេមកនោះ ពួកគេបានសែនព្រេននៅមុខខ្ទមអ្នកតា ដោយឃើញមាន់២ក្បាល សាច់ជ្រូកប្រហែលកន្លះគីឡូក្រាម និងផ្លែឈើមួយចំនួន ប៉ុន្តែក្រោយមានការប្រកាសអាសន្ននោះ ទើបពួកគេក៏ប្រញាប់ចេញទៅវិញ មិនទាន់បានជីកកកាយនោះឡើយ។</span></p>
<p><span style="color: #000000;">បើតាមអធិការនគរបាលរូបនេះ កាលពី២ឆ្នាំមុន ក៏មានមនុស្សមួយក្រុមប្រហែល ជាក្រុមរបស់ពួកគេនេះ បានចូលទៅក្នុងវត្តផងដែរ ដើម្បីជីកកកាយ តែមិនបានជោគជ័យនោះទេ ក៏ព្រោះតែមានការដឹងទាន់ពីព្រះសង្ឃ។</span></p>
<p><span style="color: #000000;">ដោយឡែកប្រជាពលរដ្ឋមូលដ្ឋានវិញ បានឲ្យដឹងថា ក្រុមមនុស្សទាំងនេះ ស្លៀកពាក់ឯកសណ្ឋានជាយោធា ហើយរថយន្តសុទ្ធតែទំនើបៗទៀតផង៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/8/8/40-2-08-08-2016--12-01-43.png"><img src="/FileManager/Articles/mce/2016/8/8/40-2-08-08-2016--12-01-43.png" alt="" /></a><br /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>
<div></div>
</div>