<p><span style="color: #000000;"><strong>(រតនគិរី)៖</strong> ដោយសារតែអត់ទ្រាំ និងមិនអាចនៅស្ងៀមតទៅទៀតបាននោះ ថ្នាក់ដឹកនាំ និងមន្រ្តីរាជការ នៅតាមអង្គភាពផ្សេងៗ ចំណុះឲ្យរដ្ឋបាលសាលាខេត្តរតនគិរី បានចេញមកបង្ហាញការត្អូញត្អែរ និងរិះគន់យ៉ាងខ្លាំង ដល់ប្រធាន-អនុប្រធានមន្ទីរសេដ្ឋកិច្ច និងហិរញ្ញវត្ថុខេត្តភាគឥសាន្តមួយនេះ ដោយាសារតែពួកគេទាំង២នាក់ មិនបានបំពេញការងារឲ្យមានប្រសិទ្ធភាពនោះទេ ពោលធ្វើឲ្យមានការរាំងស្ទះ យ៉ាងខ្លាំងដល់ការដកថវិកាទៅដល់អង្គភាពផ្សេងៗ ដើម្បីយកទៅប្រើប្រាស់ប្រចាំថ្ងៃ។</span></p>
<p><span style="color: #000000;">ថ្លែងប្រាប់អង្គភាព Fresh News នៅរសៀលថ្ងៃទី៩ ខែធ្នូ ឆ្នាំ២០១៦នេះ ថ្នាក់ជាន់ខ្ពស់ និងមន្រ្តីរាជការមួយចំនួននៅក្នុងខេត្តបានថ្លែងថា<strong>«លោក ទន់ សុថារ័ត្ន ប្រធានមន្ទីរ និងលោក ប៉ែន ហេង ជាអនុប្រធានមន្ទីរ អសកម្មការងារណាស់ មិនសាកសមជាថ្នាក់ដឹកនាំនោះទេ បង្ករាំងស្ទះដល់អង្គភាពផ្សេងៗ ចំណុះឲ្យរដ្ឋបាលខេត្តរតនគិរី ពាក់ព័ន្ធនឹងការ ដកថវិកាយកមកប្រើប្រាស់»</strong>។</span></p>
<p><span style="color: #000000;">បើតាមមន្រ្តីទាំងនេះ ជាក់ស្តែងនៅព្រឹកថ្ងៃទី៩ ខែធ្នូ ឆ្នាំ២០១៦នេះ លោកប្រធាន និងអនុប្រធាន មិនមានវត្តមានក្នុងការិយាល័យធ្វើការនោះទេ បែរជានាំគ្នាអង្គុយក្រៅរបងមន្ទីរក្នុងរោងលក់កាហ្វេ អង្គុយផឹកស៊ីយ៉ាងសប្បាយទៅវិញ ក្រោមរូបភាពគាស់កំប៉ុងស្រាបៀរ ABC ដាក់ក្នុងប៉ាន់តែ ស្រវឹងដាបទាំងព្រឹកតែម្តង។</span></p>
<p><span style="color: #000000;">ជាមួយគ្នានឹងភាពអសកម្មរបស់លោកប្រធាន និងអនុប្រធានទាំង២នាក់នេះ មន្ត្រីរាជការសាលាខេត្ត បូករួមទាំងមន្រ្តីនៅក្នុងមន្ទីរសេដ្ឋកិច្ចខេត្តតែម្តង បានសំណូមពរទៅថ្នាក់ដឹកនាំក្រសួងសេដ្ឋកិច្ច មេត្តាត្រួតពិនិត្យលើករណីនេះផង ដើម្បីឲ្យការងារដំណើការ ទៅដោយរលូន។</span></p>
<p><span style="color: #000000;">ពាក់ព័ន្ធការរិះគន់ពីមន្រ្តីជាន់ខ្ពស់ និងមន្ត្រីរាជការសាលាខេត្តខាងលើនេះ អង្គភាព Fresh News មិនទាន់អាចសុំការបំភ្លឺពីលោកប្រធាន និងអនុប្រធានបានទេនៅរសៀលថ្ងៃដដែលនេះ ដោយសារតែគ្មានលេខទូរស័ព្ទ៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-09-13-28-28-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-12-09-13-28-28-1.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>