<p><span style="color: #000000;"><strong>(វ៉ាស៊ីនតោន)៖</strong> បើសិនជាលោក ដូណាល់ ត្រាំ អាចផ្ដួលលោកស្រី ហ៊ីលឡារី គ្លីនតុន នៅក្នុងការបោះឆ្នោតថ្ងៃទី០៨ ខែវិច្ឆិកា នោះមានន័យថា លោកនឹងក្លាយជា មហាសេដ្ឋីជំនួញដំបូងគេ ដែលកាន់ដំណែងជាប្រធានាធិបតីអាមេរិក។ ក៏ប៉ុន្តែទន្ទឹមគ្នានោះដែរ បើតាមការចុះផ្សាយរបស់កាសែតថៃ Bangkok Post នៅរសៀលថ្ងៃចន្ទ ទី០៧ ខែវិច្ឆិកា នេះលោក ត្រាំ ត្រូវបានគេមើលឃើញថា អាចនឹងដើរតាមគន្លងរបស់មហាសេដ្ឋី មួយចំនួនដែលបានប្រឡូកចូលឆាកនយោបាយ ដូចជាអតីតនាយករដ្ឋអ៉ីតាលី លោក Silvio Berluconi ប្រធានាធិបតីអ៊ុយក្រែនបច្ចុប្បន្ន លោក Petro Poroshenko ឬក៏អតីតនាយករដ្ឋមន្រ្តីថៃ លោក ថាក់ស៊ីន ស៊ីណាវ៉ាត់ ជាដើម ដែលធ្លាប់បានប្រដូចលោក ត្រាំ នឹងរូបលោកផ្ទាល់។</span></p>
<p><span style="color: #000000;">ជាការពិតណាស់ លោក ថាក់ស៊ីន ធ្លាប់បានទទួលភាពបរាជ័យ ក្នុងជីវិតនយោបាយ និងកំពុងរស់នៅនិរទេសខ្លួន ហើយមិនតែប៉ុណ្ណោះ លោកក៏ធ្លាប់បានប្រឈមមុខផងដែរទៅនឹងការចោទប្រកាន់ ពីបទពុករលួយបន្ទាប់ពីគ្រួសាររបស់លោក លក់ក្រុមហ៊ុនមួយក្នុងតម្លៃ ១.៨ពាន់លានដុល្លារ ដោយមិនបានបង់ពន្ធចូលរដ្ឋ ជាហេតុបង្កឲ្យមាន វិបត្តិនយោបាយនៅក្នុងប្រទេសថៃ បន្ទាប់ពីលោកធ្លាក់ចេញពីតំណែង នាយករដ្ឋមន្ត្រីកាលពីឆ្នាំ២០០៦ ដោយរដ្ឋប្រហារយោធា ដូចនឹងប្អូនស្រីរបស់លោក ផងដែរ។</span></p>
<p><span style="color: #000000;">ងាកទៅមើលកាលដើមឆ្នាំ២០១៦ លោក ថាក់ស៊ីន បានលើកឡើងនៅក្នុងសារព័ត៌មាន Financial Times ថារូបលោក និងលោក ដូណាល់ ត្រាំ មានចំណេះដឹងប្រហាក់ប្រហែលគ្នានោះ គឺចំណេះដឹងក្នុងការចាប់ផ្ដើមធ្វើជាអ្នកជំនួញ។ លោកបន្ថែមថា «នៅពេលដែលអ្នកជំនួញ ទទួលបានជោគជ័យក្លាយជាអ្នកនយោបាយ ពួកគេនឹងផ្ដល់បរិយាកាសល្អដល់នយោបាយ នៅក្នុងប្រទេស»។ ការលើកឡើងបែបនេះ វាប្រាកដណាស់ថា លោក ថាក់ស៊ីន ស៊ីណាវ៉ាត់ មានទំនោរខ្លាំងទៅលើលោក ត្រាំ ហើយវាក៏ទំនងជាបង្ហាញថា ប្រសិនបើលោក ត្រាំ ជាប់នោះទំនាក់ទំនងរវាងថៃ និងអាមេរិក ក៏អាចនឹងកែប្រែមុខមាត់ថ្មី ផងដែរ៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/11/7/14d-07-11-2016--16-36-40.jpg"><img src="/FileManager/Articles/mce/2016/11/7/14d-07-11-2016--16-36-40.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>