<div>
<p><span style="color: #000000;"><strong>(ភ្នំពេញ)៖</strong> គិតត្រឹមថ្ងៃទី០២ ខែកុម្ភៈនេះ ខ្សែប្រយុទ្ធឆ្នើម ចាន់ វឌ្ឍនាកា របស់ក្លឹបបឹងកេតអង្គរ កំពុងមានប្រជាប្រិយភាពទទួលបានការគាំទ្រច្រើនជាងគេ នៅក្នុងកម្មវិធីប្រកួតប្រជែងពានរង្វាន់អត្តពលិក ដែលមានប្រជាប្រិយភាពជាងគេ(Cambodia Sports Award Ceremony) ។ ដោយឡែកកីឡាការិនីដ៏ស្រស់ស្អាត ២រូប គឺកីឡាការិនីហែលទឹកជម្រើសជាតិ ហែម ថុនវិទិនី និងកីឡាការិនីតេក្វាន់ ស៊ន សៀវម៉ី កំពុងទទួលបានការគាំទ្រយ៉ាងប្រកៀកប្រកិតពីសំណាក់ទស្សនិកជន ។</span></p>
<p><span style="color: #000000;">សម្រាប់រូបថតកីឡាករល្បីឈ្មោះក្នុងក្រុមជម្រើសជាតិកម្ពុជា ចាន់ វឌ្ឍនាកា បន្ទាប់ពីបង្ហោះឲ្យបងប្អូនប្រជាពលរដ្ឋធ្វើការបោះឆ្នោតតាមរយៈការចុក Like នៅលើ Page ផ្លូវការរបស់ Naga world រយៈពេលជាង ២ថ្ងៃកន្លងទៅ គឺបានទទួលការគាំទ្រចំនួន ៤,៣៣៤Like ហើយ ដោយចំនួននេះកំពុងនាំមុខអត្តពលិកផ្សេងៗ ដែលមានឈ្មោះបោះឆ្នោតក្នុងប្រភេទពានរង្វាន់អត្តពលិកមានប្រជាប្រិយភាពជាងគេ ដែលតាមពីក្រោយដោយកីឡាការិនី ស៊ន សៀវម៉ី និង ហែម ថុនវិទិនី ប៉ុន្ដែវ៉ាដាច់ខ្សែប្រយុទ្ធមកពីក្លឹបស្វាយរៀងព្រះខ័នរាជ ប្រាក់ មុន្នីឧត្តម ដែលទើបទទួលបានការគាំទ្រ ១,៨៦៨Like ប៉ុណ្ណោះ ។</span></p>
<p><span style="color: #000000;">ដោយឡែកកីឡាការិនីដ៏ស្រស់ស្អាត ហែម ថុនវិទិនី និង ស៊ន សៀវម៉ី វិញ ពេលនេះកំពុងតែទទួលបានការគាំទ្រយ៉ាងប្រកៀកប្រកិត ក្នុងនោះ ហែម ថុនវិទិនី ទទួលបានការគាំទ្រ ២,៥១១Like ឈរចំណាត់ថ្នាក់លេខ២ រីឯកញ្ញា ស៊ន សៀវម៉ី ទទួលបានគាំទ្រ ២,៣៣១Like ឈរចំណាត់ថ្នាក់លេខ៣ ។ ប៉ុន្ដែទោះជាយ៉ាងណា ឱកាសនៃការទទួលបានការគាំទ្រ ឬចុក Like នៅសល់ច្រើន រហូតដល់ម៉ោង ១២យប់ថ្ងៃទី១៧ ខែកុម្ភៈឯណោះ ទើបគណៈកម្មការរៀបចំកម្មវិធីបូកសរុបលទ្ធផល រកអ្នកឈ្នះពានរង្វាន់អត្តពលិកមានប្រជាប្រិយភាពជាងគេឃើញ ។</span></p>
<p><span style="color: #000000;">គួរបញ្ជាក់ថា សម្រាប់ជ័យលាភី នៃពានរង្វាន់អត្តពលិកមានប្រជាប្រិយភាពជាងគេ អ្នកឈ្នះ គឺទទួលបានប្រាក់រង្វាន់ ២ពាន់ដុល្លារ ប៉ុន្ដែមិនមានតែពាននេះទេ គឺមានពានរង្វាន់ជាច្រើនទៀត កំពុងរង់ចាំចូលរួមប្រកួតអត្តពលិកតំណាងសហព័ន្ធកីឡាជាតិដទៃទៀត រួមមានពានរង្វាន់អត្តពលិកឆ្នើម ដែលធ្លាប់បានមេដាយលើឆាកអន្ដរជាតិ គឺទទួលបានប្រាក់រង្វាន់ ៣ពាន់ដុល្លារ និងពានរង្វាន់កីឡាករ-កីឡាការិនីជនពិការឆ្នើម ទទួលបាន ១,៥០០ដុល្លារ និងពានរង្វាន់គ្រូបង្វឹកឆ្នើមប្រចាំឆ្នាំ សម្រាប់គ្រូបង្វឹកខ្មែរ ទទួលបាន ២ពាន់ដុល្លារ ។</span></p>
<p><span style="color: #000000;">លើសពីនេះគណៈកម្មការក៏បានផ្ដល់ឱកាសឲ្យក្រុមអ្នកសារព័ត៌មានកីឡាជាតិ ជ្រើសរើសអត្ថបទល្អ និងរូបភាពស្អាត ដាក់ឲ្យអ្នកគាំទ្របោះឆ្នោត ដើម្បីឈ្នះពានរង្វាន់ ១ពាន់ដុល្លារដូចៗគ្នាផងដែរ ៕</span></p>
<p style="text-align: center;"><span style="color: #000000;"><img src="http://images.vov.vn/videostore/Uploaded/congtacvien/2015_11_02/chan_1_HBGQ.jpg" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xfp1/v/t1.0-9/12662419_1044703778915713_1051464354336080709_n.jpg?oh=b38bb70ce41b8873a8926ec5f13bcfc5&oe=572B1346" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xpt1/v/t1.0-9/12592669_1044703795582378_2992755100788409211_n.jpg?oh=7ea9a3f94745ca14eedf20a120ca727d&oe=57383013" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xfp1/v/t1.0-9/12670148_1044703772249047_2936617151623582812_n.jpg?oh=13cf5212f2c7801ad88d4f1d3b10657c&oe=5732EEB6" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-g-a.akamaihd.net/hphotos-ak-xat1/v/t1.0-9/12439221_1044703818915709_5139937963015383520_n.jpg?oh=f7b62a9a8f000ec59778ec337f9135ba&oe=57401184&__gda__=1462943116_62bbf3b7eddaad8dd61640b0e526ad16" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>