<p>ប្រហែលជាឆ្នាំម្សាញ់ គឺជាឆ្នាំអាក្រក់សម្រាប់ស្ដ្រីត្រកូល Liu ម្នាក់នេះ នៅពេលពស់មួយក្បាលដែលត្រូវបានត្រាំក្នុងស្រា អស់រយៈពេលដល់ទៅ ៣ខែ បែរជាអាចងើបក្បាលឡើង ហើយបានវាយ ប្រហារលើស្ដ្រីរូបនេះ។<br /><br />ការរស់រាន មានជីវិតមួយរយៈពេលខ្លីនៅក្នុងស្រា គឺពិតជាអស្ចារ្យចំពោះសត្វពស់ ប៉ុន្ដែ ការបន្ដមានជីវិតដល់ទៅ ៣ខែ ហើយអាចមានកម្លាំងគ្រប់គ្រាន់ក្នុងការវាយប្រហារមនុស្ស ដូចករណីដែលបានកើតឡើងនៅប្រទេសចិន ថ្មីៗនេះ ប្រាកដជាធ្វើឱ្យមនុស្សទាំងឡាយ មានការភ្ញាក់ផ្អើល។</p>
<p style="text-align: left;">ទំព័រ China Daily បានឱ្យដឹងថា កាលពីថ្ងៃទី ៣ខែកញ្ញាកន្លងទៅ ស្ដ្រីម្នាក់មានត្រកូល Liu រស់នៅក្នុងក្រុង Shuangcheng នៃខេត្រ Heilongjiang ប្រទេសចិន ត្រូវបានពស់ដែលត្រាំក្នុងស្រា ចិកចំដៃ។ ការដែលត្រូវបានពស់ចិក ប្រហែលជាមិនគួរឱ្យភ្ញាក់ផ្អើលនោះទេ ប្រសិនពស់នោះកំពុងស្ថិតនៅខាងក្រៅដូចធម្មតា ប៉ុន្ដែនេះវាត្រូវបានគេត្រាំនៅក្នុងក្រឡស្រា អស់ជាច្រើនខែ។</p>
<p style="text-align: center;"> <a class="thickbox" title="" href="/FileManager/Commons/2013/9/10/snake-10-09-2013--20-31-35.jpg"><img style="display: block; margin-left: auto; margin-right: auto;" src="/FileManager/Articles/mce/2013/9/10/snake-10-09-2013--20-31-35.jpg" alt="" /></a>ស្រាថ្នាំដែលត្រាំសត្វពស់ គឺជាប្រភេទស្រាដែលត្រូវបានគេនិយមច្រើន នៅប្រទេសចិន</p>
<p>ប្រភពព័ត៌មានឱ្យដឹងថា អ្នកស្រី Liu បានទិញពស់នេះមកត្រាំស្រា កាលពីខែមិថុនា ដើម្បីធ្វើជាថ្នាំព្យាបាលជម្ងឺសន្លាក់។ ក្នុងថ្ងៃកើតហេតុ ខណៈដែលអ្នកស្រីកំពុងតែចាក់ស្រាបន្ថែមចូលក្នុងក្រឡ ក៏ស្រាប់តែពស់ដែលបានដាក់ត្រាំក្នុងនោះ ងើបក្បាលឡើង ខាំចំដៃតែម្ដង។ ប្រការនេះ មានន័យថា ពស់នោះនៅមានជីវិតនៅឡើយ បើទោះត្រូវបានត្រាំក្នុងស្រា អស់រយៈពេល ៣ខែកន្លងមកក៏ដោយ។<br /><br />ក្រោយពីត្រូវពស់ខាំភ្លាម អ្នកស្រី Liu ក៏ត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ប៉ុន្ដែ គ្រូពេទ្យឱ្យដឹងថា របួសនេះមិនធ្វើឱ្យប៉ះពាល់ដល់អាយុជីវិតនោះទេ។<br /><br />គួររំឭកថា កាលពីឆ្នាំ ២០០៩ នៅខេត្រ Hubei ប្រទេសចិន ក៏មានករណីស្រដៀងគ្នានេះកើតឡើង។ លោក Zhang ត្រូវបានពស់ដែលត្រាំនៅក្នុងស្រា ខាំ ប៉ុន្ដែរបួសមិនធ្ងន់ធ្ងរដូចករណីរបស់មនុស្សម្នាក់ផ្សេងទៀត រស់នៅក្នុងខេត្រ Guangxi កាលពីខែមេសា ឆ្នាំ ២០១។ ជនរងគ្រោះម្នាក់នេះ បានបាត់បង់ជីវិត ក្រោយពីត្រូវពស់ដែលត្រាំក្នុងស្រាខាំបានមួយថ្ងៃ។</p>
<p style="text-align: right;"><br />ដោយ ៖ តារា<br />ប្រភព ៖ China Daily/globaltimes<br /><br /></p>