<div class="article-content">
<p><strong>កណ្តាល :</strong> បុរសវ័យចំណាស់ ២នាក់ បានដេញកាប់គ្នា ពេញរមណីយដ្ឋានកៀនស្វាយក្រៅ បណ្តាលឲ្យរងរបួស រៀងៗខ្លួន ខណ:ពួកគេទាំង<strong></strong>ពីរនាក់នេះ ដណ្តើមគ្នារកកន្លែងចងអង្រឹងដេក ហើយត្រូវបាន សមត្ថកិច្ចដឹកបញ្ជូនទៅ សង្គ្រោះនៅមន្ទីរពេទ្យ ឯក្រុងភ្នំពេញ ។</p>
<p>ហេតុការណ៍កាប់ប្រហារគ្នា ព្រោះតែដណ្តើមទីតាំងចងអង្រឹងដេកនេះ កើតឡើង កាលពីវេលាម៉ោង ១១និង៣០ នាទី ថ្ងៃទី៥ ខែសីហា ឆ្នាំ២០១៤ ស្ថិតនៅក្នុងរមណីយដ្ឋាន ធម្មជាតិ កៀនស្វាយក្រៅ ក្នុងភូមិធំ ឃុំភូមិធំ ស្រុកកៀនស្វាយ ខេត្តកណ្តាល ។</p>
<p>លោក ប៉ា សំអិត អធិការ នគរបាលស្រុកកៀនស្វាយ បានឲ្យដឹងថា គូជម្លោះទាំងពីរនាក់នេះ ម្នាក់ឈ្មោះ ទិត ខិន អាយុ ៦៣ឆ្នាំ រស់នៅ ឃុំគោកចក ស្រុកកំពង់ត្របែក ខេត្តព្រៃវែង ។ ចំណែកភាគីម្ខាងទៀត ឈ្មោះ ចាន់ ជន់ អាយុ ៤៤ឆ្នាំ រស់នៅភូមិ ជប់ព្រីង ឃុំថ្មី ស្រុកកំពង់លាវ ខេត្តស្វាយរៀង ។ ពួកគេទាំង២នាក់នេះ រកស៊ីសុំទាននៅរមណីយដ្ឋានកៀនស្វាយ ។</p>
<p class="a3s">បើតាមសេចក្តីរាយការណ៍ របស់សមត្ថកិច្ច បានឲ្យដឹងថា មានបុរសជាអ្នកសុំទាន២នាក់ បានឈ្លោះគ្នា រឿងកន្លែង ចងអង្រឹង ដេកពេលថ្ងៃ ស្រាប់តែមួយសន្ទុះ ភាគីរងរបួសធ្ងន់ ឈ្មោះ ចាន់ ជន់ បានស្ទុះទៅដាល់មុខលើភាគីម្ខាងទៀតចំមុខ ជាច្រើនដៃ ខណ:នោះភាគី ឈ្មោះ ទិត ខិន បានយកពូថៅ កាប់ទៅលើឈ្មោះ ចាន់ ជន់ ជាច្រើនពូថៅ បណ្តាលឲ្យធ្លាយពោះវៀន រង របួសធ្ងន់ធ្ងរ ហើយត្រូវបានដឹកបញ្ជូន ទៅសង្គ្រោះនៅមន្ទីរពេទ្យបង្អែកកៀនស្វាយ ប៉ុន្តែដោយស្ថានភាពមុខរបួសធ្ងន់ធ្ងរ ទើប លោកអធិការ ប៉ា សំអិត អធិការស្រុកកៀនស្វាយ បញ្ជាឲ្យដឹកបន្តមកសង្គ្រោះនៅមន្ទីរពេទ្យ ឯក្រុងភ្នំពេញ ។</p>
<p class="a3s">បច្ចុប្បន្នជនដៃដល់ ឈ្មោះ ទិត ខិន ត្រូវបានសមត្ថកិច្ច កសាងសំណុំរឿងរឿង ដើម្បីចាត់ការតាមនីតិវិធី ច្បាប់ ។ ចំណែក អ្នករងរបួស ធ្លាយពោះវៀន ត្រូវបញ្ជូនទៅ សង្គ្រោះនៅមន្ទីរពេទ្យ ៕</p>
</div>
<p style="text-align: right;"><a href="http://www.dap-news.com/2011-06-14-02-39-55/92134-2014-08-05-08-44-31.html" target="_blank">ផ្តល់សិទ្ធដោយ ៖ ដើមអម្ពិល</a></p>