<div>
<p><span style="color: #000000;"><strong>(ភ្នំពេញ)៖</strong> ក្រុមជើងឯកលីកកំពូលកម្ពុជា ៦សម័យកាល ភ្នំពេញក្រោន នឹងបើកទ្វារកីឡដ្ឋាន RSN ទទួលស្វាគមន៍ក្រុមជើងខ្លាំង បឹងកេតអង្គរ នាវេលាម៉ោង ៥ល្ងាច ថ្ងៃទី០៦ ខែកុម្ភៈនេះ ដើម្បីស្វែងរកថវិកាសប្បុរសធម៌ តាមរយៈការលក់សំបុត្រក្នុងតម្លៃ ១,០០០រៀលប៉ុណ្ណោះ សម្រាប់ជួយដល់មន្ទីរពេទ្យគន្ធបុប្ផា ដែលកំពុងជួបការខ្វះខាត ។</span></p>
<p><span style="color: #000000;">តាមសេចក្ដីជូនដំណឹងរបស់ក្លឹបភ្នំពេញក្រោន បានឲ្យដឹងថា ការប្រកួតលក្ខណៈមិត្តភាពជាតិនេះ នឹងចាប់ផ្ដើមនៅម៉ោង ៥ល្ងាច ក្នុងន័យដើម្បីសប្បុរសធម៌ ក៏ដូចជាកម្ដៅសាច់ដុំត្រៀមរដូវកាលថ្មីផងដែរ ។ ប៉ុន្ដែក្នុងនាមជាក្លឹបបាល់ទាត់អាជីពដ៏មានសក្តានុពលនៅកម្ពុជា ក្លឹបទាំងពីរសូមសម្តែងការគាំទ្រពេញទំហឹងដល់លោកវេជ្ជបណ្ឌិត Beat Richner ក៏ដូចជាវេជ្ជបណ្ឌិត និងក្រុមការងារទាំងអស់នៅក្នុងមន្ទីរពេទ្យគន្ធបុប្ផា ដែលបានមើលថែ និងព្យាបាលកុមារក្នុងប្រទេសកម្ពុជា រាប់លាននាក់ចាប់តាំងពីឆ្នាំ១៩៩១ មក ។</span></p>
<p><span style="color: #000000;">ដើម្បីតបស្នងចំពោះការខិតខំរបស់ថ្នាក់ដឹកនាំ និងបុគ្គលិកការងារនៃមន្ទីរពេទ្យសប្បុរសធម៌នេះ ក្លឹបលំដាប់លីកកំពូលកម្ពុជាទាំងពីរ បានសំណូមពរដល់អ្នកគាំទ្រ ចូលរួមទស្សនាការប្រកួតមិត្តភាពខាងលើឲ្យបានច្រើនកុះករ ព្រោះតម្លៃសំបុត្រចូលរួមទស្សនាត្រឹមតែ ១,០០០រៀលប៉ុណ្ណោះ ហើយថែមទាំងបានរួម ចំណែកជួយដល់មន្ទីរពេទ្យគន្ធបុប្ផាទៀតផងដែរ ។</span></p>
<p><span style="color: #000000;">គួរបញ្ជាក់ថា នេះគឺជាការប្រកួតមិត្តភាពលើកទី៥ របស់ក្លឹបភ្នំពេញក្រោន ក្រោមការដឹកនាំគ្រូបង្វឹកថ្មី លោក Oriol Mohedano ទើបទទួលបានការតែងតាំង ជំនួយគ្រួបបង្វឹកជនជាតិស្វីសលោក Sam ដែលជួបគ្រោះថ្នាក់ចរាចរណ៍កាលពីពេលថ្មីៗកន្លងទៅ ។ សម្រាប់លទ្ធផលទទួលបានពីការដឹកនាំរបស់គ្រូបង្វឹក ជនជាតិអេស្ប៉ាញ នៅដើមឆ្នាំ២០១៦ នេះ គឺភ្នំពេញក្រោន ប្រកួតស្មើណាហ្គាវើល ១-១, ស្មើក្រុមស្វាយរៀងព្រះខ័នរាជ ០-០, ឈ្នះក្រុមក្រសួងការពារជាតិ ២-១ និងប្រកួតចុងក្រោយឈ្នះក្រុមអាស៊ីអឺរ៉ុប ៣-០ ។</span></p>
<p><span style="color: #000000;">ដោយឡែកក្រុមបឹងកេតអង្គរវិញ ទើបប្រកួតមិត្តភាពបាន ៣លើកទាំងលើកនេះប៉ុណ្ណោះ ដោយ២លើកមុន ប្រកួតស្មើក្រុមក្រសួងការពារជាតិ ១-១ រីឯប្រកួត ចុងក្រោយ ស្មើក្រុមស្វាយរៀងព្រះខ័នរាជ ២-២ នៅក្នុងជំនួបមិត្តភាពលើវាលស្មៅសិប្បនិម្មិតនៃកីឡដ្ឋានវេស្ទើន ៕</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xal1/v/t1.0-9/12417989_1045652928820798_1868105636941330854_n.jpg?oh=babc5fbe5fbc4254b6707fedcd1e5cc2&oe=576A7574" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xfp1/v/t1.0-9/12646945_1045652932154131_955097187341901143_n.jpg?oh=06bf587c07378c4ee45493b058583801&oe=573F6573" alt="" width="730" /></span></p>
<p style="text-align: center;"><span style="color: #000000;">ក្រុមភ្នំពេញក្រោន</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xtf1/v/t1.0-9/12661887_1045652925487465_244175455515765345_n.jpg?oh=7aafadbf56b5cf563f16034cc1f5b80e&oe=57238CE9" alt="" width="730" /></span></p>
<p style="text-align: center;"><span style="color: #000000;">ក្រុមបឹងកេតអង្គរ</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>