<p><strong>ភ្នំពេញ ៖</strong> មន្រ្តីអាវុធហត្ថ ជាគ្រូបង្រៀន បាញ់ស៊ីប នៅសាលាហ្វឹកហ្វឺន កំបូល ត្រូវបានសមត្ថកិច្ច រាយការណ៍ថា បានផ្ទុះអាវុធ ត្រូវចំកូនជាង ជួសជុល រថយន្តខ្លួនឯង បណ្តាលឲ្យរងរបួសធ្ងន់ត្រង់ជើងស្តាំ នៅយប់ថ្ងៃទី២៧ ខែមិថុនា ឆ្នាំ២០១៤ ស្ថិតនៅតាមផ្លូវទំនប់លេខ៧០ ក្នុងខណ្ឌទួលគោក ពោលនៅក្នុងកន្លែង ជួសជុលរថយន្តរបស់ខ្លួន ។ សេចក្តីរាយការណ៍ ពីសមត្ថកិច្ច មូលដ្ឋាន បានឲ្យដឹងថា មន្រ្តីអាវុធហត្ថរូបនេះមាន ឈ្មោះ ឡុង នាំស័រ អាយុ៥៣ឆ្នាំ ពាក់ស័ក្តិ៤កន្លះ ជាគ្រូបង្រៀនបាញ់ស៊ីប នៅសាលាហ្វឹកហ្វាត់កំបូល ។</p>
<p>ដោយឡែក ជនរងគ្រោះ ដែលជាកូនជាង ខាងបោកគក់ពូករថយន្តនោះ មិនទាន់ស្គាល់ អត្តសញ្ញាណ នៅឡើយទេ។ សមត្ថកិច្ច បានបន្តទៀតថា មុនពេលកើតហេតុ ជនបង្កជាម្ចាស់យានដ្ឋាន បានជួបជុំផឹកស៊ី ជាមួយកូនជាង ជួសជុលរថយន្ត របស់ខ្លួន នៅក្នុងហ្គារ៉ាស់ខាងលើនេះ ស្រាប់តែមិនដឹង មកពីមូលហេតុអ្វី ក៏មានការផ្ទុះអាវុធ ពីសំណាក់ ជនសង្ស័យបណ្តាលឲ្យ ត្រូវចំកូនជាងខ្លួន ឯងរងរបួសធ្ងន់ ។</p>
<p>បើតាមសេចក្តីរាយការណ៍ ជនបង្ករូបនេះ បានបាញ់ចំជើង ជនរងគ្រោះជា កម្មករផ្នែក បោកគក់កំរាលរថយន្ត បណ្តាលឲ្យ ចំកាំភួនជើង ខាងស្តាំ។ យ៉ាងណាក៏ដោយ គេមិនទាន់ពីមូលហេតុ ដែលនាំឲ្យមាន ការបាញ់ប្រហារ ខាងលើនេះ កើតឡើងនោះឡើយ។ ក្រោយកើតហេតុ ជនរងគ្រោះ ត្រូវបានដឹកបញ្ជូន ទៅកាន់មន្ទីរពេទ្យ ព្រះកេតុមាលា (ពេទ្យធំជិតវត្តភ្នំ) ហើយមួយសន្ទុះក្រោយមក គេបានឃើញជនសង្ស័យ ធ្វើដំណើរទៅកាន់មន្ទីរពេទ្យ ដើម្បីបង់លុយ ថ្លៃព្យាបាល ជូនជនរងគ្រោះ។</p>
<p>សេចក្តីរាយការណ៍ បានបន្តទៀតថា នៅពេលនេះ កម្លាំងអាវុធហត្ថ ខណ្ឌទួលគោក ដោយមានបញ្ជាពីលោក រ័ត្ន ស្រ៊ាង មេបញ្ជាការអាវុធហត្ថ រាជធានីភ្នំពេញ បានបញ្ជាឲ្យចាប់ខ្លួន និងនាំខ្លួនទៅកាន់ទី បញ្ជាការដ្ឋាន អាវុធហត្ថ រាជធានីភ្នំពេញ ដើម្បីចាត់ការបន្តទៀត ដោយឡែក កាំភ្លើងត្រូវបានសមត្ថកិច្ច នាំទៅយក ដែលជននេះលាក់ទុក នៅកន្លែង ជួសជុលរថយន្តខ្លួនឯង៕</p>
<p><img title=" " src="http://image.dap-news.com:81/dap-news/dap-images/2014/June/id-067/CH-01473.jpg" alt="" width="550" /></p>
<p><strong>ជនបង្កពេលកំពុងថ្លៃព្យាបាលដល់ជនរងគ្រោះ</strong> <strong>នៅមន្ទីរពេទ្យ ព្រះកេតុមាលា</strong></p>
<p><img src="http://image.dap-news.com:81/dap-news/dap-images/2014/June/id-067/CH-01472.jpg" alt="" width="550" /></p>
<p><strong>ជនរងគ្រោះរងរបួសធ្ងន់ត្រង់ជើងស្តាំ</strong></p>
<p><img title=" " src="http://image.dap-news.com:81/dap-news/dap-images/2014/June/id-067/CH-01469.jpg" alt="" width="550" /></p>
<p style="text-align: right;"><br />ផ្តល់សិទ្ធិដោយ៖ ដើមអម្ពិល</p>