<p><span style="color: #000000;">ភ្នំពេញ៖ ក្រសួងឧស្សាហកម្ម និងសិប្បកម្ម និងធនាគារពិភពលោក បានពិភាក្សាគ្នាផ្តោតលើដំណើរការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យនៅខេត្តចំនួន៦ ក្រោមគម្រោងហិរញ្ញប្បទានឥណទានសម្បទានរបស់ធនាគារពិភពលោក ដែលមានទឹកប្រាក់ជាង ៥៧លានដុល្លារ រយៈពេល៥ឆ្នាំ។</span></p>
<p><span style="color: #000000;">ជំនួបនោះ បានធ្វើឡើងរវាងរដ្ឋមន្ត្រីក្រសួងឧស្សាហកម្ម និងសិប្បកម្ម លោកទេសរដ្ឋមន្ត្រី ចម ប្រសិទ្ធ និងនាយកប្រតិបត្តិធនាគារពិភពលោកទទួលបន្ទុកវិស័យទឹកសកលប្រចាំតំបន់អាស៊ី លោក Takuya Kamata កាលពីថ្ងៃសុក្រ នៅទីស្តីការក្រសួង។</span></p>
<p><span style="color: #000000;">អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា បានមានប្រសាសន៍នៅថ្ងៃចន្ទនេះថា គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ដែលមានទឹកប្រាក់ចំនួន ៥៧,៥លានដុល្លាររបស់ធនាគារពិភពលោក ក្នុងនោះមានថវិកាបដិភាគរបស់រាជរដ្ឋាភិបាលចំនួន២,៥លានដុល្លារ សម្រាប់រយៈពេល៥ឆ្នាំ ចាប់ពីឆ្នាំ ២០១៩ ដល់ឆ្នាំ២០២៤ នឹងផ្តោតទៅលើការអនុវត្តលើវិស័យទឹកស្អាតក្នុងទឹកប្រាក់ចំនួន ៣២លានដុល្លារ និងវិស័យអនាម័យចំនួន ២៥,៥លានដុល្លារ។</span></p>
<p><span style="color: #000000;">លោកបន្តថា ការអនុវត្តគម្រោងនេះ បានកំណត់ទៅលើការពង្រីកបណ្តាញ និងផលិតកម្មនៅស្រុកស្ទោង ខេត្តកំពង់ធំ និងក្រុងសែនមនោរម្យ ខេត្តមណ្ឌលគិរី, ការអភិវឌ្ឍការផ្គត់ផ្គង់ទឹកស្អាតខ្នាតតូចនៅស្រុកភ្នំព្រឹក ខេត្តបាត់ដំបង និងឃុំមួយចំនួននៅខេត្តព្រៃវែង សៀមរាប និងកំពង់ឆ្នាំង។</span></p>
<p><span style="color: #000000;">លោកថា៖ «កន្លងមក នៅតាមទីប្រជុំជនខេត្តមួយចំនួន គឺយើងមានរដ្ឋាករផ្គត់ផ្គង់ទឹកស្អាតរបស់រដ្ឋយើងហើយ ក៏ប៉ុន្តែលទ្ធភាពយើងនៅមិនទាន់ឆ្លើយតបនឹងតម្រូវការប្រើប្រាស់ដែលកើនឡើងជារៀងរាល់ថ្ងៃ អីចឹងគម្រោងនេះនឹងជួយពង្រីកបណ្តាញចែកចាយទឹកស្អាតទៅតាមផ្ទះប្រជាពលរដ្ឋនៅតាមខេត្តគោលដៅ»។</span></p>
<p><span style="color: #000000;"><a class="thickbox" title="" href="/FileManager/Commons/2019/5/6/1-06-05-2019--16-41-21.PNG"><img src="/FileManager/Articles/mce/2019/5/6/1-06-05-2019--16-41-21.PNG" alt="" /></a><br /></span></p>
<p><span style="color: #000000;">អ្នកស្រី ប៉េង ណេ អាយុ ៦៧ឆ្នាំ រស់់នៅស្រុកព្រះស្តេច ខេត្តព្រៃវែង បាននិយាយនៅថ្ងៃចន្ទនេះថា ក្នុងតំបន់អ្នកស្រីរស់នៅ នៅពុំទាន់មានបណ្តាញទឹកស្អាតប្រើប្រាស់នៅឡើយ ប៉ុន្តែអ្នកស្រីរំពឹងថា តាមរយៈគម្រោងអភិវឌ្ឍន៍នានារបស់រាជរដ្ឋាភិបាល និងដៃគូរអភិវឌ្ឍន៍ នឹងអាចធ្វើឲ្យប្រជាពលរដ្ឋនៅតាមទីជនបទមានទឹកស្អាតប្រើប្រាស់ក្នុងពេលឆាប់ៗនេះ។ អ្នកស្រីថា៖ «បច្ចុប្បន្ន ខ្ញុំប្រើប្រាស់ទឹកភ្លៀងដែលបានត្រងទុកក្នុងពាង ហើយនិងទឹកស្រះ អីចឹងបើសិនមានការជួយលើវិស័យនេះ គឺជារឿងល្អ ប្រជាពលរដ្ឋនៅជនបទអាចមានទឹកស្អាតប្រើប្រាស់ដូចអ្នកនៅទីក្រុងដែរ»។</span></p>
<p><span style="color: #000000;">រដ្ឋមន្ត្រីក្រសួងឧស្សាហកម្ម និងសិប្បកម្ម លោកទេសរដ្ឋមន្ត្រី ចម ប្រសិទ្ធ បានថ្លែងក្នុងជំនួបពិភាក្សានោះថា គម្រោងនេះ មានសារសំខាន់ក្នុងការរួមចំណែកគោលដៅអភិវឌ្ឍន៍របស់រាជរដ្ឋាភិបាល និងក្រសួងលើវិស័យទឹកស្អាតសម្រាប់គោលដៅឆ្នាំ២០២៥។ លោកបានបញ្ជាក់ថា៖ «ក្រសួងកំពុងផ្តោតលើការផ្គត់ផ្គង់ទឹកស្អាត មិនតែក្នុងតំបន់ទីក្រុង និងទីប្រជុំជនទេ តែត្រូវយកចិត្តទុកដាក់ដល់ទីជនបទតាមលទ្ធភាពជាក់ស្តែង»។</span></p>
<p><span style="color: #000000;">លោកចម ប្រសិទ្ធ បានបន្ថែមទៀតថា ថ្មីៗនេះ រាជរដ្ឋាភិបាល បានសម្រេចមិនយកពន្ធចំពោះការនាំចូលឧបករណ៍សម្ភារៈមួយចំនួនធំ បម្រើឲ្យរោងចក្រផលិតទឹកស្អាតផងដែរ ដែលកិច្ចការនេះ ជាការយកចិត្តទុកដាក់របស់រាជរដ្ឋាភិបាលក្នុងការកាត់បន្ថយភាពក្រីក្រ និងលើកកម្ពស់សុខមាលភាពប្រជាពលរដ្ឋតាមរយៈការប្រើប្រាស់ទឹកស្អាតនេះ។</span></p>
<p><span style="color: #000000;">នាយកប្រតិបត្តិធនាគារពិភពលោកទទួលបន្ទុកវិស័យទឹកសកលប្រចាំតំបន់អាស៊ី លោក Takuya Kamata បានមានប្រសាសន៍ថា គម្រោងទឹកស្អាត និងអនាម័យនេះ ជាចំណុចចាប់ផ្តើមជាថ្មីលើការគាំទ្រក្នុងវិស័យទឹកស្អាតរបស់ធនាគារពិភពលោកដល់កម្ពុជា តាមរយៈការរៀបចំផែនការលម្អិត និងការធ្វើសកម្មភាពអនុវត្តគម្រោងរួមគ្នាជាមួយក្រសួងប្រកបដោយតម្លាភាព។ លោកថា ៖ «ធនាគារពិភពលោកសង្ឃឹមថា កិច្ចសហការរួមគ្នាលើការអនុវត្តគម្រោងនេះ នឹងទទួលបានផ្លែផ្កាស្របតាមគោលដៅដែលបានដាក់ចេញ»។</span></p>
<p><span style="color: #000000;">នៅក្នុងទិវាទឹកពិភពលោកលើកទី២៦ នៅរាជធានីភ្នំពេញ កាលពីខែមីនា លោក នួន ដាញ៉ិល រដ្ឋលេខាធិការក្រសួងអភិវឌ្ឍន៍ជនបទ បានឲ្យដឹងថា បច្ចុប្បន្ន មានប្រជាពលរដ្ឋនៅសហគមន៍ជនបទជាង ៣០ភាគរយ ដែលនៅមិនទាន់ទទួលបានសេវាទឹកស្អាតប្រើប្រាស់ ដែលករណីនេះទាមទារឲ្យភាគីពាក់ព័ន្ធទាំងអស់ ចូលរួមសហការគ្នាបន្ថែមទៀតក្នុងការដោះស្រាយបញ្ហានេះ ខណៈដែលរាជរដ្ឋាភិបាល ក៏បានដាក់ចេញនូវគោលនយោបាយជាតិ ស្តីពីការផ្គត់ផ្គង់ទឹកស្អាត និងអនាម័យជនបទ ដោយថា នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវទទួលបានសេវាផ្គត់ផ្គត់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តភាព ៕</span></p>
<p><span style="color: #000000;"><a class="c_tab" href="https://www.khmertimeskh.com/" target="_blank"><img src="/FileManager/Articles/mce/2019/5/6/khmertime-06-05-2019--16-41-32.png" alt="" /></a><br /></span></p>
<p style="text-align: right;"><span style="color: #000000;">ប្រភព ៖ khmertimes</span></p>
<div class="widget_text awac-wrapper">
<div class="widget_text awac widget custom_html-37">
<div class="textwidget custom-html-widget"><ins class="adsbygoogle" data-ad-client="ca-pub-7981514788931893" data-ad-slot="4059842397" data-ad-format="auto" data-full-width-responsive="true" data-adsbygoogle-status="done"><ins id="aswift_3_expand"></ins></ins></div>
</div>
</div>