<p><span style="color: #000000;"><strong>(ភ្នំពេញ)៖</strong> ក្រសួងទេសចរណ៍នៅថ្ងៃទី១២ ខែសីហា ឆ្នាំ២០១៦នេះ បានបើកកិច្ចប្រជុំការងារទេសចរណ៍ ជាមួយផ្នែកឯកជនក្នុងវិស័យទេសចរណ៍ ដោយបានបញ្ជាក់ពីកត្តាសំខាន់ចំនួន៥ចំណុច ដែលនាំឱ្យរាជរដ្ឋាភិបាលធ្វើការកែសម្រួលថ្លៃសំបុត្រ ចូលទស្សនាតំបន់អង្គរ ជូនភាគីពាក់ព័ន្ធទាំងអស់ឱ្យបានយល់ពីបញ្ហានេះ។</span></p>
<p><span style="color: #000000;">សេចក្ដីពន្យល់នេះ ត្រូវបានលើកឡើងដោយលោក ទិត ចន្ថា រដ្ឋមន្រ្តីស្ដីទីក្រសួងទេសចរណ៍ ដោយលោកបានឱ្យដឹងថា ការកែសម្រួលថ្លៃសំបុត្រនេះ គឺដើម្បីរួមចំណែកជួយកាត់បន្ថយភាពក្រីក្រ និងការងារមនុស្សធម៌ផ្ទាល់របស់ភ្ញៀវបរទេស ហើយមិនមែនជាការដំឡើងថ្លៃទេ គឺជា «ការកែសម្រួលថ្លៃ»។</span></p>
<p><span style="color: #000000;">កត្តាសំខាន់ទាំង៥ចំណុចនោះ រួមមាន៖ ទី១.ប្រាក់ដុល្លារកាលពី២២ឆ្នាំមុន មានតម្លៃថ្លៃ តែបច្ចុប្បន្នត្រូវធ្លាក់ចុះ ទើបត្រូវការកែសម្រួលថ្លៃឡើងវិញ ដើម្បីរក្សាតម្លៃ, ទី២.អង្គរ មានភាពល្បីល្បាញណាស់ ជាគោលដៅទេសចរណ៍លំដាប់ពិភពលោក មានវិសាលភាពធំធេង និងមានប្រាង្គប្រាសាទជាច្រើន ដែលមានអាយុកាលរាប់រយឆ្នាំ, ទី៣.ចំណូលនៃការចូលទស្សនាអង្គរ បាននិងកំពុងរួមចំណែកអភិវឌ្ឍសេដ្ឋកិច្ច សង្គមកម្ពុជា ទាំងនៅខេត្តសៀមរាប និងក្នុងប្រទេសទាំងមូល, ទី៤.ការកែសម្រួលថ្លៃនេះបានផ្ដល់ឱកាសដល់ទេសចរបរទេស ក្នុងការរួមចំណែកជួយដល់មន្ទីរពេទ្យគន្ធបុប្ផាដោយផ្ទាល់ តាមរយៈការចំណាយប្រាក់២ដុល្លារ ដើម្បីជួយដល់កុមារនៅកម្ពុជា, និងទី៥.បេតិក្ខភ័ណអង្គរ មានតម្លៃមិនអាចកាត់ថ្លៃបាន បើធៀបទៅនឹងរមីយដ្ឋានទេសចរណ៍ដទៃលើពិភពលោក ដែលថ្លៃចូលទស្សនាតំបន់ទាំងនោះ មានតម្លៃមិនតិចជាង១០០ដុល្លារនោះទេ ដូច្នេះតម្លៃចូលទស្សនាថ្មីនេះ មិនប៉ះពាល់ដល់ភ្ញៀវបរទេសឡើយ។</span></p>
<p><span style="color: #000000;">ជាមួយគ្នានេះ លោក លូ ម៉េង សហប្រធានផ្នែកឯកជននៃវិស័យទេសចរណ៍ បានបង្ហាញពីការគាំទ្រជាមួយរាជរដ្ឋាភិបាល ក្នុងការកែសម្រួលថ្លៃសំបុត្រចូលទស្សនាអង្គរ ដោយលោកបានបង្ហាញពីការចូលរួមវិភាគទានការជួយដោយផ្ទាល់ជួយដល់មន្ទីរពេទ្យគន្ធបុប្ផា ផងដែរ។</span></p>
<p><span style="color: #000000;">សូមជម្រាបថា នៅថ្ងៃទី១០ ខែសីហា ឆ្នាំ២០១៦ កន្លងទៅ ក្រសួងទេសចរណ៍បានចេញសេចក្ដីជូនដំណឹងមួយ ស្ដីពីការអនុវត្តថ្លៃសំបុត្រចូលទស្សនាអង្គរ ដោយបញ្ជាក់ពីតម្លៃកែសម្រួលថ្មីថា ភ្ញៀវដែលចូលទស្សនា១ថ្ងៃ ត្រូវបង់ថ្លៃសំបុត្រ៣៧ដុល្លារ, ចូលទស្សនា៣ថ្ងៃ ត្រូវបង់ថ្លៃសំបុត្រ៦២ដុល្លារ, ចូលទស្សនា៧ថ្ងៃ ត្រូវបង់ថ្លៃសំបុត្រ៧២ដុល្លារ៕</span></p>
<p><span style="color: #000000;"><img src="http://image.freshnewsasia.com//fn-2016-08-12-14-45-13-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com//fn-2016-08-12-14-45-20-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com//fn-2016-08-12-14-45-20-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com//fn-2016-08-12-14-45-20-2.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>