<p><span style="color: #000000;"><strong>(ភ្នំពេញ)៖</strong> ព្រះសង្ឃមួយចំនួននៅកម្ពុជាហាក់មានទស្សនៈខុសៗគ្នា ទៅនឹងច្បាប់ចរាចរណ៍ផ្លូវគោក ដែលអាចនឹងតម្រូវឱ្យប្រជាពលរដ្ឋ ពាក់មួកសុវត្ថិភាព នៅពេលនិមន្តតាមម៉ូតូម្តងៗ។ ដោយឡែកលើករណីព្រះសង្ឃពាក់មួកសុវត្ថិភាពឬអត់ នេះមានព្រះសង្ឃខ្លះគាំទ្រ ប៉ុន្តែព្រះសង្ឃខ្លះទៀត មិនគាំទ្រនោះទេ ដោយសំអាងថា ខុសធម៌វិន័យ។</span></p>
<p><span style="color: #000000;">ព្រះតេជគុណ ប៊ុត ប៊ុនទិញ ស្ថាបនិកនៃបណ្តាញព្រះសង្ឃឯករាជ្យ បានមានសង្ឃដីកាគាំទ្រទៅនឹង ការតម្រូវឱ្យព្រះសង្ឃពាក់មួកសុវត្ថិភាព ដើម្បីសុវត្ថិភាពដល់ព្រះសង្ឃនិមន្ត តាមម៉ូតូទៅណាមកណា។</span></p>
<p><span style="color: #000000;">ព្រះសង្ឃបានមានសង្ឃដីកាថា <strong>«រឿងព្រះសង្ឃពាក់មួកនេះ បើក្នុងវិន័យគឺខុស ព្រោះព្រះសង្ឃមិនគួរនឹងពាក់មួកនោះទេ ក៏ប៉ុន្តែដោយយើង គិតគូពីសុវត្ថិភាពសង្គម អត់មានអ្វីខុសទេ ពីព្រោះវានឹងជួយការពារអាយុជីវិតព្រះសង្ឃផង»</strong>។</span></p>
<p><span style="color: #000000;">ចំណែកសង្ឃទីប្រឹក្សា ព្រះតេជគុណ ហោ សុខុន ព្រះចៅអធិការវត្តច្បារអំពៅ ក៏ហាក់បានសម្តែងនូវការគាំទ្រចំពោះការតម្រូវឱ្យ ព្រះសង្ឃពាក់មួកសុវត្ថិភាពនេះដែរ។ ព្រះសង្ឃមានសង្ឃដីកាថា ព្រះសង្ឃទាំងអស់ ត្រូវគោរពតាមពុទ្ធឱវាទ, ហើយពុទ្ធឱវាទបានតម្រូវឱ្យព្រះសង្ឃ ដែលគង់នៅក្នុងស្រុកប្រទេសណាក៏ដោយ ត្រូវចូលរួមគោរពច្បាប់ប្រទេសនោះ ឬច្បាប់គណៈកម្មាធិការសង្ឃ ដូច្នេះបើប្រទេសតម្រូវឱ្យពាក់មួកសុវត្ថិភាព ដើម្បីសុវត្ថិភាពព្រះសង្ឃ ព្រះសង្ឃត្រូវគោរពតាមដែរ, ព្រោះព្រះពុទ្ធអង្គម្ចាស់ កាលនៅមានព្រះជន្ម ព្រះពុទ្ធក៏មានពុទ្ធដីកាថា ភិក្ខុសង្ឃទាំងឡាយត្រូវគោរពតាមអាណាចក្រនៃភូមិ ស្រុក ឬប្រទេសនោះ។</span></p>
<p><span style="color: #000000;">ទោះជាយ៉ាងនេះក្តីព្រះភិក្ខុ មាន ស៊ី ព្រះចៅអធិការវត្តភ្នំរាប់បាត ស្ថិតនៅឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង ពុំបានគាំទ្រទៅនឹង ការតម្រូវឱ្យព្រះសង្ឃពាក់មួកសុវត្ថិភាពនេះនោះទេ ដោយព្រះអង្គបានមានសង្ឃដីកាថា វិន័យធម៌ពុំបានចែងបែបនេះ ហើយថា ការយកអ្វីមកដាក់លើ ព្រះកេសរបស់ព្រះសង្ឃ គឺខុសនឹងវិន័យធម៌។</span></p>
<p><span style="color: #000000;">មាត្រាទី៨ ចំណុចទី៨ នៃច្បាប់ចរាចរណ៍ផ្លូវគោកថ្មី បានតម្រូវឱ្យអ្នកធ្វើដំណើរតាមម៉ូតូទាំងអស់ ពាក់មួកសុវត្ថិភាព ដែលក្នុងនោះមានទាំង កុមារអាយុ៣ឆ្នាំឡើងទៅផងដែរ។ ច្បាប់នេះមិនបានចែងលម្អិតអំពីករណីលើកលែងដល់ ព្រះសង្ឃពាក់មួកសុវត្ថិភាពនោះទេ។ នៅព្រឹកមិញនេះ សមត្ថកិច្ចជំនាញបានប្រជុំពិភាក្សាគ្នា ដើម្បីចេញសេចក្តីបំភ្លឺមួយថា តើត្រូវតម្រូវឱ្យព្រះសង្ឃពាក់មួកសុវត្ថិភាព ឬយ៉ាងណា៕</span></p>
<p><span style="color: #000000;"><a class="thickbox" title="" href="/FileManager/Commons/2016/1/6/1-6-2016-3-37-56-pm-06-01-2016--15-45-14.png"><span style="color: #000000;"><img src="/FileManager/Articles/mce/2016/1/6/1-6-2016-3-37-56-pm-06-01-2016--15-45-14.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ហ្វ្រេសញ៉ូវអាស៊ី</span></p>