<div class="ja-content-main">
<div class="article-content">
<p><strong>បាត់ដំបង៖</strong> តូបចំនួន ២៤៤តូប ក្នុងផ្សារភ្នំព្រឹក្ស ស្ថិតក្នុងទីរួមស្រុកភ្នំព្រឹក្ស ខេត្តបាត់ដំបង ត្រូវបានអគ្គិភ័យឆាបឆេះ អស់ទាំងស្រុងកាលពីវេលាម៉ោង ១១ និង៤៥នាទីយប់ថ្ងៃទី២១ ខែកក្កដា ឆ្នាំ២០១៤ បំផ្លាញទ្រព្យសម្បត្តិសម្ភារៈ របស់អាជីវករអស់រាប់សិបម៉ឺនដុល្លារ តែមិនបានបង្កគ្រោះថ្នាក់ដល់អាយុជីវិត ប្រជាពលរដ្ឋ និងផ្ទះប្រជាពលរដ្ឋនៅ ជិតខាងនោះទេ។</p>
<p>អធិការរងរនគរបាលស្រុកភ្នំព្រឹក្ស លោក សារ៉េត វិសេដ្ឋ បានថ្លែងប្រាប់មជ្ឈមណ្ឌលព័ត៌មានដើមអម្ពិលនាព្រឹកថ្ងៃទី ២២ ខែកក្កដា ឆ្នាំ២០១៤នេះថា រហូតដល់វេលាម៉ោង ៨ និង៣១នាទីព្រឹកថ្ងៃនេះ ការជួយអន្តរាគមន៍បាញ់ពន្លត់ ការឆាបឆេះក្នុងផ្សារនេះ មិនទាន់រលត់នៅឡើយទេ ពោលសកម្មភាពបាញ់ពន្លត់កំពុងបន្តនៅឡើយ។</p>
<p>លោក សារ៉េត វិសេដ្ឋ បានឲ្យដឹងផងដែរថា កម្លាំងសមត្ថកិច្ចពន្លត់អគ្គិភ័យ បានប្រើទឹកអស់ជាង ៣០រថយន្ត ហើយ ដើម្បីបាញ់ពន្លត់នៅកន្លែងឆាបឆេះ។</p>
<p>លោកអធិការរងនគរបាលស្រុកភ្នំព្រឹក្ស បានឲ្យដឹងថា ការឆាបឆេះនេះ បណ្តាលមកពីទុស្សេខ្សែភ្លើង ដែលផ្តើម ចេញពីតូបលក់ខោអាវ។ ផ្សារដែលរងការឆាបឆេះនេះ ជាផ្សារឯកជន របស់មេបញ្ជាការលេខ៥៣ លោក ជាភួង ភារម្យ។</p>
<p>បើតាមលោក សារ៉េត វិសេដ្ឋ ការឆាបឆេះនេះ បានបំផ្លាញទ្រព្យសម្ភារៈរបស់អាជីវករអស់រាប់សិបម៉ឺនដុល្លារ តែមិន ទាន់អាចបូកសរុបពីទំហំខូចខាតទាំងអស់បានទេ។</p>
<p>ទោះបីជាយ៉ាងណា អគ្គិភ័យនេះ មិនបង្កគ្រោះថ្នាក់ដល់អាយុជីវិតរបស់មនុស្ស និងប៉ះពាល់ដល់ផ្ទះប្រជាពលរដ្ឋ នៅជុំវិញផ្សារនោះឡើយ៕</p>
<p><img src="http://image.dap-news.com:81/dap-news/dap-images/2014/July/id-009/ST-124.jpg" alt="" width="550" /></p>
<p><img src="http://image.dap-news.com:81/dap-news/dap-images/2014/July/id-009/ST-125.jpg" alt="" width="550" /></p>
<p><img src="http://image.dap-news.com:81/dap-news/dap-images/2014/July/id-009/ST-126.jpg" alt="" width="550" /></p>
<p><img src="http://image.dap-news.com:81/dap-news/dap-images/2014/July/id-009/ST-127.jpg" alt="" width="550" /></p>
<p><img src="http://image.dap-news.com:81/dap-news/dap-images/2014/July/id-009/ST-128.jpg" alt="" width="550" /></p>
<p><img src="http://image.dap-news.com:81/dap-news/dap-images/2014/July/id-009/ST-129.jpg" alt="" width="550" /></p>
<p><img src="http://image.dap-news.com:81/dap-news/dap-images/2014/July/id-009/ST-130.jpg" alt="" width="550" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
<div></div>
</div>
</div>