<p><span style="color: #000000;">អ្នកត្រូវតែប្រឈមនឹងការពិត គ្មាននរណាម្នាក់នឹកចង់ ឆ្លងកាត់នូវការបែកបាក់គ្នានេះទេ។ ការផ្តាច់ទំនាក់ទំនងស្នេហា គឺតែងតែមាន សភាពគ្រោតគ្រាត បើទោះជាអ្នកនៅតែរក្សាទំនាក់ទំនង ក្នុងនាមជាមិត្តក៏ដោយ។ ប៉ុន្តែការភ្លេចមិត្តប្រុសម្នាក់ គឺជាផ្នែកមួយដ៏លំបាក សម្រាប់ស្ត្រីភាគច្រើន។ ទាំងនេះ គឺជាវិធីមួយចំនួន ដែលអ្នកអាចធ្វើបាន ដើម្បីជួយខ្លួនអ្នក ក្នុងការបំភ្លេចរូបគេ ក្រោយពីអ្នកទាំងពីរ បានបែកបាក់គ្នា។</span></p>
<p><span style="color: #000000;"><strong>០១) ស្វែងរកពីមូលហេតុពិតប្រាកដ</strong></span><br /><span style="color: #000000;">ប្រាកដណាស់ វាគឺជាការចាំបាច់មួយ។ អ្នកត្រូវគិតពីអ្វី ដែលមិនល្អ បានកើតមានចំពោះអ្នក ដែលវា អាចជាហេតុផលមួយឬច្រើនដែល សមស្របបំផុត ដែលអាចធ្វើឲ្យអ្នកសម្រេចចិត្តជ្រើសរើសយកផ្លូវនេះ។ បន្ទាប់មក អ្នកត្រូវគិតថាអ្នកទាំងពីរគឺប្រហែលជាមិនសាកសម ក្នុងការបន្តជីវិតរស់នៅ ជាមួយ គ្នាទៀតនោះទេ ហើយអ្នក ក៏មិនចង់ឲ្យវាបន្តនូវស្ថានភាពបែបនេះ អស់មួយជីវិតរបស់អ្នកដែរ។ ដូច្នេះ វាគ្មានជម្រើសណា ដែលត្រូវបង្ខំឲ្យខ្លួនអ្នកបន្តនៅក្នុងទំនាក់ទំនង ប្រេះឆាបែបនេះទៀតនោះទេ ។ ការយល់ឃើញបែបនេះនឹងអាចឲ្យ វាមានភាពងាយស្រូល សម្រាប់អ្នកក្នុងការទទូលយក នូវការ ពិត។</span></p>
<p><span style="color: #000000;"><strong>០២) មិនត្រូវគិតថា «ប្រសិនបើ…»</strong></span><br /><span style="color: #000000;">កាលបើអ្នកបានសម្រចចិត្តថា ចែកផ្លូវគ្នាហើយ នោះអ្នកមិនត្រូវគិតពីវាវិញ ម្តងទៀតនោះទេ។ នៅពេលណាដែលវាត្រូវបានធ្វើ រួចទៅហើយ វាមិនអាចបកក្រោយវិញទេ។ ដូច្នេះ អ្នកគួរតែបញ្ឈប់ នូវការគិតតែពី រឿងរ៉ាវល្អៗ ដែលបានកើតឡើងចំពោះអ្នក ក្នុងអំឡុងពេលដែលមានទំនាក់ទំនងល្អនោះ ។ ហើយអ្នកក៏មិនត្រូវបញ្ចុះបញ្ចូលខ្លួនឯងទៀតដែរថា ពេលវេលាអាក្រក់ៗទាំងនោះ គឺពិតជាមិនអាក្រក់ ដល់ ថ្នាក់នោះពេកទេ ។</span></p>
<p><span style="color: #000000;"><strong>០៣) បង្កើតនូវគម្លាតរវាងអ្នក និង គេ</strong></span><br /><span style="color: #000000;">បើទោះជាអ្នក នៅយល់ព្រមនឹងរក្សាទំនាក់ទំនងមិត្តភាពជាមួយនឹង អតីតមិត្តប្រុសរបស់អ្នក ក៏អ្នកមិន ត្រូវធ្វើការទាក់ទងទៅកាន់ គាត់ភ្លាមៗ បន្ទាប់ពីមានការចែកផ្លូវគ្នានេះដែរ។ វាមានន័យថា អ្នកមិនត្រូវ ទូរស័ព្ទទៅរកគាត់ និង ជួបគ្នាទៀតនោះទេ។ ព្យាយាមបន្ត អនាគតទៅមុខទៀតដោយគ្មានគេ ជំនួស ឲ្យការស្តាយក្រោយនូវអ្វីដែលអ្នកបានធ្វើ ពីមុនមក។</span></p>
<p><span style="color: #000000;"><strong>០៤) រៀនប្រឈមនឹងការពិត</strong></span><br /><span style="color: #000000;">វាមិនជាបញ្ហាអ្វីធ្ងន់ធ្ងរទេ ដែលអ្នកត្រូវមានអារម្មណ៍ថាទុក្ខសោកជាខ្លាំង បន្ទាប់ពីមានការបែក បាក់គ្នានេះ។ ប៉ុន្តែអ្នកត្រូវគិតផងដែរថា ខ្លួនអ្នកគឺជាមនុស្សល្អ ដែលហ៊ានទទួលយកកំហុសពីរបី ហើយវាមិនមែនតែអ្នកម្នាក់ឯងនោះទេ ដែលធ្វើវានោះ ។ ដូច្នេះអ្នកត្រូវរៀន ប្រឈមនឹងវាបន្តិចម្តងៗ ។</span></p>
<p><span style="color: #000000;"><strong>០៥) គ្រប់គ្រងនូវការគិតក្នុងផ្លូវអវិជ្ជមានរបស់អ្នក</strong></span><br /><span style="color: #000000;">អ្នកប្រហែលជាអាចស្អប់អតីតមិត្តប្រុសអ្នកជាខ្លាំង ឬ ថែមទាំងខ្លួនអ្នកទៀតផង ក្នុងរយៈពេលណា មួយ បន្ទាប់ពីមានការបែកបាក់នេះ។ ប៉ុន្តែអ្នកត្រូវព្យាយាមគិត ក្នុងផ្លូវវិជ្ជមាន និង មិនត្រូវធ្វើនូវអ្វី ដែលអ្នកមិនគួរធ្វើនោះទេ។ អ្នកអាចគ្រប់គ្រងនូវអារម្មណ៍ទាំងនេះបានដោយ ការធ្វើអ្វីមួយក្នុងផ្លូវ វិជ្ជមាន។</span></p>
<p><span style="color: #000000;"><strong>០៦) ដើរកំសាន្ត និង ពិភាក្សាបញ្ហាជាមួយនឹងមិត្តជិតស្និទ្ធរបស់អ្នក</strong></span><br /><span style="color: #000000;">អ្នកទាំងឡាយណា ដែលស្រលាញ់អ្នក នោះពួកគេនឹងតែងតែនៅជុំវិញខ្លួនអ្នក ក្នុងនោះមិត្តជិតស្និទ្ធ ក៏ត្រូវបានចាត់ទុកក្នុងក្រុមនេះ ផងដែរ។ ដោយសារថា ពួកគេនឹងជួយអ្នក ក្នុងការប្រមូលផ្តុំអារម្មណ៍ និង ដោះស្រាយនូវបញ្ហានេះ ជាមួយនឹងអ្នកដោយការផ្តល់ យោបល់ និង លើកទឹកចិត្តគាំទ្រអ្នក។</span></p>
<p><span style="color: #000000;"><strong>០៧) សរសេរកំណត់ហេតុឲ្យបានញឹកញាប់ តាមដែលអ្នកអាចធ្វើបាន</strong></span><br /><span style="color: #000000;">ការសរសេរ អាចជួយសម្រាលនូវការឈឺចាប់អ្នក បានជាច្រើន។ អ្នកអាចយកសៀវភៅ និង ប៊ិច មកសរសេរចេញនូវអ្វីដែលមាននៅ ក្នុងចិត្តអ្នក ឬ សរសេរជាកំណាព្យ ឬ សរសេររក្សាទុក ជាកំណត់ ហេតុមួយ។ អ្នកអាចសរសេរនូវរាល់អ្វីៗដែលកើតមានក្នុងអារម្មណ៍ អ្នកហើយអ្នកអាចនឹងមានការ ភ្ញាក់ផ្អើល ដែលថានៅពេលខ្លះ អ្នកហាក់នឹងសរសេរនូវអ្វីៗ ដែលអ្នកមិនបានដឹងខ្លួនទាល់តែសោះ។ វិធីនេះ គឺអាចធ្វើឲ្យអ្នកមានទំនាក់ទំនង យ៉ាងជិតស្និទ្ធនឹងខ្លួនឯង។</span></p>
<p><span style="color: #000000;"><strong>០៨) បោះចោលនូវអ្វីៗ ដែលអាចរំលឹករឿងចាស់ៗរបស់អ្នកបាន</strong></span><br /><span style="color: #000000;">ធ្វើការសម្អាតបន្ទប់របស់អ្នក និងបង្កើតកន្លែងមួយចំនួនសម្រាប់ខ្លួនអ្នក។ បោះចោលនូវអ្វីៗដែលជា របស់គាត់មានដូចជាសំបុត្រ សេ្នហា, វត្ថុអនុស្សាវរីយ៍ និង វត្ថុផ្សេងៗទៀតដែលអាច នាំឲ្យអ្នកនឹក ឃើញពីគាត់។ វិធីនេះនឹងជួយឲ្យវាមានភាពងាយស្រូល សម្រាប់អ្នក ក្នុងការបំភ្លេចគាត់ ប្រសិនបើអ្នក មិនបានឃើញនូវពួកវាបានដោយចៃដន្យ។</span></p>
<p><span style="color: #000000;"><strong>០៩) ស្វែងរកសុភមង្គលនៅកន្លែងផ្សេងទៀត</strong></span><br /><span style="color: #000000;">ដោយគ្រាន់តែអ្នកបែកគ្នា នោះមិនមែនបានន័យថា ពិភពលោកនេះត្រូវបានបញ្ចប់នោះទេ។វាមាននូវវិធីផ្សេងៗជាច្រើនទៀតដើម្បីស្វែង រកសុភមង្គល ដូចជាការចំណាយពេលនៅខាងក្រៅផ្ទះ ធ្វើនូវ សកម្មភាពរីករាយក្នុងសង្គមឬចំណាយពេលជាមួយនឹងក្រុមគ្រួសារ ជាដើម ។</span></p>
<p><span style="color: #000000;"><strong>១០) ធ្វើខ្លួនឲ្យសកម្ម</strong></span><br /><span style="color: #000000;">ការថែទាំរូបរាងកាយឲ្យបានសមសួន នឹងមានសុខភាពល្អ នឹងអាចជួយរក្សាផ្លូវចិត្តរបស់អ្នក ឲ្យចាកឆ្ងាយពីរឿងអ្វីផ្សេងៗទៀត តាមដែលអ្នកកំពុងតែផ្តោតអារម្មណ៍លើខ្លួនឯងបានកាន់តែច្រើន ជាងមុន។ ដូច្នេះ អ្នកអាចចេញក្រៅដើម្បីកំសាន្តឬចូលជាសមាជិក ក្លឹបកីឡា តាមដែលវិធីទាំងនេះ នឹងជួយអ្នកឲ្យឈប់គិតពីគាតា់បានជារឿយៗនោះ៕</span></p>
<p><span style="color: #000000;"><br /><a class="thickbox" title="" href="/FileManager/Commons/2017/2/10/06a-10-02-2017--10-59-08.jpg"><img src="/FileManager/Articles/mce/2017/2/10/06a-10-02-2017--10-59-08.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>