<p id="aui_3_2_0_1361"><span style="color: #000000;">បើទោះបីជាកម្មវិធីប្រមូលចូលវិញនូវ Galaxy Note 7 របស់ Samsung នៅលើទូទាំងពិភពលោក បានអនុវត្តហើយក្តី ប៉ុន្តែបញ្ហាថ្មរបស់ Note 7 នៅតែមិនទាន់បញ្ចប់។ អ្នកប្រើប្រាស់ជាច្រើននាក់នៅ កូរ៉េខាងត្បូង កំពុងតែមានការរអ៊ូរទាំ ទៅលើបញ្ហាថ្មរបស់ Galaxy Note 7 ដែលបានប្តូរថ្មីរបស់ពួកគេមានលេចចេញបញ្ហាចម្លែក។ </span></p>
<p><span style="color: #000000;">បើតាមសារព័ត៌មាន Korean Herald ដែលបានចុះផ្សាយកាលពីថ្ងៃសុក្រទី២៣ កន្លងទៅថ្មីៗនេះ បានឲ្យដឹងថា ប៉ុស្តិ៍ទូរទស្សន៍ YTN របស់កូរ៉េខាងត្បូងបានផ្សាយព័ត៌មានស្តីពីករណីនៃអតិថិជនម្នាក់គឺលោក Choi ដែលបានរអ៊ូរទាំទៅលើ Galaxy Note 7 ប្តូរថ្មីដែលទើបតែទទួលបានពី Samsung វាស្រកថាមពលថ្មយ៉ាងរហ័ស ពេលខ្លះតែមួយវិនាទី វាស្រកថាមពលថ្មអស់ ១% ទៅហើយ។ សូម្បីតែពេលកំពុងតែដោតថ្មសាក ថាមពលថ្ម Note 7 ប្តូរថ្មី នៅតែស្រកថាមពលថ្មទៀត។ ក្រៅពីនេះ ស្មាតហ្វូនក៏ ឧស្សាហ៍ឡើងកម្តៅខ្លាំងលើស កម្រិតផងដែរ។ </span></p>
<p><a class="thickbox" title="" href="/FileManager/Commons/2016/9/24/201609230008790-24-09-2016--14-04-46.jpg"><img src="/FileManager/Articles/mce/2016/9/24/201609230008790-24-09-2016--14-04-46.jpg" alt="" /></a></p>
<p><span style="color: #000000;">"បន្ទាប់ពីថាមពលថ្មធ្លាក់ដល់កម្រិត ១% ថ្មនៅលើ Galaxy Note 7 ប្តូរថ្មីរបស់ខ្ញុំមិនអាចសាកបានលើ ១០% ទៀតនោះទេ។ នៅពេលខ្ញុំយកទៅឲ្យបុគ្គលិកម្នាក់ នៅមជ្ឈមណ្ឌលសេវាកម្មរបស់ Samsung ត្រួតពិនិត្យបញ្ហានេះ គាត់បានដកខ្សែសាកចេញពីស្មាតហ្វូនយ៉ាងលឿន ប្រហែលជាគាត់ព្រួយខ្លាច លើបញ្ហាអាចផ្ទុះថ្មហើយមើលទៅ" លោក Choi បានឲ្យដឹង។</span></p>
<p><span style="color: #000000;">រឿងដែលគួរឲ្យចាប់អារម្មណ៍នោះគឺ លោក Choi មិនមែនជាមនុស្សតែម្នាក់គត់នោះទេ។ ចំនួនអ្នករអ៊ូរទាំ លើបញ្ហាស្រដៀងគ្នានេះ កំពុងតែមានការកើនឡើង ហើយអ្នកប្រើប្រាស់ដែលមានបញ្ហាទាំងអស់នោះ សុទ្ធតែជាអ្នកទទួលបាន Galaxy Note 7 ថ្មី ពីកម្មវិធីប្តូរថ្មីរបស់ Samsung កាលពី ប៉ុន្មានថ្ងៃមុននេះ។ </span></p>
<p><span style="color: #000000;">Samsung បានបញ្ជាក់ថា ពួកគេបានទទួលបណ្តារបាយការណ៍ ស្តីពីបញ្ហាថ្ម នៅលើ Galaxy Note 7ប្តូរថ្មីនៅកូរ៉េខាងត្បូង។ ជាក់ស្តែង ក្រុមហ៊ុនបានបដិសេធ រឿងដូចគ្នានេះ កើតឡើងនៅតាម បណ្តាទីផ្សារប្រទេសផ្សេងៗទៀត ដែលបានបើកលក់ Galaxy Note 7 ឡើងវិញ ដូចជានៅអាមេរិចជាដើម។</span></p>
<p><span style="color: #000000;">អ្នកតំណាងម្នាក់របស់ Samsung នៅពេលត្រូវបានគេសួរពីបញ្ហានេះ គាត់បានឲ្យដឹងថា បញ្ហានៅលើGalaxy Note 7 ប្តូរថ្មី "ពិតជាមិនមានពាក់ព័ន្ធនឹងថ្មនោះទេ" ហើយនោះអាចជា "បណ្តាករណីពិសេសដាច់ដោយឡែក" ពាក់ព័ន្ធនឹង កំហុសក្នុងដំណើរការផលិត។ បុគ្កលិកនេះ បាននិយាយបន្ថែមថា Samsung កំពុងតែធ្វើការ "ត្រួតពិនិត្យយ៉ាងដិតដល់" ស្តីពីបញ្ហានេះ សូមអ្នកប្រើប្រាស់កុំព្រួយបារម្ភខ្លាំងពេក៕</span></p>
<p><span style="color: #000000;"><a href="http://www.camnews.com.kh/News/Detail/30112/blackberry-maybe-stop-to-do-businees-about-smartphone-on-28-september"><span style="color: #0000ff;"><em>- BlackBerry អាចនឹងបិទទ្វារ ផ្នែកជំនួញទូរស័ព្ទ នៅថ្ងៃទី ២៨ កញ្ញា ខាងមុខនេះ?</em></span></a><a href="http://www.camnews.com.kh/News/Detail/32346/samsung-allowed-galaxy-note-7-which-recall-model-can-charge-80"><span style="color: #0000ff;"><em><br />- Samsung អនុញ្ញាត Galaxy Note 7 ដែលជាម៉ូដែលត្រូវប្រមូលចូលក្រុមហ៊ុនវិញ អាចសាកថ្មបាន ដល់ ៨០%</em></span></a><br /></span></p>
<p> </p>
<p style="text-align: right;"><em>ប្រែសម្រួល៖ មង្គល</em><br /><em>ប្រភព៖ Korean Herald, vreview</em></p>