<p><span style="color: #000000;"><strong>(សេអ៊ូល)៖</strong> យោធាកូរ៉េខាងត្បូងបាននិយាយថានៅថ្ងៃចន្ទនេះថា កូរ៉េខាងជើងអាចនឹងបាញ់សាកល្បងគ្រាប់ មីស៊ីលផ្លោងរយៈចំងាយមធ្យម Musudan នៅចំថ្ងៃដែលប្រជាជនអាមេរិកនាំគ្នាទៅបោះឆ្នោតជ្រើសរើសប្រធានាធិបតីថ្មី របស់ពួកគេនៅថ្ងៃទី០៨ ខែវិច្ឆិកាខាងមុខនេះ។ នេះបើយោងតាមការចេញផ្សាយនៅមុន នេះបន្តិចដោយសារព័ត៌មានកូរ៉េខាងត្បូង យ៉ុនហាប់ នាព្រឹកថ្ងៃចន្ទ ទី០៧ ខែវិច្ឆិកា ឆ្នាំ២០១៦។</span></p>
<p><span style="color: #000000;">ប្រភពដដែលបានឱ្យដឹងទៀតថា<strong> «ការរំពឹងទុកចំពោះការបាញ់សាកល្បងមីស៊ីលពីសំណាក់កូរ៉េខាងជើងបានធ្វើឡើងចំពេលដែលក្រុមអ្នកជំនាញបានសន្និដ្ឋានថា ទីក្រុងព្យុងយ៉ាងអាចនឹងបាញ់សាកល្បងគ្រាប់មីស៊ីលផ្លោង Musudan នៅអំឡុងថ្ងៃបោះឆ្នោតជ្រើសរើសប្រធានាធិបតីអាមេរិក ឬក៏ថ្ងៃប្រកាសលទ្ធផលដើម្បី ជាសារព្រមានដល់ប្រធានាធិបតីអាមេរិកថ្មី»</strong>។ ម្យ៉ាងវិញទៀតបើគេចាំមិនភ្លេចទេ ជាទម្លាប់កូរ៉េខាងជើងតែងតែដឹកនាំការបាញ់សាកល្បងមីស៊ីលនានា នៅពេលពិភពលោករៀបចំព្រឹត្តិការណ៍ធំៗម្ដងៗ ជាឧទាហរណ៍ដូចជាកិច្ចប្រជុំកំពូល G20 កាលពីប៉ុន្មានខែមុននេះ ឬក៏ការបោះឆ្នោតជ្រើសរើសប្រធានាធិបតីអាមេរិក កាលពីជំនាន់លោក បារ៉ាក់ អូបាម៉ា ជាដើម។ </span></p>
<p><span style="color: #000000;">គួរបញ្ជាក់ថាបើតាមប្រភពយោធាកូរ៉េខាងត្បូង ទីក្រុងព្យុងយ៉ាងទំនងជាកំពុងរៀបចំការបាញ់សាកល្បង មីស៊ីលប្រភេទ Musudan នៅក្នុងតំបន់ Kusong នៃខេត្ត Pyongan ភាគខាងជើងដែលជាទីកូរ៉េខាងជើង ធ្លាប់បានបាញ់សាកល្បងមីស៊ីល Musudan កាលពីថ្ងៃទី២០ ខែតុលា កន្លងទៅនេះ ខណៈទីក្រុងសេអ៊ូល និងសហរដ្ឋមេរិក ក៏កំពុងតាមដានផងដែរសកម្មភាពកូរ៉េខាងជើង នៅក្នុងតំបន់ដែលអាចមានការសាកល្បងអាវុធនុយក្លេអ៊ែរឈ្មោះ Punggye-ri នោះ៕</span></p>
<p><a class="thickbox" title="" href="/FileManager/Commons/2016/11/7/17-07-11-2016--14-15-08.jpg"><img src="/FileManager/Articles/mce/2016/11/7/17-07-11-2016--14-15-08.jpg" alt="" /></a></p>
<p style="text-align: right;"><span style="color: #000000;">ប្រភព ៖ យុនហាប់</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>
<p><a class="thickbox" title="" href="/FileManager/Commons/2016/11/7/17-07-11-2016--14-15-08.jpg"></a></p>