<p><span style="color: #000000;"><strong>(ប្រវត្តិសង្ខេប)៖</strong> ស្របពេលតារាសម្ដែងហូលីវូត និងជាអ្នកដឹកនាំរឿងលោកស្រី អេនជែលលីណា ចូលី (Angelina Jolie) បានបើកសម្ពោធជាលើកដំបូង នូវខ្សែភាពយន្ដ «ដំបូងពួកខ្មែរក្រហមសម្លាប់ឪពុករបស់ខ្ញុំ» ស្ដីពីរបបខ្មែរក្រហមនៅឯប្រាសាទអង្គរវត្ត ក្រោមព្រះរាជអធិបតីភាពដ៏ខ្ពង់ខ្ពស់បំផុតរបស់ ព្រះមហាក្សត្រនៃកម្ពុជា និងសម្តេចម៉ែ។ <strong>សូមយកប្រវត្តិដ៏ជូរចត់មិនគួរឲ្យជឿរបស់លោកស្រី Jolie មុនក្លាយជាស្ត្រីដ៏មានឥទ្ធិពលក្នុងពិភពហូលីវូត។</strong></span></p>
<p><span style="color: #000000;">* ឈ្មោះពេញ៖ Angelina Jolie Voight </span><br /><span style="color: #000000;">* កើតនៅថ្ងៃទី០៤ ខែមិថុនា ឆ្នាំ១៩៧៥(វ័យ៤១ឆ្នាំ) ក្នុងរដ្ឋកាលីហ្វញ៉ា សហរដ្ឋអាមេរិក</span><br /><span style="color: #000000;">* សញ្ជាតិ៖ អាមេរិក និងកម្ពុជា</span><br /><span style="color: #000000;">* មុខរបរ៖ តារាសំដែង អ្នកផលិតខ្សែភាពយន្ត និងសកម្មជនមនុស្សធម៌</span><br /><span style="color: #000000;">* ស្វាមី៖ បីរូបគឺលោក Jonney Lee Miller (រៀបការឆ្នាំ១៩៩៦ លែងលះឆ្នាំ២០០០)។ លោក Billy Bob Thornton (រៀបការឆ្នាំ២០០០ លែងលះឆ្នាំ២០០៣)។ លោក Brad Pitt (រៀបការឆ្នាំ២០១៤ លែងលះឆ្នាំ២០១៦)</span><br /><span style="color: #000000;">* កូន៖ ប្រាំមួយនាក់</span><br /><span style="color: #000000;">* ឪពុកម្តាយ៖ លោក Jon Voight និងលោកស្រី Marcheline Bertrand</span></p>
<p><span style="color: #000000;"><strong>* ជីវិតពីកុមារភាព និងគ្រួសារ៖</strong></span></p>
<p><span style="color: #000000;">កុមារី Jolie ជាកូនស្រីរបស់តារាសម្តែងគឺលោក Jon Voight និងលោកស្រី Marcheline Bertrand។ សាច់ញាតិមួយចំនួនរបស់នាងសុទ្ធតែជាតារាសម្តែង និងអ្នកនិពន្ធបទចម្រៀង។ ឪពុកនាង ជាជនជាតិអាល្លឺម៉ង់កាត់ស្លូវ៉ាគី ចំណែកខាងម្តាយរបស់នាងកាត់ច្រើនសាសន៍ដូចជា បារាំង កាណាដា ហូឡង់ និងអាឡឺម៉ង់។</span></p>
<p><span style="color: #000000;">បន្ទាប់ពីឪពុកម្តាយបែកបាក់គ្នាក្នុងឆ្នាំ១៩៧៦ នាង Angelina Jolie និងបងប្រុសបានរស់នៅជាមួយម្តាយ ដែលជាស្ត្រីម្នាក់សុខចិត្តបោះបង់ចោលមហិច្ឆតា និងមុខរបរជាតារាសម្ដែង មកផ្តោតការយកចិត្តទុកដាក់ក្នុងចិញ្ចឹមកូនទៅវិញ។ កាលនៅជាកុមារ ជាញឹកញាប់នាងតែងតែមើលខ្សែភាពយន្ដជាមួយម្តាយ ដែលនេះជាប្រភពបំផុសគំនិតនាងឱ្យចាប់អារម្មណ៍នៅក្នុងការសម្ដែង។</span></p>
<p><span style="color: #000000;"><a class="thickbox" title="" href="/FileManager/Commons/2017/2/21/08b-21-02-2017--09-40-45.jpg"><img src="/FileManager/Articles/mce/2017/2/21/08b-21-02-2017--09-40-45.jpg" alt="" /></a><br /></span></p>
<p><span style="color: #000000;">ក្នុងវ័យទើបប្រាំឆ្នាំនៅឡើយ កុមារី Jolie មានសមត្ថភាពក្នុងការសម្តែងរួមគ្នាជាមួយឪពុកក្នុងរឿង Lookin to Get Out ក្នុងឆ្នាំ១៩៨២។ នៅពេលដែល កុមារីរូបនេះ មានអាយុប្រាំមួយឆ្នាំ លោកស្រី Bertrand ដែលជាម្តាយ និងមិត្តប្រុសដែលជាអ្នកផលិតខ្សែភាពយន្តគឺលោក Bill Day បាននាំគ្រួសារ ទៅរស់នៅទីក្រុងញូវយ៉ក។ Jolie សម្រេចចិត្តចង់ក្លាយជាតារាសម្តែង ហើយបានចុះឈ្មោះចូលហ្វឹកហាត់នៅវិទ្យាស្ថានមហោស្រពLee Strasberg ដែលជាកន្លែងនាងបានទទួលការបណ្តុះបណ្តាល សម្រាប់រយៈពេលពីរឆ្នាំ និងផ្តល់ឱកាសឱ្យនាបានសម្តែងម្តងម្កាលផងដែរ។</span></p>
<p><span style="color: #000000;">និយាយពីការសិក្សាចំណេះដឹងមូលដ្ឋានវិញ នាងបានចូលសិក្សានៅសាលា Beverly Hill ជាកន្លែងធ្វើឱ្យនាងមានអារម្មណ៍ថា ឯកោបំផុតដោយសារទីនោះ សិស្សភាគច្រើន ជាកូនកើតក្នុងគ្រួសារសម្បូរបែប ខណៈដែលម្តាយរបស់នាងអាចរកប្រាក់ចំណូលទាបប៉ុណ្ណោះ។ នាងត្រូវបានគេសើចចំអកដោយសារ តែមានរូបរាងស្គមខ្លាំង ការពាក់វែនតា និងពាក់ឧបករណ៍ពុតធ្មេញ។</span></p>
<p><span style="color: #000000;">ដំបូងនាងមានបំណងចង់ក្លាយជាតារាបង្ហាញម៉ូដែល តែមិនបានជោគជ័យ។ ក្រោយមកនាងបានផ្លាស់ប្តូរទៅសិក្សានៅសាលា Moreno។ នៅទីនោះ សង្គមបានផ្លាស់ប្តូរនាងឱ្យក្លាយជាក្មេងស្រីម្នាក់មិនល្អ ក្លាយជាសមាជិកក្មេងបាតសង្គម ចូលចិត្តតែងខ្លួនប្លែកៗ ស្លៀកពាក់ខ្មៅ ចូលចិត្តការរាំរែក ប្រើប្រាស់កាំបិត រស់នៅជាមួយមិត្តប្រុសមិនល្អទាំងដែលនាងមានវ័យទើបតែ១៤ឆ្នាំនៅឡើយ។<strong> ពេលនោះនាងបានបោះបង់សាលាហ្វឹកហាត់ការសម្តែង បែរជាចង់ក្លាយជាអ្នកគ្រប់គ្រងពិធីបុណ្យសពទៅវិញ។ លើសពីនេះទៅទៀតនោះ នាងថែមទាំងបានសិក្សាពីរបៀបអប់សាកសពថែមទៀតផង។</strong></span></p>
<p><span style="color: #000000;">ក្នុងវ័យ១៦ឆ្នាំ បន្ទាប់ពីបញ្ចប់ទំនាក់ទំនងជាមួយមិត្តប្រុស នាងបានជួលផ្ទះរស់នៅដោយខ្លួនឯង ក្រោយមកទើបបន្តហ្វឹកហាត់ក្នុងនាមជាតារាសម្តែងវិញ។ រំលឹកដល់ពេលនោះ នាងបានលើកឡើងថា «ខ្ញុំនៅតែចង់ចាំក្នុងចិត្ត និងមានអារម្មណ៍ថាខ្ញុំគ្រាន់តែជាក្មេងបាតសង្គម ជាក្មេងស្រីដែលចូលចិត្តការចាក់សាក់ និងចូលចិត្តធ្វើរឿងគ្រោះថ្នាក់ម្នាក់ប៉ុណ្ណោះ»។</span></p>
<p><span style="color: #000000;">ស្ថិតក្នុងវ័យជំទង់ នាង Jolie មានអារម្មណ៍ថា វាជាការពិបាកក្នុងការបង្កើតទំនាក់ទំនងជាមួយមនុស្សជុំវិញខ្លួន នាងធុញធប់នឹងជីវិតរហូតហ៊ាន អារសាច់ខ្លួនឯង។ នាងបានលើកហេតុផលថា «ពេលខ្លះការកាត់សាច់ខ្លួនឯង ការទទួលអារម្មណ៍ឈឺចាប់ពីរឿងនេះ បែរជាធ្វើឱ្យខ្ញុំមានអារម្មណ៍រស់ឡើង វាហាក់ដូចជាការព្យាបាលអារម្មណ៍ ព្រោះវាធ្វើឱ្យខ្ញុំធូរស្រាលឡើងវិញ»។</span></p>
<p><span style="color: #000000;">ក្នុងវ័យ២០ឆ្នាំ នាងមានបញ្ហាគេងមិនលក់ និងញ៉ាំមិនបាន ដែលបានអូសទាញនាងឈានទៅប្រើប្រាស់ថ្នាំញៀនជាពិសេស គឺហេរ៉ូអ៊ីន។ មិនតែប៉ុណ្ណោះ Jolie ធ្លាប់មានជំងឺបាក់ទឹកចិត្ត និងមានសម្ពាធ រហូតមានបំណងចង់សម្លាប់ខ្លួនពីរដង គឺក្នុងវ័យ១៩ឆ្នាំ និង២២ឆ្នាំ ដោយចង់ជួលមនុស្សមកសម្លាប់នាងតែម្តង។</span></p>
<p><span style="color: #000000;">នៅក្នុងវ័យ២៤ឆ្នាំ នាងមានបញ្ហាសសៃប្រសាទរហូតស្វែងរកការព្យាបាល។ ពីរឆ្នាំក្រោយមក បន្ទាប់ពីទទួលយក Maddox ដែលជាកុមារជនជាតិខ្មែរ មកចិញ្ចឹមនោះ ជាពេលដែលនាងចាប់ផ្តើមរកឃើញស្ថិរភាពក្នុងជីវិត នាងបាននិយាយថា <strong>«មានម្តងនោះ ខ្ញុំធ្លាប់បានសន្យាជាមួយកូន Maddox ថា ខ្ញុំនឹងមិនសម្លាប់ខ្លួនជាថ្មីម្តងទៀតឡើយ»</strong>។</span></p>
<p><span style="color: #000000;">ស្ទើរពេញមួយជីវិតទៅហើយដែលទំនាក់ទំនងជាមួយឪពុកនាង ហាក់គ្មានភាពកក់ក្តៅទាល់តែសោះ បន្ទាប់ពីលោក Voight ចាកចេញពីគ្រួសារ ខណៈដែលកូនស្រីមានវ័យមិនទាន់គ្រប់មួយឆ្នាំផង។ ពេលវេលាជួបគ្នារវាងអ្នកទាំងពីរមានតិចតួចបំផុតហើយពេលខ្លះព្យាយាមសម្តែងភាពស្និតស្នាល នៅមុខអ្នកកាសែត។</span></p>
<p><span style="color: #000000;">នៅថ្ងៃ១៦ ខែកុម្ភៈ ឆ្នាំ២០១៣ ក្នុងវ័យ២៧ឆ្នាំ លោកស្រីបានវះកាត់ បន្ទាប់ពីដឹងថាខ្លូនមានហនិភ័យរហូតដល់៨៧ភាគរយ ក្នុងការវិវឌ្ឍន៍ឈានទៅរកជំងឺមហារីកសុដន់ ដោយសារមានហ្សែន BRCA1។ លោកស្រីបានលើកឡើងថា «ខ្ញុំមិនចង់រក្សារឿងនេះជារឿងសម្ងាត់ឡើយ ដោយសារមានស្ត្រីជាច្រើនដែលមិនបានដឹងថា ពួកគេអាចកំពុងរស់នៅក្រោមស្រមោលនៃជំងឺមហារីក។ ខ្ញុំសង្ឃឹមថា ពួកគេគួរតែធ្វើតេសន៍សាកល្បងលើ ហ្សែនរបស់ខ្លួន ប្រសិនបើគេមានហនិភ័យដែរនោះ ហេតុនេះពួកគេអាចនឹងមានជម្រើសច្រើនក្នុងការរួចផុតពីបញ្ហានេះ»។</span></p>
<p><span style="color: #000000;"><strong>* ជីវិតអាពាហ៌ពិពាហ៌៖</strong></span><br /><span style="color: #000000;">Jolie ធ្លាប់មានមិត្តប្រុសមិនល្អ រយៈពេលពីរឆ្នាំ ក្នុងវ័យ១៤ឆ្នាំ។ ម្តាយរបស់នាងបានអនុញ្ញាតឱ្យអ្នកទាំងពីររស់នៅផ្ទះរួមគ្នាជាមួយម្តាយ។ នាងបានរំលឹកថា ក្នុងពេលនោះអ្នកទាំងពីរធ្លាប់ហ៊ានធ្វើអ្វីៗដែលគ្រោះថ្នាក់ដល់ជីវិត មិនថានៅតាមដងផ្លូវ ឬសូម្បីក្នុងបន្ទប់គេង ក្បែរបន្ទប់ម្តាយរបស់នាង។ ការបែកបាក់គ្នា ជាមួយមិត្តប្រុសដំបូងរូបនេះ អាចថាជារឿងល្អមួយ ដោយបានជម្រុញឱ្យនាងសម្រេចបូជាជីវិតទៅលើការងារសិល្បៈ វិញ បន្ទាប់ពីឈានដល់ក្នុងវ័យ១៦ឆ្នាំ។</span></p>
<p><span style="color: #000000;">ក្នុងអំឡុងនៃការថតខ្សែភាពយន្ត Hackers ក្នុងឆ្នាំ១៩៩៥ Jolie មានទំនាក់ទំនងស្នេហាជាមួយតារាសម្តែងជនជាតិអង់គ្លេស គឺលោក Jonny Lee Miller ជាស្នេហាដំបូង បន្ទាប់ពីការបែកបាក់ជាមួយមិត្តប្រុសក្នុងវ័យជំទង់។ ពួកគេមិនបានទាក់ទងគ្នាជាច្រើនខែ បន្ទាប់ពីការថតខ្សែភាពយន្តត្រូវបានបញ្ចប់ទៅ តែក្រោយមកពួកគេបានទាក់ទងគ្នាឡើងវិញ ហើយរៀបការក្នុងខែមីនា ឆ្នាំ១៩៩៦។</span></p>
<p><span style="color: #000000;">អ្វីដែលគួរចាប់អារម្មណ៍ ក្នុងកម្មវិធីរៀបការនេះ នាងបានស្លៀកខោខ្មៅ អាវយឺតស ដោយមានសរសេរឈ្មោះកូនកម្លោះពីលើ ដោយប្រើប្រាស់ឈាមនាងផ្ទាល់តែម្តង។ យ៉ាងនេះក្តី ទំនាក់ទំនងរវាងអ្នកទាំងពីរត្រូវបានបញ្ចប់ ក្នុងខែកុម្ភៈ ឆ្នាំ១៩៩៩ ដោយផ្តើមចេញពីអ្នកស្រី Jolie ជាអ្នកស្នើលែងលះ។ ប៉ុន្តែពួកគេនៅតែរក្សាទំនាក់ទំនងល្អជាមួយគ្នា ដោយលោកស្រីបានហៅអតីតស្វាមីថា «បុរសនិងមិត្តចិត្តរឹង»។</span></p>
<p><span style="color: #000000;">កាន់តែគួរចាប់អារម្មណ៍នោះ មុនពេលរៀបការជាមួយ លោក Miller លោកស្រី Jolie ធ្លាប់បានបង្កើតទំនាក់ទំនងស្នេហាជាមួយតារាម៉ូឌែល ដែលជាស្រីដូចគ្នា គឺនាង Jenny Shimizu។ ក្រោយមកលោកស្រីបានលើកឡើងថា «ខ្ញុំប្រហែលជារៀបការជាមួយ Jenny ប្រសិនបើខ្ញុំមិនបានរៀបការជាមួយស្វាមីរបស់ខ្ញុំ។ ខ្ញុំបានលង់ស្រឡាញ់នាង នៅពេលដែលឃើញនាងក្នុងរយៈពេលត្រឹមប៉ុន្មាននាទីដំបូង»។</span></p>
<p><span style="color: #000000;">តាមការលើកឡើងរបស់ Jenny វិញ បានឱ្យដឹងថា ទំនាក់ទំនងពួកគេបានបន្តអស់រយៈពេលប៉ុន្មានឆ្នាំ បើទោះបីជា Jolie មានទំនាក់ទំនងជាមួយបុរសផ្សេង ទៀតក្តី។ ក្នុងឆ្នាំ២០០៣ នៅពេលដែលសួរថា តើ Jolie ជាមនុស្សដែលអាចស្រឡាញ់មនុស្សទាំងពីរភេទមែនទេ?</span></p>
<p><span style="color: #000000;">លោកស្រីឆ្លើយដោយឥតលាក់លៀមថា «ជាការពិត! ប្រសិនបើខ្ញុំលង់ស្រឡាញ់ស្ត្រីម្នាក់ ខ្ញុំអាចនឹងមានអារម្មណ៍ល្អ ហើយចង់ថើប និងប៉ះពាល់នាង។ វាជាការពិតណាស់!»។ ក្រោយមកបន្ទាប់ពីបង្កើតទំនាក់ទំនងគ្នាបានរយៈពេលពីរខែជាមួយលោក Billy Bob ពួកគេក៏រៀបការជាមួយគ្នាក្នុងថ្ងៃទី០៥ ខែឧសភា ឆ្នាំ២០០០ តែត្រូវបានលែងលះគ្នាក្នុងឆ្នាំ២០០៣។</span></p>
<p><span style="color: #000000;">ជីវិតអាពាហ៌ពិពាហ៌ត្រូវបានផ្អាកអស់រយៈពេលប្រមាណ១១ឆ្នាំ លោកស្រីក៏ផ្តើមមានទំនាក់ទំនង ជាមួយលោក Brad Pitt ហើយក៏រៀបការជាមួយគ្នាក្នុងឆ្នាំ២០១៤។ ជាអកុសល ជីវិតជាស្វាមីភរិយាបន្តបានត្រឹមរយៈពេលពីរឆ្នាំ អ្នកទាំងពីរ ក៏ដើរផ្លូវរៀងៗខ្លួនសារជាថ្មីម្តងទៀត។</span></p>
<p><span style="color: #000000;"><strong>* អំពីកូន៖ <br /></strong>លោកស្រី មានកូនចិញ្ចឹមប្រាំមួយនាក់ ដែលយកមកពីប្រទេសផ្សេងៗដូចជា៖</span></p>
<p><span style="color: #000000;">1. Maddox Chivan Jolie-Pitt ភេទប្រុស កើតថ្ងៃទី០៥ ខែសីហា ឆ្នាំ២០០១ អាយុ១៥ឆ្នាំ ត្រូវបានលោកស្រី Jolie យកមកចិញ្ចឹម ពីប្រទេសកម្ពុជានៅឆ្នាំ២០០២។</span></p>
<p><span style="color: #000000;">2. Pax Thien Jolie-Pitt ភេទប្រុស កើតថ្ងៃទី២៩ ខែវិច្ឆិកា ឆ្នាំ២០០៣ អាយុ១៣ឆ្នាំ ត្រូវបានលោកស្រី Jolie យកមកចិញ្ចឹមពីប្រទេសវៀតណាម នៅឆ្នាំ២០០៧។</span></p>
<p><span style="color: #000000;">3. Zahara Marley Jolie- Pitt ភេទស្រី កើតថ្ងៃទី០៨ ខែមករា ឆ្នាំ២០០៥ អាយុ១២ឆ្នាំត្រូវបានលោកស្រី Jolie យកមកចិញ្ចឹមពីប្រទេស អេត្យូពី នៅឆ្នាំ២០០៥។</span></p>
<p><span style="color: #000000;">4. Shiloh Nouvel Jolie-Pitt ភេទស្រី កើតនៅថ្ងៃទី២៧ ខែឧសភា ឆ្នាំ២០០៦ អាយុ១០ឆ្នាំ ត្រូវជាកូនលោកស្រី Jolie កើតនៅប្រទេសណាមីប៊ី។</span></p>
<p><span style="color: #000000;">5. Knox Leon Jolie-Pitt ភេទប្រុស កើតនៅថ្ងៃទី១២ ខែកក្កដា ឆ្នាំ២០០៨ <span>(កូនភ្លោះ)</span> អាយុ៨ឆ្នាំ កូនលោកស្រី Jolie កើតនៅក្នុងប្រទេស បារាំង។</span></p>
<p><span style="color: #000000;">6. Vivienne Marcheline Jolie-Pitt ភេទស្រី កើតនៅថ្ងៃទី១២ ខែកក្កដា ឆ្នាំ២០០៨ <span>(កូនភ្លោះ) </span>អាយុ៨ឆ្នាំ កូនលោកស្រី Jolie <span>កើតនៅក្នុងប្រទេស បារាំង</span>។</span></p>
<p><span style="color: #000000;"><strong>* អាជីពជាតារាសម្តែង៖</strong></span><br /><span style="color: #000000;">Jolie ចូលរួមសំដែងភាពយន្តជាលើកដំបូងតាំងពីវ័យទើបតែប្រាំឆ្នាំ ជាមួយឪពុករបស់នាង ក្នុងរឿងLookin' to Get Out ក្នុងឆ្នាំ១៩៨២ ប៉ុនែ្តអាជីពជា តារាភាពយន្តរបស់នាងចាប់ផើ្តមពិតប្រាកដ ក្នុងរយៈពេលមួយទសវត្សក្រោយមកគឺក្នុងអំឡុងឆ្នាំ១៩៩៣នៅក្នុងភាពយន្តតម្លៃទាបៗ។ នាងក្លាយជាតួឯក ដំបូងបង្អស់ ក្នុងភាពយន្តរឿង Hacker (១៩៩៥)។</span></p>
<p><span style="color: #000000;">លោកស្រី Jolie ធ្លាប់បានទទួលរង្វាន់ភាពយន្តប្រចាំឆ្នាំរបស់សហរដ្ឋអាមេរិច ក្នុងនាមជាតួរងដែលល្អជាងគេបំផុតសំរាប់ការសំដែងនៅក្នុងរឿង Girl, Interrupted(១៩៩៩)។ លោកស្រីចាប់មានកេរ្តិ៍ឈ្មោះល្បីល្បាញក្រោយពីបានសំដែងជាតួវីរះនារី នៅក្នុងរឿង Lara Croft in Lara Croft: Tomb Raider (២០០១)ដែលជាភាពយន្តដកស្រង់ចេញពីវីដេអូហេ្គម ហើយរឿងនោះបានធើ្វអោយលោកស្រីក្លាយទៅជាតារាស្រីម្នាក់ ក្នុងចំណោមតារាស្រីហូលីវូដ ដែលរកប្រាក់ចំណូលបានច្រើនជាងគេបំផុត។ ក្រោយមកលោកស្រីក៏បានសំដែងជាតួឯកនៅក្នុងរឿង Lara Croft Tomb Raider: The Cradle of Life(២០០៣)។</span></p>
<p><span style="color: #000000;">កេរ្តិ៍ឈ្មោះរបស់ស្ត្រីរូបនេះ កាន់តែល្បីល្បាញបន្ទាប់ពីបានដើរតួឯកនៅក្នុងរឿង Mr. & Mrs. Smith (២០០៥) និង Wanted (២០០៨)។ តារាសម្តែង ហូលីវូដរូបនេះ ទទួលបានការកោតសសើរកាន់តែខ្លាំង បន្ទាប់ពីការសំដែងនៅក្នុងរឿង A Mighty Heart (២០០៧) និង Changeling (២០០៨) ដែលធើ្វឲ្យតួអង្គឯករូបនេះ ទទួលបានឈ្មោះជាតួឯកស្រីល្អផ្តាច់គេប្រចាំឆ្នាំរបស់អាមេរិក។</span></p>
<p><span style="color: #000000;">ក្នុងឆ្នាំ២០០៨ ស្ត្រីរូបនេះ ត្រូវបានគេចាត់ទុកថា ជាតួអង្គហូលីវូដ ដែលរកបានប្រាក់ខ្ពស់បំផុតរហូតដល់ចន្លោះពី១៥ ទៅ២០លានដុល្លារក្នុងមួយរឿង ខណៈដែលតួអង្គផ្សេងទៀត ត្រូវបានបង្ខំឱ្យកាត់ប្រាក់ខែក្នុងរយៈពេលប៉ុន្មានឆ្នាំចុងក្រោយនេះ។ លោកស្រី Jolie ទទួលរង្វាន់ភាពយន្តប្រចាំឆ្នាំរបស់អាមេរិច ព្រមទាំងត្រូវបានស្សនាវដ្តី Forbes ឲ្យឈ្មោះថាជាតារាដែលរកប្រាក់ចំណូលបានច្រើនជាងគេបំផុត ក្នុងចំណោមតារាស្រីទាំងអស់នៅក្នុងឆ្នាំ២០០៩ និង២០១១។</span></p>
<p><span style="color: #000000;">លោកស្រីត្រូវបានគេឲ្យឈ្មោះថា ជានារីដែលស្អាតជាងគេបំផុតនៅលើពិភពលោក។ ក្រៅពីការងារជាតារាសម្តែង លោកស្រីក៏ទទួលបានឋានៈខ្ពង់ខ្ពស់ ក្នុងការងារមនុស្សធម៌ ដែលឋានៈនេះធើ្វអោយលោកស្រី កាន់តែទទួលបានការយកចិត្តទុកដាក់យ៉ាងក្រាស់ក្រែលពីបណ្តាញផ្សព្វផ្សាយនានា។</span></p>
<p><span style="color: #000000;">មិនត្រឹមតែជាតារាសម្តែង លោកស្រីក៏ជាអ្នកដឹកនាំរឿងផងដែរ។ ស្ត្រីដ៏ឆ្លៀសវៃរូបនេះបានដឹកនាំការថតភាពយន្តឯកសារមួយ ដែលមានឈ្មោះថា A Place In Time ក្នុងឆ្នាំ២០០៧។ រឿង In The Land of Blood and Honey ក្នុងឆ្នាំ២០១១ ក៏ជារឿងដែលលោកស្រីដឹកនាំផ្ទាល់ ដែលទទួលបានការគាំទ្រជាខ្លាំង ដោយវាជាខ្សែភាពយន្តដែលបង្ហាញពីក្តីស្រឡាញ់រវាងយោធាស៊ែប៊ី និងអ្នកជាប់ពន្ធធនាគារនៅប៊ូស្នី ដែលកើតឡើងក្នុងសង្គ្រាមប៊ូស្នី នៅរវាងឆ្នាំ១៩៩២ ដល់ឆ្នាំ១៩៩៥។ នៅមានខ្សែភាពយន្តជាច្រើនដែលត្រូវបានផលិតឡើងក្រោមស្នាដៃដឹកនាំដោយលោកស្រីផ្ទាល់។</span></p>
<p><span style="color: #000000;">បន្ទាប់ពីស្គាល់កម្ពុជាកាន់តែច្បាស់ លោកស្រីក៏បានចាប់អារម្មណ៍នឹងរឿងរ៉ាវសម័យខ្មែរក្រហម ហេតុនេះលោកស្រីបានសម្រេចផលិតខ្សែរភាពយន្តមួយដែលមាន ឈ្មោះថា First they Killed My Father(ដំបូងគេសម្លាប់ឪពុកខ្ញុំ) ក្នុងឆ្នាំ២០១៧ វាជាសាច់រឿងដែលកើតឡើងក្នុងសម័យនោះតែម្តង។ មិនត្រឹមតែដឹកនាំ រឿងប៉ុណ្ណោះទេ លោកស្រីថែមទាំងសហការណ៍គ្នាជាមួយមិត្តចាស់គឺ Loung Ung ដែលនៅចាំរឿងរ៉ាវទាំងអស់ក្នុងជំរុំពលកម្មកុមារក្នុងសម័យខ្មែរក្រហម ដើម្បីសរសេរសាច់រឿងនេះឡើង។ គោលបំណងចម្បងដើម្បីបំពេញតាមអារម្មណ៍ និងតម្រូវការរបស់ទស្សនិកជនជាខ្មែរ ទើបខ្សែភាពយន្តនេះ ត្រូវបានប្រើប្រាស់ទាំងតួអង្គ និងស្គ្រីបជាខ្មែរទាំងអស់។</span></p>
<p><span style="color: #000000;"><strong>* ការងារមនុស្សធម៌៖</strong></span><br /><span style="color: #000000;">ក្រៅពីអាជីពជាតារាសម្តែងស្ត្រីលេចធ្លោរូបនេះ ក៏បានចូលរួមចំណែកខ្ពស់ក្នុងវិស័យមនុស្សធម៌ផងដែរ ដោយលោកស្រីបានជួយដល់កិច្ចការ ជាច្រើនក្នុងនោះមានដូចជា៖ អគ្គរដ្ឋទូតសុឆន្ទៈប្រចាំអង្គការ UNHCR, ការអភិរក្សនិងការអភិវឌ្ឍសហគមន៍, អន្តោប្រវេសន៍កុមារ និងការអប់រំ, សិទ្ធមនុស្ស និងសិទ្ធស្ត្រី។ ដោយសារភាពជោគជ័យក្នុងនាមជាតារាសម្តែង និងការងារមនុស្សធម៌ ជម្រុញឱ្យលោកស្រីមានភាពល្បីល្បាញពាសពេញពិភពលោក និងទទួលបានពានរង្វាន់ជាច្រើន បានមកពីស្នាដៃដ៏លេចធ្លោរបស់ស្ត្រីដែលធ្លាប់មានប្រវត្តិជាក្មេងបាតសង្គមរូបនេះ៕</span></p>
<p><span style="color: #000000;"><strong>បកប្រែ និងសម្រួលដោយ៖ អ៉ិត ចណ្ណា</strong></span></p>
<p><span style="color: #000000;"><img src="http://image.freshnewsasia.com/2017/fn-2017-02-19-13-02-22-10.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/fn-2017-02-19-10-10-12-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/fn-2017-02-19-13-02-22-5.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/fn-2017-02-19-13-02-21-3.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/001/fn-2017-02-20-20-27-09-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/001/fn-2017-02-20-20-27-09-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/001/fn-2017-02-20-20-27-10-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/001/fn-2017-02-20-20-27-10-3.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>