<p><span style="color: #000000;"><strong>(ភ្នំពេញ)៖</strong> ទោះបីកំពុងហ៊ុំព័ទ្ធដោយរឿងអាស្រូវស្នេហ៍ជាមួយនារីក្រៅផ្ទះក្តី តែលោក កឹម សុខា ប្រធានស្តីទីគណបក្សសង្រ្គោះជាតិ នៅតែបន្តបេសកកម្មបង្ហាញមុខតាមវេទិកាសាធារណៈ គ្រាដែលមនុស្សជាច្រើននាក់ហើយត្រូវបានចាប់ខ្លួន និងជាប់ពន្ធ នាគារជាបន្តបន្ទាប់ព្រោះរឿងអាស្រូវស្នេហ៍មួយនេះ។</span></p>
<p><span style="color: #000000;">លោក កឹម សុខា បានប្រកាសនៅលើ Facebook របស់លោកនាព្រឹកថ្ងៃទី០៥ ខែឧសភា ឆ្នាំ២០១៦នេះថា នៅថ្ងៃទី០៦-០៧ ខែឧសភា លោកនឹងអញ្ជើញជាអធិបតីប្រកាសសុពលភាពថ្នាក់ដឹកនាំគណបក្សខេត្ត។</span></p>
<p><span style="color: #000000;">លោក កឹម សុខា បានឲ្យដឹងថា ថ្ងៃសុក្រ ទី០៦ ខែឧសភា វេលាម៉ោង ៨ព្រឹក លោកនឹងធ្វើពិធីនៅទីស្នាក់ការគណបក្សខេត្តកំពង់ធំ តាមផ្លូវជាតិលេខ៦ ភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។ ដោយឡែកថ្ងៃសៅរ៍ ទី០៧ ខែឧសភា វេលាម៉ោង ៨ព្រឹក ធ្វើនៅទីស្នាក់ការគណបក្សខេត្តសៀមរាប ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប។</span></p>
<p><span style="color: #000000;">សូមបញ្ជាក់ថា បច្ចុប្បន្នសំណុំរឿងអាស្រូវស្នេហ៍របស់លោក កឹម សុខា ជាមួយនារីក្រៅផ្ទះ ដែលត្រូវបានទម្លាយតាមទំព័រ Facebook «រឿងពិត CNRP» កំពុងនិងធ្វើឲ្យមានការចាប់អារម្មណ៍ខ្លាំងពីមជ្ឈដ្ឋាននានា។ តែទោះជាយ៉ាងណា លោក កឹម សុខា នៅតែបន្តរក្សាភាពស្ងប់ស្ងាត់ដោយអនុវត្តតាមទ្រឹស្តី «មិនឆ្លើយ មិនឆ្លង មិនឈ្លោះ»។</span></p>
<p><span style="color: #000000;">បើទោះបីជាលោក កឹម សុខា រក្សាជំហរមិនឆ្លើយតបទៅនឹងរឿងអាស្រូវនេះក្តី តែតួអង្គស្រីម្នាក់ ក្នុងចំណោមតួអង្គជាច្រើននាក់ គឺកញ្ញា ខុម ច័ន្ទតារាទី ហៅស្រីមុំ បានចេញសារភាព និងទទួលស្គាល់អាស្រូវស្នេហ៍របស់ខ្លួន ជាមួយលោក កឹម សុខា ព្រមទាំងបានប្តឹង លោក កឹម សុខា ទារសំណងជំងឺចិត្តប្រមាណ ៣០ម៉ឺនដុល្លារផងដែរ។</span></p>
<p><span style="color: #000000;">ក្រៅពីស្រីមុំ ការទម្លាយខ្សែអាត់សំឡេងរបស់ «រឿងពិត CNRP» បានធ្វើឲ្យកញ្ញា ធី សុវណ្ណថា សកម្មជន ដែលធ្លាប់តែគាំទ្រគណបក្សសង្រ្គោះជាតិ បានប្តឹងលោក កឹម សុខា ពីបទបរិហារកេរ្តិ៍ទារសំណងជំងឺចិត្ត ១លានដុល្លារផងដែរ។</span></p>
<p><span style="color: #000000;">តាមរយៈបណ្តឹងបរិហារកេរ្តិ៍របស់កញ្ញា ធី សុវណ្ណថានេះ លោក កឹម សុខា ត្រូវបានព្រះរាជអាជ្ញារងអមសាលាដំបូងរាជធានីភ្នំពេញ កោះហៅឲ្យចូលទៅបំភ្លឺនៅថ្ងៃទី១១ ខែឧសភា ឆ្នាំ២០១៦ខាងមុខ។</span></p>
<p><span style="color: #000000;">សំណុំរឿងអាស្រូវស្នេហ៍របស់លោក កឹម សុខា និងស្រីមុំ មិនត្រឹមតែនាំទុក្ខទោសដល់លោក កឹម សុខា នោះឡើយ បច្ចុប្បន្នមាន មនុស្សសរុប ៦នាក់ហើយ ត្រូវបានចាប់ និងឃុំខ្លួននៅពន្ធនាគារព្រៃស។ ជនទាំង ៦នាក់នោះរួមមាន៖ លោកមេឃុំ ស៊ាង ចែត មេឃុំ-ស្រុកកំពង់សៀម ខេត្តកំពង់ចាម លោក នី សុខា ប្រធានផ្នែកស៊ើបអង្កេត សមាគមអាដហុក លោក យី សុខសាន្ត អនុប្រធានផ្នែកស៊ើបអង្កេតសមាគមអាដហុក លោក ណៃ វ៉ងដា អនុប្រធានផ្នែកស៊ើបអង្កេត សមាគមអាដហុក លោកស្រី លឹម មុនី មន្រ្តីអង្កេតជាន់ខ្ពស់អាដហុក និង លោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/5/5/kim-05-05-2016--13-18-20.png"><img src="/FileManager/Articles/mce/2016/5/5/kim-05-05-2016--13-18-20.png" alt="" /></a><br /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>