<p><span style="color: #000000;"><strong>(ភ្នំពេញ)៖</strong> គណៈកម្មការទី៧ នៃរដ្ឋសភា គ្រោងនឹងកោះអញ្ជើញរដ្ឋមន្រ្តីក្រសួងអប់រំ និងរដ្ឋមន្រ្តីក្រសួងវប្បធម៌ មកសាកសួរជាថ្មីម្តងទៀត ពាក់ព័ន្ធនឹងការលក់ពហុកីឡដ្ឋាន និង រោងភាពយន្តចាស់ នៅក្នុងខេត្តកំពត នេះបើតាមលោក យ៉ែម ប៉ុញ្ញឫទ្ធិ ថ្លែងប្រាប់ FRESH NEWS ក្រោយពេលចុះត្រួតពិនិត្យស្ថានភាព នៅខេត្តកំពត រយៈពេល៣ថ្ងៃ មកនេះ ។</span></p>
<p><span style="color: #000000;">ប្រធានគណៈកម្មការរូបនោះបាននិយាយថា គណៈកម្មការទី៧ បានជួបជាមួយលោក ខូយ ឃុនហ៊ួរ អភិបាលខេត្តកំពត ដើម្បីសាកសួរពីបញ្ហានេះ ប៉ុន្តែត្រូវបានអាជ្ញាធរបញ្ជាក់ថា ការលក់ពហុកីឡដ្ឋាននៅក្នុងខេត្តកំពត មានការពាក់ព័ន្ធនឹងក្រសួងអប់រំ យុវជន និងកីឡា ដោយឡែកការលក់ រោងភាពយន្ត ពាក់ព័ន្ធនឹងក្រសួង វប្បធម៌ និងវិចិត្រសិល្បៈ ដែលរឿងនេះស្ថិតនៅខ្ពស់ពីដែនសមត្ថកិច្ច របស់អាជ្ញាធរខេត្ត។</span></p>
<p><span style="color: #000000;">លោក យ៉ែម បុញ្ញឫទ្ធិ ប្រធានគណៈកម្មកាទី៧ នៃរដ្ឋសភា បានបង្ហាញការសង្ស័យថា ទំនងជាមានការរៀបចំលាក់ទុក សម្ភារៈសាសនា របស់ជនជាតិវៀតណាម នៅលើភ្នំបូកគោ មុនពេលដែល គណៈកម្មការទី៧ ឡើងទៅដល់ កាលពីថ្ងៃទី១២ កន្លងទៅនេះ។ </span></p>
<p><span style="color: #000000;">ការចុះទៅត្រួតពិនិត្យស្ថានភាព នៅលើភ្នំបូកគោ មានភាពចំឡែកបំផុត ដោយទីតាំងសំខាន់ៗមួយចំនួន ដែលបង្ហាញក្នុង របាយការណ៍ របស់ អង្គការសង្គមស៊ីវិល ពាក់ព័ន្ធនឹងការរៀបចំពិធីសាសនានេះ ត្រូវបានគេសម្អាតយ៉ាងស្អាតខុសពីធម្មតា។</span></p>
<p><span style="color: #000000;">សូមជំរាបថា លោកយ៉ែម បុញ្ញឫទ្ធិ តំណាងរាស្រ្តគណបក្សសង្រ្គោះជាតិ បានដឹកនាំគណៈកម្មការទី៧ នៃរដ្ឋសភា ចុះត្រួតពិនិត្យស្ថានភាព នៅខេត្តកំពត និងខេត្តកែបរយៈពេល៣ថ្ងៃ ពីថ្ងៃទី១១ដល់១៣ ខែកុម្ភៈ កន្លងទៅនេះ៕</span></p>
<p><span style="color: #000000;"><a class="thickbox" title="" href="/FileManager/Commons/2015/2/15/70-15-02-2015--11-48-12.jpg"><img src="/FileManager/Articles/mce/2015/2/15/70-15-02-2015--11-48-12.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>