<p><span style="color: #000000;"><strong>(ភ្នំពេញ)៖</strong> លោកទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) រៀបចំសន្និសីទកាសែតមួយ នៅម៉ោង ៣៖០០រសៀល ថ្ងៃទី០៧ ខែមេសា ឆ្នាំ២០១៦នេះ ជុំវិញការឃាត់ខ្លួន និងសាកសួរទៅលើ លោក ស៊ុត ឌីណា អគ្គរាជទូតខ្មែរប្រចាំនៅ ប្រទេសកូរ៉េខាងត្បូង។</span></p>
<p><span style="color: #000000;">លោក ឱម យ៉ិនទៀង បានលើកឡើងថា៖ លោក ស៊ុត ឌីណា ត្រូវបានចោទប្រកាន់ចំនួន២បទល្មើស៖ ទី១៖ កិបកេងលុយខុសច្បាប់ និងទី២៖ រំលោភអំណាច នឹងអាចមានបទល្មើសផ្សេងទៀត ខណៈពេលនេះលោកកំពុងប្រឈមមុខ និងបទល្មើសដែលត្រូវចោទប្រកាន់ចំនួន២ ករណី ហើយលោកទេសរដ្ឋមន្រ្តី បានព្រមានថា អ្នកដែលធ្វើការផ្សព្វផ្សាយប្រឆាំង នឹងចំណាត់ការលើសំណុំរឿងលោក ស៊ុត ឌីណា អាចប្រឈមមុខនឹងបទ បរិហារហែកកេរ្តិ៍។</span></p>
<p><span style="color: #000000;"><strong>លោកទេសរដ្ឋមន្រ្តីប្រាប់ត្រួសៗ ថា លោក ស៊ុត ឌីណា មានដី១០កន្លែង និងផ្ទះប្រហែល២កន្លែង ហើយលោកនឹងសួរនាំទៅមន្រ្តីសូរិយោដី តាមខេត្ត តើលោក ស៊ុតឌីណា មានដីនិងទ្រព្យនៅទីណាទៀត ដើម្បីស្រួលធ្វើការទៀត។</strong></span></p>
<p><span style="color: #000000;">លោកទេសរដ្ឋមន្រ្តីបានបញ្ជាក់ថា សាច់ប្រាក់របស់លោក ស៊ុត ឌីណា នៅក្រៅធនាគារមានចំនួន៧,២លានដុល្លារ ហើយលោកអះអាងថា ខាងអង្គភាពរបស់លោកមានឯកសារគ្រប់គ្រាន់ដែលអាចបង្ហាញជូនថាគាត់មានលុយទាំងនេះ។</span></p>
<p><span style="color: #000000;"><strong>លោក ឱម យ៉ិនទៀង បានបញ្ជាក់ថា យើងរកឃើញសកម្មភាពដែលគាត់ចាយផ្ទាល់ខ្លួន៧៥០០ដុល្លារក្នុងមួយខែ និងសម្រាប់ស្ថានទូតជាង២ម៉ឺនដុល្លារ ក្នុងមួយខែ។</strong></span></p>
<p><span style="color: #000000;">លោកទេសរដ្ឋមន្រ្តី បានបន្តទៀតថា ការចាប់ខ្លួនមន្រ្តីក្រសួងការបរទេស២នាក់ កាលពីពេលថ្មីៗនេះ មិនមានការជាប់ពាក់ព័ន្ធជាមួយករណីលោក ស៊ុត ឌីណា នោះទេ គឺបទល្មើសខុសគ្នា។</span></p>
<p><span style="color: #000000;">លោកបានបន្តទៀតថា សម្រាប់មនុស្សមួយចំនួន ដែលបានសរសេរព័ត៌មាននៅតាមបណ្តាញសង្គម គឺជាមុខងាររបស់នគរបាលជាតិ ដែលពួកគេនឹងអាចដឹងពី Account ថា បានមកណា ដែលខាងនគរបាលមានសមត្ថភាពសម្រាប់ធ្វើកិច្ចការងារនេះ។ មានការបកស្រាយច្រើន សម្រាប់រឿងនេះ តែយើងយល់ឃើញថា ជាការបកស្រាយតាមអារម្មណ៍ ប៉ុន្តែឲ្យតែយើងមានឯកសារ គ្រប់គ្រាន់នោះយើង នឹងធ្វើហើយ។</span></p>
<p><span style="color: #000000;">លោក ឱម យ៉ិនទៀង បានបញ្ជាក់ទៀតថា សាច់លុយទាំងនេះយើងមិនដឹងថា នៅកន្លែងណានោះទេ តែយើងនឹងតាមរកទៀត ពីព្រោះយើងមាន ឯកសារជាក់លាក់។</span></p>
<p><span style="color: #000000;">លោកទេសរដ្ឋមន្រ្តី បានព្រមានចំពោះមន្រ្តីផ្សេងទៀតថា បើសិនមានការប៉ះពាល់ និងមានពាក្យបណ្តឹងនោះយើង នឹងចាប់ផ្តើមធ្វើហើយ។ លោកទេសរដ្ឋមន្រ្តីថា សម្រាប់ករណីនេះ លោកសុំមិនបញ្ចេញអត្តសញ្ញាណអ្នកដែលប្តឹង ហើយអ្នកដែលប្តឹងគឺ នៅតែសុំឲ្យលោកលាក់ ហើយតាមច្បាប់គឺ តម្រូវឲ្យលោកលាក់អត្តសញ្ញាណអ្នកបណ្តឹងទាំងនោះ។</span></p>
<p><span style="color: #000000;">លោកទេសរដ្ឋមន្រ្តី បានដកស្រង់សំដី លោក ស៊ុត ឌីណា បានប្រកាសនៅកូរ៉េថា <strong>«អញជាអ្នកទម្លាក់ ហោ ណាំហុង»</strong>។</span></p>
<p><span style="color: #000000;">លោក ឱម យ៉ិនទៀត បានឆ្លើយជាមួយអ្នកកាសែតករណីរឿងលោក កឹម សុខា <strong>គឺអង្គភាពរបស់លោកបានបើកស្រោមសំបុត្ររបស់លោក កឹម សុខា រួចហើយ</strong>។ សម្រាប់ទ្រព្យសម្បត្តិរបស់លោក កឹម សុខា ថា មានប៉ុន្មាននោះ លោកទេសរដ្ឋមន្រ្តី មិនទាន់អាចឆ្លើយបានទេ ពីព្រោះលោក កឹម សុខា មានអភ័យឯកសិទ្ធិ ដូច្នេះត្រូវធ្វើការបន្តទៀត។</span></p>
<p><span style="color: #000000;">សូមជំរាបថា លោក ស៊ុត ឌីណា ត្រូវបានសមត្ថកិច្ចអង្គភាពប្រឆាំងអំពើពុករលួយ ឃាត់ខ្លួនកាលពីព្រឹកថ្ងៃទី៤ ខែមេសា ឆ្នាំ២០១៦ បន្ទាប់ពីលោក បានមកដល់ប្រទេសកម្ពុជា ហើយបានបញ្ជូនទៅកាន់តុលាការក្រុងភ្នំពេញនៅព្រឹកថ្ងៃទី០៧ ខែមេសា ឆ្នាំ២០១៦៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/4/7/07-07-04-2016--16-37-05.jpg"><img src="/FileManager/Articles/mce/2016/4/7/07-07-04-2016--16-37-05.jpg" alt="" /></a><br /></span></p>
<p> </p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
<div><span><br /></span></div>