<p><span style="color: #000000;">(<strong>ភ្នំពេញ)៖</strong>ព្រះមហាក្សត្របានចេញ ព្រះរាជក្រឹត្យតែងតាំងលោក ឡុង ឌីម៉ង់ ជាឯកអគ្គរាជទូតវិសាមញ្ញ និងពេញសមត្ថភាពនៃកម្ពុជា ប្រចាំនៅកូរ៉េខាងត្បូង និងបានចេញព្រះរាជក្រឹត្យបញ្ចប់ភារកិច្ចលោក ស៊ុត ឌីណា ពីឯកអគ្គរាជទូតផងដែរ។ នេះបើយោងតាមព្រះរាជក្រឹត្យដែលអង្គភាព Fresh News ទើបទទួលបាននៅមុននេះនាល្ងាចថ្ងៃទី៩ ខែមេសា ឆ្នាំ២០១៦នេះ។</span></p>
<p><span style="color: #000000;">លោក ជុំ សុន្ទរី អ្នកនាំពាក្យក្រសួងការបរទេស បានអះអាងថា លោក ឡុង ឌីម៉ង់ មានលក្ខណៈសម្បត្តិប្រសើរផ្នែកទំនាក់ទំនងការទូត ដោយលោកបានបញ្ចប់សញ្ញាបត្រអនុបណ្ឌិត ផ្នែកទំនាក់ទំនងអន្តរជាតិ ហើយមានការយល់ដឹង និងបទពិសោធន៍ការទូតក្នុងនាមជាអ្នកនាំពាក្យ នៅក្នុងរដ្ឋបាលរាជធានីភ្នំពេញ ដែលមានទំនាក់ទំនងជាមួយ អង្គទូតនានា មានអត្តចរឹតល្អ ធ្វើឱ្យរាជរដ្ឋាភិបាលមើលឃើញ និងផ្តល់សេចក្តីទុកចិត្ត។</span></p>
<p><span style="color: #000000;">លោក សុន្ទរី លើកឡើងថា «ការជ្រើសរើស លោក ឡុង ឌីម៉ង់ ជាឯកអគ្គរាជទូតប្រចាំនៅកូរ៉េខាងត្បូងនេះ គឺផ្អែកលើលក្ខណៈសម្បត្តិរបស់លោក ឡុង ឌីម៉ង់ មិនមែនជាការជ្រើសរើសដោយផ្អែកលើ សែស្រឡាយ ឬផ្អែកលើកត្តាអ្វីមួយផ្សេងនោះទេ»។</span></p>
<p><span style="color: #000000;">អ្នកនាំពាក្យរូបនេះបានបន្ថែមថា «ការសិក្សារបស់គាត់ (ឡុង ឌីម៉ង់) គឺបញ្ចប់ផ្នែកអនុបណ្ឌិត ផ្នែកទំនាក់ទំនងអន្តរជាតិ ហើយនៅពេលដែលគាត់ធ្វើការងារនៅសាលាក្រុង គាត់ក៏ជាអ្នកនាំពាក្យរបស់សាលាក្រុង គាត់ក៏មានបទពិសោធន៍ផ្នែកទំនាក់ទំនងជាមួយ ភ្ញៀវបរទេស គណៈប្រតិភូអង្គទូតនានា ជាពិសេសនោះ គឺមូលដ្ឋានការសិក្សារបស់គាត់ ដែលអនុបណ្ឌិតមកពីប្រទេសបារាំង ផ្នែកទំនាក់ទំនងអន្តរជាតិ»។</span></p>
<p><span style="color: #000000;">លោក ឡុង ឌីម៉ង់ ដែលបច្ចុប្បន្នជា អ្នកនាំពាក្យតែមួយគត់នៃសាលារាជធានីភ្នំពេញ បានបញ្ចប់សញ្ញាបត្រមធ្យមសិក្សាទុតិយភូមិ នៅកម្ពុជា ក្នុងឆ្នាំ១៩៩៧ ហើយលោកបានទៅបន្តការសិក្សាថ្នាក់បរិញ្ញាបត្រ នៅមហាវិទ្យាល័យវិទ្យាសាស្រ្តសេដ្ឋកិច្ចប៉ារីស ដូហ្វីន ប្រទេសបារាំង ក្នុងឆ្នាំ២០០១ ដោយជ្រើសរើសជំនាញ វិទ្យាសាស្រ្តសេដ្ឋកិច្ច។ បន្ទាប់ពីនោះបាន៣ឆ្នាំ លោកក៏បានសិក្សា និងបញ្ចប់ថ្នាក់បរិញ្ញាបត្រជាន់ខ្ពស់ (អនុបណ្ឌិត) ជំនាញទំនាក់ទំនងអន្តរជាតិ នៅសាលាដដែលនេះ។</span></p>
<p><span style="color: #000000;">ក្រោយពីត្រឡប់មកកម្ពុជាវិញ លោក ឡុង ឌីម៉ង់ បានទទួលការងារជាជំនួយការអភិបាលរាជធានីភ្នំពេញ នៅឆ្នាំ២០០៥ ក្រោយមក ក្លាយជានាយករងខុទ្ទកាល័យសាលារាជធានីភ្នំពេញ បន្ទាប់មកទៀត ក្លាយជានាយករងទីចាត់ការរដ្ឋបាលសាលារាជធានីភ្នំពេញ ក្លាយជានាយកទីចាត់ការ ក្លាយជានាយករងរដ្ឋបាលសាលារាជធានីភ្នំពេញ និងបានក្លាយជាអ្នកនាំពាក្យសាលារាជធានីភ្នំពេញ ចាប់តាំងពីឆ្នាំ២០១២ រហូតមក។</span></p>
<p style="font-family: Hanuman,'Open Sans'; line-height: 25.5px; color: #333333;"><span style="color: #000000;">សូមជំរាបថា ចៅក្រមស៊ើបសួរលោក លាង សំណាត់ បានសម្រេចចេញដីកាឃុំខ្លួន លោក ស៊ុត ឌីណា ជាបណ្តោះអាសន្ន បន្ទាប់ពីលោក មាស ច័ន្ទពិសិដ្ឋ សម្រេចចោទប្រកាន់២បទ កេងយកប្រយោជន៍ដោយខុសច្បាប់ តាមមាត្រា៥៩៧ និង៥៩៨ នៃក្រមព្រហ្មទណ្ឌ និងបទរំលោភអំណាច តាមមាត្រា៣៥ ច្បាប់ស្ដីពីការប្រឆាំងអំពើពុករលួយ។ បទល្មើសនីមួយៗកំណត់ការផ្តន្ទាទោសពី២ឆ្នាំ ទៅ៥ឆ្នាំ និងពិន័យជាប្រាក់ពី៤លានរៀល ទៅ១០លានរៀល។</span></p>
<p style="font-family: Hanuman,'Open Sans'; line-height: 25.5px; color: #333333;"><span style="color: #000000;">អង្គភាពប្រឆាំងអំពើពុករលួយ បានឃាត់ខ្លួន លោក ស៊ុត ឌីណា ឯកអគ្គរាជទូតកម្ពុជាប្រចាំកូរ៉េខាងត្បូង កាលពីថ្ងៃទី០៤ ខែមេសា ឆ្នាំ២០១៦ គ្រាដែលរូបលោកចូលជួបឧបនាយករដ្ឋមន្រ្តី ហោ ណាំហុង។ លោក ឱម យ៉ិន ទៀង ប្រធានអង្គភាពប្រឆាំងអំពើពុករលួយ បានបញ្ជាក់ថា ការឃាត់ខ្លួនលោក ស៊ុត ឌីណា បានធ្វើឡើង បន្ទាប់ពីបានរកឃើញតម្រុយជាច្រើន ក្នុងនោះមានព័ត៌មានផ្សាយនៅលើ Facebook អំពីភាពមិនប្រក្រតីរបស់លោក ឌីណា រួមមានពាក្យប្តឹងពីក្រសួងការបរទេស ទាំងនៅភ្នំពេញ និងកូរ៉េខាងត្បូងផងដែរ៕</span></p>
<p style="text-align: center;"><span style="color: #000000;"><img src="https://fbcdn-sphotos-h-a.akamaihd.net/hphotos-ak-xal1/v/t1.0-9/12928277_488026814733011_6498064293403750687_n.jpg?oh=9147c2d8e06fcafcef3106fe4a4c1b61&oe=57BE6ACA&__gda__=1471797149_8f4f3ae90caf86ed828ff084959f957a" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xfp1/t31.0-8/12976862_538454492993013_8063707958170758969_o.jpg" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xpf1/v/t1.0-9/12924440_488018708067155_7359611451526985837_n.jpg?oh=43c3d05d8ae67f0273b21eb2185c206c&oe=57827B70" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>