<div class="col-sm-8 content-column">
<div class="single-container">
<div class="entry-content clearfix single-post-content">
<p><span style="color: #000000;"><strong>(ភ្នំពេញ)៖</strong> បើទោះបីជាគ្រួសារ បានចាត់ទុកថា វិស័យសិល្បៈ គឺសង្វៀនមួយ ដែលពោរពេញដោយគ្រោះថ្នាក់សម្រាប់ខ្លួន ក៏តារាសម្ដែងមានរូបឆោមលោមពណ៌ ស្រស់ស្អាត កញ្ញា សូ លីហ្សា នៅតែជំនះរនាំងមួយនេះ ដើម្បីចូលប្រឡូកក្នុងពិភពសិល្បៈ ដោយមិនបានខ្លាចរអាអ្វីនោះទេ ពោលគឺនាងគិតថា គ្រោះថ្នាក់ ឬមិនគ្រោះថ្នាក់ វាអាស្រ័យលើខ្លួនឯង ជាអ្នកប្រព្រឹត្ត ហើយនាង ក៏បានត្រៀមខ្លួនរួចជាស្រេច ដើម្បីបកស្រាយឲ្យមហាជនបានដឹងថា ខ្លួនកំពុងធ្វើអ្វី មានជាប់ដិតដាមលើរឿងអ្វីខ្លះ។</span></p>
<p><span style="color: #000000;">ការហ៊ាននិយាយថា ពិភពសិល្បៈពោរពេញ ដោយគ្រោះថ្នាក់ គឺដោយសារកន្លងមក តារាសម្ដែង តារាចម្រៀង ច្រើនដួងណាស់មកហើយ តែងតែរងនូវពាក្យនិន្ទា ច្រណែនឈ្នានីសគ្នា ការពេបជ្រាយពីមហាជន និងពាក្យចចាមអារ៉ាម ជុំវិញរឿងអាស្រូវស្នេហា ជាមួយអ្នកនេះ ជាមួយអ្នកនោះ រហូតអ្នកសិល្បៈខ្លះ ត្រូវរងនូវភាពអាម៉ាស បាត់កេរ្តិ៍ឈ្មោះ កិត្តិយស ហើយក៏មានអ្នកខ្លះ ត្រូវប្រឈមមុខនឹងគ្រោះថ្នាក់ដល់ជីវិតទៀតផង ប្រសិនបើតារានោះ ត្រូវបានប្រមាញ់ស្នេហ៍ពីក្រុមមនុស្សមានអំណាច មានឥទ្ធិពល ក្នុងសង្គម។</span></p>
<p><span style="color: #000000;">យ៉ាងណាមិញ ស្រីស្រស់រាងខ្ពស់ស្រឡះ មានមន្តស្នេហ៍ កញ្ញា សូ លីហ្សា មិនសូវបានចេញមុខចេញមាត់ខ្លាំង ដូចអ្នកសិល្បៈដទៃឡើយ ខណៈដែលសម្ផស្សរបស់នាង បានក្លាយជាទីចាប់អារម្មណ៍ខ្លាំង របស់ក្រុមកន្លង់ៗ សម្បូរទ្រព្យចាយលែងអស់ ដែលចូលចិត្តជះដុំដុល្លារ រាយអន្ទាក់ស្នេហ៍ ចង់យករូបនាងមកធ្វើជាស្រីកំណាន់ចិត្ត ទាំងខ្លួនមានជាប់ពាក់ព័ន្ធ នឹងប្រពន្ធកូន។ ចំណុចនេះហើយ បានធ្វើឲ្យតារាសម្ដែង សូ លីហ្សា ត្រូវបានគ្រួសារឃាត់ឃាំង មិនឲ្យប្រឡូកក្នុងវិស័យមួយនេះ ដែលគ្រួសារនាង បានចាត់ទុកថា អាចមានគ្រោះថ្នាក់ដល់ខ្លួន។</span></p>
<p><span style="color: #000000;">ជួបជាមួយ Khmertalking ស្រីស្រស់សម្ផស្សឆើតឆាយ កញ្ញា សូ លីហ្សា បានថ្លែងថា មូលហេតុដែលនាង មិនបានចេញមុខចេញមាត់ខ្លាំង ក្នុងការងារសិល្បៈ ព្រោះតែគ្រួសារបានហាមឃាត់ ដោយឪពុកម្ដាយមិនចង់ឮពាក្យថា កូនស្រីមានរឿងរ៉ាវ ស្នេហាត្រីកោណ ឬទាក់ទងជាមួយ អ្នកមានម្ចាស់ណាម្នាក់នោះទេ។ គ្រួសារ តែងតែចង់ឲ្យកូនជៀសផុត ពីរឿងអាស្រូវទាំងឡាយ ប៉ុន្តែដោយសារតែចិត្តស្រឡាញ់ខ្លាំង មិនអាចកាត់ផ្ដាច់បាន ទើបនាងសម្រេចចិត្ត ជំនះរនាំងគ្រួសារ ចូលមកកាន់តំបន់ ដ៏គ្រោះថ្នាក់នេះវិញ។</span></p>
<p><span style="color: #000000;">សូ លីហ្សា និយាយថា « ច៎ាបង.. ប៉ាម៉ាក់មិនចង់ឲ្យខ្ញុំ ប្រឡូកក្នុងសិល្បៈទេ គាត់ខ្លាចខ្ញុំមានរឿងជាមួយអ្នកនេះ ឬអ្នកនោះ ព្រោះគាត់បានឃើញ អ្នកសិល្បៈច្រើនហើយ ដែលរងគ្រោះរបៀបនេះ។ តែខ្ញុំគិតថា រឿងហេតុយ៉ាងណា កើតឡើងចំពោះខ្លួន ក៏ដោយសារតែមកពីខ្លួនយើងដែរ បើយើងមិនប្រព្រឹត្តិ ឬមិនយកខ្លួនបៀត ក៏មិនជួបរឿងអ៊ីចឹងដែរ។ ខ្ញុំចូលសិល្បៈ គឺព្រោះតែចិត្តស្រឡាញ់តែម្យ៉ាងគត់ មិនបានគិតដល់រឿងអ្វីផ្សេង ពីនេះទេ..!»។</span></p>
<p><span style="color: #000000;">តារាសម្ដែង សូ លីហ្សា ក្រៅពីសម្ដែងរឿងមួយចំនួន ម្ដងម្កាលក៏គេឃើញនាង ដើរបង្ហាញម៉ូដ ក្នុងកម្មវិធីតូចធំនានា តាមបណ្ដាក្រុមហ៊ុន ផលិតផលផ្សេងៗ ដែលបានអញ្ជើញនាងឲ្យចូលរួម ហើយការបង្ហាញមុខជាថ្មីនេះ នាងបានអះអាងថា នឹងបើកឱកាសឲ្យផលិតករ ទាក់ទងថតរឿងជាហូរហែ ខណៈពេលវេលា ក៏មានច្រើន មិនដូចមុនឡើយ៕</span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1009.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1010.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1011.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1012.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1013.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1014.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1015.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1016.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1017.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1018.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1019.jpg" alt="" /></span></p>
<p><span style="color: #000000;"><img src="http://www.khmertalking.com/wp-content/uploads/2017/03/kt1020.jpg" alt="" /></span></p>
</div>
</div>
<div class="post-related">
<h4 class="section-heading multi-tab bs-pretty-tabs bs-pretty-tabs-initialized" style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង </span></h4>
<div class="tab-content">
<div id="relatedposts_876184394_1" class="tab-pane bs-tab-anim bs-tab-animated active">
<div class="bs-pagination bs-ajax-pagination next_prev main-term-none clearfix"><a class="btn-bs-pagination next" title="Next" rel="next" data-id="93935856"></a></div>
</div>
</div>
</div>
</div>