<p><span style="color: #000000;"><strong>(ភ្នំពេញ)៖</strong> ការប្រកួតកីឡាឆ្នេរខ្សាច់ជើងឯកអាស៊ី ឬ Asian Beach Games លើកទី៥ ដែលធ្វើឡើងនៅទីក្រុងដាណាំង ប្រទេសវៀតណាម បានឆ្លងផុត ៣ថ្ងៃមកហើយ ដោយក្រុមអត្តពលិកមកពីថៃ ដណ្ដើមបានមេដាយមាសច្រើនជាងគេ និងឈរកំពូលតារាងមេដាយជាបណ្ដោះអាសន្ន តែក្រុមអត្តពលិកកម្ពុជា គឺទើបដណ្ដើមបានមេដាយសំរឹទ្ធ ២គ្រឿងប៉ុណ្ណោះ ដែលរកបានដោយក្រុមកីឡាប៉េតង់។</span></p>
<p><span style="color: #000000;">សម្រាប់ក្រុមអត្ដពលិកថៃ ដែលកំពុងឈរកំពូលតារាងមេដាយពេលនេះ គឺរកបានមេដាយសរុប ៣៤គ្រឿង ក្នុងនោះមានមេដាយមាស១៥ ប្រាក់៨ និងសំរឹទ្ធ១១ ហើយតាមពីក្រោយដោយក្រុមអត្តពលិកម្ចាស់ផ្ទះវៀតណាម ដែលរកបានមេដាយសរុប ៣៩គ្រឿង តែមានមេដាយមាស៩ ប្រាក់១២ និងសំរឹទ្ធ១៨។ ចំណែកចិន ឈរលេខ៣ មានមេដាយសរុប១៨គ្រឿង គឺមេដាយមាស៥ ប្រាក់៥ និងសំរឹទ្ធ៨។</span></p>
<p><span style="color: #000000;">ដោយឡែកកម្ពុជាវិញ ទើបរកបានមេដាយសំរឹទ្ធ ២គ្រឿង ដែលដណ្ដើមបានដោយក្រុមកីឡាករ-កីឡាការិនីផ្នែកកីឡាប៉េតង់កាលពីម្សិលមិញ។ មេដាយសំរឹទ្ធបើកឆាករបស់កម្ពុជានេះ គឺរកបានលើវិញ្ញាសាវាយគូបុរស ក្រោយប្រកួតចាញ់ក្រុមកីឡាករថៃ និងម៉ាឡេស៊ី ដោយលទ្ធផល ៧-១៣ ក្នុងវគ្គពាក់កណ្ដាលផ្ដាច់ព្រ័ត្រ និងវិញ្ញាសាវាយគូនារី ក្រោយចាញ់ក្រុមថៃ ២-១២ ក្នុងវគ្គពាក់កណ្ដាលផ្ដាច់ព្រ័ត្រដូចគ្នា។</span></p>
<p><span style="color: #000000;">គួរបញ្ជាក់ថា ព្រឹត្តិការណ៍កីឡាឆ្នេរខ្សាច់អាស៊ី ប្រចាំឆ្នាំ២០១៦ នៅទីក្រុងដាណាំង ប្រទេសវៀតណាមនេះ គឺចាប់ផ្ដើមប្រកួតតាំងពីថ្ងៃទី២៤ ខែកញ្ញាមកម្ល៉េះ ហើយគ្រោងនឹងបញ្ចប់នៅថ្ងៃទី០៣ ខែតុលាខាងមុខ ដោយកម្ពុជា បានបញ្ជូនកីឡា៥ ប្រភេទទៅចូលរួម ក្នុងនោះមានប្រភេទកីឡាវ៉ូវីណាម ចំបាប់ បាល់ទះឆ្នេរខ្សាច់ ប៉េតង់លើខ្សាច់ និងកីឡាល្បុក្កតោ៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-09-27-08-55-01-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-09-27-08-55-03-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-09-27-08-55-15-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-09-27-08-55-15-1.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>